1Ngasengibuya ngibone ukucindezela okwenziwa ngaphansi kwelanga; abacindezelwayo babekhala inyembezi, kodwa kungekho obaduduzayo. Kwakungekho abaduduzayo, ngoba abacindezeli babe lamandla.
2Ngathi bayadela abafileyo, ngoba sebefile, bangcono kakhulu kulabaphilayo abasekhona.
3Kodwa ongcono kulabo bonke yilowo ongazanga abe khona ongabubonanga ububi obenziwayo ngaphansi kwelanga.
4Ngasengibona ukuthi ukusebenza lakho konke ukuphumelela kuvela ekuncintanisaneni kwabantu. Lokho lakho kulize lamaya.
5Abantu bathi: Isiphukuphuku sigoqa izandla zaso sidle inqweqwe zomlomo.
6Kodwake kungcono isandla esisodwa esigcweleyo kanye lokuthula kulezandla ezimbili ezigcwele ukutshikatshika kanye lamaya.
7Ngabuya ngabona ize ngaphansi kwelanga;
8ngabona umuntu ongelabani indodana kumbe umfowabo etshikatshika njalonjalo enganeliswa yinotho yakhe engazibuzi ukuthi: Ngitshikatshikela bani, ngidele ukuzithokozisa na? Lokho lakho kulize lomsebenzi omubi.
9Ababili bangcono kuloyedwa, ngoba bayazuza umvuzo omuhle ngokutshikatshika kwabo.
10Ngoba uba omunye esiwa umnakwabo uzamvusa; kodwa maye kulowo owayo eyedwa kungekho ongamvusa.
11Futhi uba ababili belele ndawonye bayakhudumezana; oyedwa angakhudumala kanjani na?
12Umuntu angamahlula oyedwa, kodwa ababili bangamelana laye; intambo elemicu emithathu kayiqamuki masinyane.
13Umfana ongumyanga ohlakaniphileyo ungcono kulenkosi endala eyisithutha engasavumi ukwelulekwa,
14ngoba angaphuma entolongweni abe yinkosi lanxa wayezelwe engumyanga elizweni asezakulibusa.
15Kodwa ngihlolisisile bonke abantu abakhona ngaphansi kwelanga, ngabona ukuthi umfana angathathelwa isikhundla sakhe
16ozabusa abantu abanengi abangelakubalwa; laye kayikuthandeka kulabo abeza emva kwakhe. Lokho lakho kulize lamaya.
Who We AreWhat We EelieveWhat We Do
2025 by iamachristian.org,Inc All rights reserved.
