Nani 4 - Ndebele Bible (iBhayibhili Elingcwele) 1978

Imisebenzi yamaLevi

1INkosi yathi kuMose loAroni:

2Balani amadodana kaKohathi phakathi kwamadodana kaLevi, ngensendo zawo langezindlu zaboyise,

3kusukela kulabo abaleminyaka engamatshumi amathathu kusiya kulabo abaleminyaka engamatshumi amahlanu, bonke abalamandla okusebenza, ukuba benze umsebenzi ethenteni lokuhlangana.

4Yilo umsebenzi wamadodana kaKohathi ethenteni lokuhlangana, ukulondoloza izinto ezingcwele kakhulu.

5Lapho kususwa izihonqo, uAroni lamadodana akhe bazakungena, behlise iveli elilikhetheni, basibekele umtshokotsho wobufakazi ngalo,

6bawembese ngezinzwezwe, bendlale phezu kwaso ilembu eliluhlaza, bafake imijabo yawo.

7Bazakwendlala phezu kwetafula yezinkwa ezahlukaniselwe iNkosi ilembu eliluhlaza, babeke phezu kwalo imiganu, lenkezo zempepha, lezitsha, lezinditshi zokuthela; lesinkwa sizakuba phezu kwayo insuku zonke.

8Phezu kwalezizinto bazakwendlala ilembu elibomvu, balembese ngezinzwezwe, bafake imijabo yayo.

9Bazathatha ilembu eliluhlaza, basibekele uluthi lwesibane, lezibane zalo, lendlawu zalo, lemiganu yalo, lezitsha zonke zamafutha ezisetshenziswa kulo.

10Bazalufaka kanye lezinto zalo zonke ezinzwezweni, bakugaqe konke ogodweni.

11Phezu kwealtare legolide bazakwendlala ilembu eliluhlaza, balembese ngezinzwezwe, bafake imijabo yalo.

12Bazakuthatha yonke impahla esetshenziswa enkonzweni yendlu engcwele, bayifake phezu kwelembu eliluhlaza, bayembese ngezinzwezwe, bayigaqe ogodweni.

13Bazakususa umlotha ealtareni, bendlale phezu kwalo ilembu eliyibubende,

14babeke kulo zonke izinto zealtare ezisetshenziswa enkonzweni, izitsha zalo zokuthwala umlilo, lamafolokwe, lamafotsholo, lemiganu yokuchela, lazo zonke izinto zealtare, bendlale phezu kwalezizinto izinzwezwe, bafake imijabo yalo.

15Lapho uAroni lamadodana akhe sebeqedile ukusibekela impahla engcwele lazo zonke izitsha zakhona, ekususweni kwezihonqo, amadodana kaKohathi azakuza ukukuthwala, kodwa kawayikuthinta izinto ezingcwele ukuba angafi. Yizo lezo izinto zethente lokuhlangana amadodana kaKohathi azakuzithwala.

16UEleyazare indodana kaAroni umpristi uzakulondoloza amafutha esibane, lempepha elephunga elimnandi, lomnikelo wempuphu, lamagcobo okugcoba; uzalondoloza lonke iTabernakeli lakho konke okukilo, lendlu engcwele lezinto zayo.

17INkosi yathi kuMose loAroni:

18Kasingabhujiswa isizwe samaKohathi phakathi kwamaLevi.

19Kodwa liwaphathe ngalindlela, ukuba aphile, angafi ekusondeleni kwawo ezintweni ezingcwele kakhulu; uAroni lamadodana akhe bazakungena, banike lowo lalowo wawo umsebenzi wakhe lomthwalo wakhe;

20kodwa kawayikungena ukukhangela izinto ezingcwele langomzuzwana nje, funa afe.

21INkosi yathi kuMose:

22Bala amadodana kaGerishoni ngensendo zawo langezindlu zaboyise,

23kusukela kulabo abaleminyaka engamatshumi amathathu kusiya kulabo abaleminyaka engamatshumi amahlanu, bonke abalamandla okusebenza, ukuba benze umsebenzi ethenteni lokuhlangana.

