2 Lan 11 - Ndebele Bible (iBhayibhili Elingcwele) 1978

1Kwathi uRehobowamu esefikile eJerusalema wabuthanisa bonke abakoJuda labakoBenjamini, amadoda empi ayizinkulungwane ezilikhulu lamatshumi aficaminwembili ukuba alwe labakoIsrayeli ukubuyisa umbuso.1 Kho 12:21–24

2Kodwa ilizwi leNkosi uNkulunkulu lafika kuShemaya umuntu kaNkulunkulu lathi:

3Tshela uRehobowamu indodana kaSolomoni, inkosi yakoJuda, lalabo bonke abakoIsrayeli koJuda lakoBenjamini,

4uthi: INkosi ithi: Kaliyikuphuma ukulwa lezihlobo zenu. Buyelani lonke emizini yenu, ngoba lokhu kuyintando yami. Basebelilalela ilizwi leNkosi, babuyela emizini yabo, kabayanga ukulwa loJerobowamu.

Ukuphumelela kukaRehobowamu

5URehobowamu wahlala eJerusalema, wakha imizi eyizinqaba koJuda.

6Wakha iBetlehema leEtamu leTekowa

7leBeti‐Zuri leSoko leAdulamu

8leGathi leMaresha leZifi

9leAdorayimi leLakishi leAzeka

10leZora leAjaloni leHebroni, imizi ebiyelweyo ekoJuda lakoBenjamini.

11Waqinisa izinqaba, wabeka abaphathi kizo, wabuthela kuzo ukudla lamafutha lewayini.

12Wafaka izihlangu lemikhonto kuyo yonke imizi, wayiqinisa kakhulu. Wababusake abakoJuda labakoBenjamini.

13Abapristi lamaLevi ababekibo bonke abakoIsrayeli beza kuRehobowamu bevela kuzo zonke indawo ababehlala kuzo.

14Ngoba amaLevi atshiya amadlelo awo lamasimu awo, eza koJuda laseJerusalema, ngoba uJerobowamu lamadodana akhe bawakhupha esikhundleni sobupristi beNkosi;

15yena wazibekela abakhe abapristi ezindaweni eziphakemeyo zokukhonzela, lababomoya ababi, labamathole ayewenzile.1 Kho 12:31

16Labo ababezimisele ukuyidinga iNkosi, uNkulunkulu kaIsrayeli, bawalandela eJerusalema amaLevi bevela kuzo zonke izizwe zakoIsrayeli ukuyahlabela iNkosi, uNkulunkulu wabokhokho babo.

17Bawuqinisa umbuso wakoJuda, benza uRehobowamu indodana kaSolomoni waba lamandla iminyaka emithathu, ngoba bahamba endleleni kaDavida loSolomoni iminyaka emithathu.

18URehobowamu wathatha uMahalathi indodakazi kaJerimothi indodana kaDavida, lekaAbihayili indodakazi kaEliyabi indodana kaJese, waba ngumkakhe,

19wamzalela amadodana oJewushi loShemariya loZahamu.

20Wabuya wathatha uMahaka indodakazi kaAbisalomu, owamzalela oAbija loAthayi loZiza loShelomithi.

21URehobowamu wayemthanda uMahaka ukwedlula bonke omkakhe labanye abafazi bakhe; wathatha abafazi abalitshumi lesificaminwembili, labanye abafazi abangamatshumi ayisithupha, wayelamadodana angamatshumi amabili lesificaminwembili lamadodakazi angamatshumi ayisithupha.

22URehobowamu wabeka uAbija indodana kaMahaka waba nguye omkhulu phakathi kwabafowabo, ngoba wayeqonde ukumenza inkosi.

23Wenza ngokuhlakanipha, wawabeka amadodana akhe ezindaweni zonke zakoJuda lakoBenjamini, kuyo yonke imizi ebiyelweyo, wawanika ukudla okunengi, wawadingela abafazi.