Jer 24 - Ndebele Bible (iBhayibhili Elingcwele) 1978

Umfanekiso womkhiwa omuhle lomkhiwa omubi

1Ngemva kokuba uNebukadineza inkosi yaseBabiloni esethumbile eJerusalema uJekoniya indodana kaJehoyakimi, inkosi yakoJuda, kanye lezikhulu zakoJuda, lezingcitshi zemisebenzi, labakhandi, wabasa eBabiloni, iNkosi yangitshengisa lumbono, izitsha ezimbili zilomkhiwa zibekwe phambi kwethempeli leNkosi.2 Kho 24:12–16; 2 Lan 36:10

2Esinye isitsha sasilomkhiwa omuhle kakhulu ovuthwe kuqala; kodwa esinye sasilomkhiwa omubi kakhulu ongadlekiyo ngenxa yobubi bawo.

3INkosi yathi kimi: Jeremiya, ubonani? Ngathi: Umkhiwa, omuhle muhle kakhulu, lomubi mubi kakhulu, kawudleki ngenxa yobubi bawo.

4Laselifika kimi ilizwi leNkosi lisithi:

5INkosi, uNkulunkulu kaIsrayeli, ithi: Njengalumkhiwa omuhle bazakuba njalo kimi abathunjiweyo bakoJuda, engibase elizweni lamaKaladiya elikhatshana lalindawo.

6Ngizabaphatha kuhle, ngibabuyise kulelilizwe. Ngizakubakha, ngingabadilizi, ngibagxumeke, ngingabasiphuni,

7ngibanike inhliziyo yokwazi ukuba mina ngiyiNkosi; bazakuba ngabantu bami, ngibe nguNkulunkulu wabo, ngoba bazabuyela kimi ngenhliziyo yabo yonke.

8Kodwa iNkosi ithi: Njengalumkhiwa omubi ongadlekiyo ngenxa yobubi bawo, ngizaphatha ngokunjalo uZedekiya, inkosi yakoJuda, lezikhulu zakhe, lengcosana yeJerusalema eseleyo kulelilizwe, lalabo abakhileyo eGibithe.

9Ngizakubenza babe yinto eyesabekayo kuyo yonke imibuso yomhlaba, babe lihlazo, lesiga, lenhlekisa, lesiqalekiso kuzo zonke indawo engibaxotshele kuzo.

10Ngizabehlisela impi lendlala lomkhuhlane, baze babhubhe baphele elizweni engibanika lona lokhokho babo.