24Yilo umsebenzi wamaGerishoni ekukhonzeni lekuthwaleni kwabo imithwalo;

25bazathwala amaveli eTabernakeli, lethente lokuhlangana kanye lezinzwezwe zalo, lezinzwezwe eziphezu kwalo, leveli lomnyango wethente lokuhlangana,

26lamakhetheni eguma, leveli lomnyango weguma elizingelezele iTabernakeli lealtare, lezintambo zakhona, lempahla yonke yenkonzo yabo; bazakwenza konke okufanele kwenzelwe lezizinto.

27Wonke umsebenzi wamadodana kaGerishoni uzakwenziwa njengokulaya kukaAroni lamadodana akhe, konke ukuthwala kwawo lakho konke ukwenza kwawo. Uzawanika yonke imithwalo azayithwala.

28Yiwo lowo umsebenzi wamadodana amaGerishoni ethenteni lokuhlangana; umsebenzi wawo uzakuphathwa ngoIthamari indodana kaAroni umpristi.

29Amadodana kaMerari uzakuwabala ngensendo zawo langezindlu zaboyise,

30kusukela kulabo abaleminyaka engamatshumi amathathu kusiya kulabo abaleminyaka engamatshumi amahlanu, bonke abalamandla okusebenza, ukuba benze umsebenzi ethenteni lokuhlangana.

31Wonke umsebenzi wabo ethenteni lokuhlangana uzakuba yikuthwala amapulanka eTabernakeli, lemithando yalo, lensika zalo, lenyawo zalo,

32lensika zeguma inxa zonke, lenyawo zazo, lezikhonkwane, lezintambo, lempahla yazo yonke. Uzakubaqamba ngamabizo, utshele omunye lomunye ukuthi uzakuthwalani.

33Yiwo lowo umsebenzi wamadodana kaMerari; wonke umsebenzi wawo ethenteni lokuhlangana uzakuphathwa nguIthamari indodana kaAroni umpristi.

34UMose loAroni lezikhulu zebandla babala amadodana amaKohathi ngensendo zawo langezindlu zaboyise,

35kusukela kulabo abaleminyaka engamatshumi amathathu kusiya kulabo abaleminyaka engamatshumi amahlanu, bonke abalamandla okusebenza, ukuba benze umsebenzi ethenteni lokuhlangana;

36labo ababalwayo babezinkulungwane ezimbili, lamakhulu ayisikhombisa, lamatshumi amahlanu.

37Yilelo inani lamaKohathi wonke asebenza ethenteni lokuhlangana, ababalwa ngoMose loAroni njengomlayo weNkosi ngoMose.

38Kwabalwa amadodana kaGerishoni, ngensendo zawo langezindlu zaboyise,

39kusukela kulabo abaleminyaka engamatshumi amathathu kusiya kulabo abaleminyaka engamatshumi amahlanu, bonke abalamandla okusebenza, ukuba benze umsebenzi ethenteni lokuhlangana.

40Labo ababalwayo ngensendo zabo langezindlu zaboyise babezinkulungwane ezimbili, lamakhulu ayisithupha, lamatshumi amathathu.

41Yilelo inani lamadodana kaGerishoni, wonke asebenza ethenteni lokuhlangana, ababalwa ngoMose loAroni njengokulaya kweNkosi.

42Kwabalwa amadodana kaMerari ngensendo zawo langezindlu zaboyise,

43kusukela kulabo abaleminyaka engamatshumi amathathu kusiya kulabo abaleminyaka engamatshumi amahlanu, bonke abalamandla okusebenza, ukuba benze umsebenzi ethenteni lokuhlangana.

44Labo ababalwayo ngensendo zabo babezinkulungwane ezintathu lamakhulu amabili.

45Yibo labo ababalwayo ensendweni zamadodana kaMerari ngoMose loAroni njengomlayo weNkosi ngoMose.

46Bonke ababalwayo bamaLevi, ababalwa ngoMose loAroni lezikhulu zakoIsrayeli ngensendo zabo langezindlu zaboyise,

47kusukela kulabo abaleminyaka engamatshumi amathathu kusiya kulabo abaleminyaka engamatshumi amahlanu, bonke abalamandla okusebenza lokuthwala imithwalo ethenteni lokuhlangana,

48babezinkulungwane ezificaminwembili, lamakhulu amahlanu, lamatshumi aficaminwembili.

49Njengomlayo weNkosi ngoMose babalwa, ukuba yilowo lalowo anikwe umsebenzi wakhe lomthwalo wakhe; ngakhoke babalwa njengokutsho kweNkosi kuMose.