Eks 6 - Ndebele Bible (iBhayibhili Elingcwele) 1978

1Kodwa iNkosi yathi kuMose: Khathesi uzakubona lokho engizakukwenza kuFaro; ngenxa yesandla esilamandla uzakubayekela ukuba bahambe, abaxotshe elizweni lakhe ngesandla esiqinileyo.

UMose ubizwa ngokwesibili

2UNkulunkulu wakhuluma kuMose wathi: NgiyiNkosi;Eks 3:13–15

3ngabonakala kuAbrahama lakuIsaka lakuJakobe njengoNkulunkulu uSomandla; kodwa ngebizo lami lokuthi iNkosi ngangingaziwa kubo.

4Ngamisa isivumelwano sami labo sokuba ngibaphe ilizwe laseKanani, ilizwe ababehlala kulo njengabezizwe.

5Futhi ngizwile ukububula kwabakoIsrayeli abenziwe baba yizigqili ngamaGibithe; njalo ngikhumbula isivumelwano sami.

6Ngakhoke tshono kwabakoIsrayeli ukuthi: NgiyiNkosi; ngizalikhupha ekucindezelweni kwenu ngamaGibithe; ngilikhulule ebugqilini benu, ngilihlenge ngengalo elamandla langezenzo ezinkulu zokwahlulela.

7Ngizalithatha libe ngabantu bami, mina ngibe nguNkulunkulu wenu; lizakwazi ukuthi ngiyiNkosi uNkulunkulu wenu olikhupha ekucindezelweni kwenu ngamaGibithe;

8ngizalingenisa elizweni engalithembisa lona ngesifungo ukulinika uAbrahama loIsaka loJakobe, ngilinike lona libe ngelenu; ngiyiNkosi.

9UMose wasekhuluma ngokunjalo labakoIsrayeli; kodwa kabamlalelanga ngenxa yokudabuka kwenhliziyo zabo langenxa yobugqili babo obunzima.

10INkosi yakhuluma kuMose,

11yathi: Yana kuFaro, inkosi yaseGibithe, ukhulume layo ukuba ivumele abakoIsrayeli ukuba baphume elizweni lakhe.

12Kodwa uMose wakhuluma phambi kweNkosi wathi: Khangela, abakoIsrayeli kabangilalelanga; phoke uFaro angangizwa kanjani mina engigagasayo na?

13INkosi yakhuluma kuboMose loAroni ukuba babatshele abakoIsrayeli loFaro inkosi yaseGibithe ukuthi ibalayile ukukhupha abakoIsrayeli elizweni laseGibithe.

Inzalo kaMose lenzalo kaAroni

14Laba bazinhloko zezindlu zaboyise; amadodana kaRubeni, izibulo likaIsrayeli, ayengoHanoki loPalu loHezironi loKarimi; laba balusendo lukaRubeni.

15Amadodana kaSimeyoni ayengoJemuweli loJamini loOhadi loJakini loZohari loShawuli indodana yowesifazana waseKanani; laba balusendo lukaSimeyoni.

16La ngamabizo amadodana kaLevi ngezizukulwana zawo; ayengoGerishoni loKohathi loMerari; iminyaka yokuhamba kukaLevi yayilikhulu lamatshumi amathathu lesikhombisa.Nani 3:17–20; 26:57, 58; 1 Lan 6:16–19

17Amadodana kaGerishoni ayengoLibini loShimeyi ngosendo lwawo.

18Amadodana kaKohathi ayengoAmramu loIzihari loHebroni loUziyeli; iminyaka yokuhamba kukaKohathi yayilikhulu lamatshumi amathathu lantathu.

19Amadodana kaMerari ayengoMahli loMushi. Yilo lolusendo lwamaLevi ngezizukulwana zalo.

20UAmramu wathatha uJokebedi udadewaboyise, waba ngumkakhe. Wazala uAroni loMose. Iminyaka yokuhamba kukaAmramu yayilikhulu lamatshumi amathathu lesikhombisa.

21Amadodana kaIzihari ayengoKora loNefegi loZikiri.

22Amadodana kaUziyeli ayengoMishayeli loElizafani loSithiri.

23UAroni wathatha uElisheba indodakazi kaAminadaba, udadewabo kaNashoni, waba ngumkakhe. Wazala uNadabi loAbihu loEleyazare loIthamari.

24Amadodana kaKora ayengoAsiri loElkana loAbiyasafa: yilo lolusendo lwabakoKora.

25UEleyazare indodana kaAroni wathatha enye yamadodakazi kaPutiyeli, yaba ngumkakhe. Yazala uFiniyasi. Yizo lezi inhloko zezindlu zamaLevi ngosendo lwazo.

26Yibo labo oAroni loMose iNkosi eyathi kubo: Khuphani abakoIsrayeli elizweni laseGibithe ngezimpi zabo.

27Yibo labo ababekhuluma loFaro inkosi yaseGibithe ukuba akhuphe abakoIsrayeli eGibithe, yibo oMose loAroni.

INkosi iyabalaya oMose loAroni

28Kwathi mhla iNkosi ikhuluma kuMose elizweni laseGibithe,

29yathi kuye: Mina ngiyiNkosi; tshono kuFaro inkosi yaseGibithe konke engikutsho kuwe.

30Kodwa yena wathi eNkosini: Khangela, mina ngiyagagasa; uFaro angangizwa kanjani na?