Josh 9 - Ndebele Bible (iBhayibhili Elingcwele) 1978

Ubuqili babaseGibeyoni

1Kwathi lapho wonke amakhosi ayengaphetsheya kweJordani, ezintabeni, laseShefela, lasokhunjini loLwandle olukhulu, kusiya eLebanoni, amaHethi lamaAmori lamaPerizi lamaHivi lamaJebusi esizwa ngalokhu,

2abuthana ndawonye ukulwa loJoshuwa labakoIsrayeli.

3Kwathi abaseGibeyoni sebezwile lokho uJoshuwa ayekwenzile eJeriko leAyi,

4benza ubuqili; basuka belomphako, bathwalisa obabhemi babo amasaka amadala lemigodla yewayini emidala ebekelweyo,

5bafaka enyaweni zabo amanyathelo abekelweyo, lezigqoko ababezigqokile sezigugile, lezinkwa zokudla zasezomile sezikhuntile.

6Baya kuJoshuwa ezihonqweni eGiligali, bathi kuye labakoIsrayeli: Sivela elizweni elikhatshana, ngakhoke yenzani isivumelwano lathi.

7Kodwa abakoIsrayeli bathi kumaHivi: Mhlawumbe lihlala phakathi kwethu; singenza kanjani isivumelwano lani na?Eks 23:32; 34:12; Dute 7:2

8Athi kuJoshuwa: Siyizinceku zakho. UJoshuwa wathi kiwo: Lingobani? Livela ngaphi?

9Athi kuye: Inceku zakho zivela elizweni elikhatshana, ngenxa yebizo leNkosi uNkulunkulu wakho; ngoba sizwile ngayo langakho konke eyakwenza eGibithe,

10leyakwenza emakhosini amabili amaAmori ayengaphetsheya kweJordani, uSihoni inkosi yaseHeshiboni, loOgi inkosi yaseBashani eyayihlala eAshitarothi.Nani 21:21–35

11Abadala bethu labo bonke abakhileyo elizweni lakithi bathe kithi: Thathani umphako lihambe, liyehlangana labo, lithi kibo: Siyizinceku zenu; yenzani lathi isivumelwano.

12Nansi isinkwa sethu; sasisatshisa sisithatha ezindlini zethu ukuba sibe ngumphako wethu mhla sisukayo sisiza kini; kodwa khathesi sesomile sakhunta.

13Limigodla yewayini yayimitsha lapho siyigcwalisa; kodwa isidabukile. Lalezizigqoko lamanyathelo ethu sekugugiswe luhambo olude.

14Ngakho abadala bawuthatha bawuzwa umphako, bengabuzanga eNkosini.

15UJoshuwa wasethembisa ukuthula, wenza labo isivumelwano sokubayekela baphile, labadala bebandla bafunga kibo.

16Kwathi emva kwensuku ezintathu abakoIsrayeli sebenzile isivumelwano labo, bezwa ukuba bangabomakhelwana babo, bahlala phakathi kwabo.

17AbakoIsrayeli basebebalandela bafika emizini yabo ngosuku lwesithathu. Imizi yabo yayiyile, iGibeyoni leKefira leBerothi leKiriyathi‐Jeyarimi.

18AbakoIsrayeli kabababulalanga ngoba abadala bebandla babefungile kibo ngeNkosi, uNkulunkulu kaIsrayeli; kodwa ibandla lonke labasola abadala.

19Bonke abadala bathi ebandleni: Sifungile kibo ngeNkosi, uNkulunkulu kaIsrayeli, ngalokhoke singeke sibenze lutho.

20Sizakwenza lokhu kibo sibayekele baphile, funa ulaka lwehlela phezu kwethu ngenxa yesifungo esasifunga kibo.

21Abadala bathi futhi: Bayekeleni baphile, ukuze balithezele inkuni balikhele amanzi ibandla lonke.

22UJoshuwa wasebabiza abaseGibeyoni, wathi kibo: Lisikhohliseleni na? Lasitshela ukuthi lihlala khatshana lathi, kanti lina lihlala eduze lathi.

23Ngakhoke liqalekisiwe, abanye benu bazakuba yizigqili zokuthezela inkuni lokukhela amanzi indlu kaNkulunkulu wami.

24Bamphendula uJoshuwa bathi: Thina zinceku zakho satshelwa ukuthi iNkosi uNkulunkulu wakho yalaya uMose inceku yayo ukulinika ilizwe lonke lokuba libulale bonke abakhileyo kilo. Ngakho ngenxa yenu saba lovalo kakhulu ngokuphila kwethu, yikho senze lokho.

25Khathesike sesingaphansi kwamandla akho, yenza lokho okubona kulungile kufanele ukuba ukwenze kithi.

26Ngakho wasesenza lokho, wabophula ezandleni zabakoIsrayeli, kabababulalanga.

27Kodwa uJoshuwa wabenza ukuba balithezele inkuni balikhele amanzi ibandla kanye lealtare leNkosi; bakwenza lokho kuze kube lamhla endaweni iNkosi eyayikhethayo.