1UIsrayeli wahlala eShithimi. Abantu baqala ukuphinga lamadodakazi aseMowabi.
2Wona amema abantu ukuya emihlatshelweni yabonkulunkulu bawo, labantu badla, bakhothamela onkulunkulu bawo.
3Ngalokhu abakoIsrayeli bahlanganyela ukukhonza uBali wasePeyori; iNkosi yabathukuthelela.
4INkosi yathi kuMose: Thatha zonke inhloko zabantu, uziphanyeke phambi kweNkosi ngesikhathi sokutshisa kwelanga, ukuba intukuthelo yayo evuthayo iphele koIsrayeli.
5UMose wathi kubo abahluleli bakoIsrayeli: Bulalani, kube yilowo lalowo wenu abantu besizwe sakhe abahlanganyele ekukhonzeni uBali wasePeyori.
6Umuntu othile wakoIsrayeli waletha emzini wakhe owesifazana waseMidiyani, phambi kukaMose laphambi kwebandla labakoIsrayeli, besakhala ngasemnyango wethente lokuhlangana.
7UFiniyasi, indodana kaEleyazare kaAroni umpristi, ekubona lokhu wasukuma, waphuma ebandleni, wathatha umkhonto,
8wamlandela lowomuntu wakoIsrayeli, wangena ethenteni, wabagwaza bobabili, indoda yakoIsrayeli lowesifazana, wagwaza owesifazana esiswini. Wasuphela umkhuhlane ebantwini bakoIsrayeli.
9Kodwake labo ababulawa ngumkhuhlane babezinkulungwane ezingamatshumi amabili lane.
10INkosi yathi kuMose:
11UFiniyasi, indodana kaEleyazare kaAroni umpristi, uqede ulaka lwami ebantwini bakoIsrayeli, ngoba wayelomhawu ofanana lomhawu wami phakathi kwabo; ngakho kangichithanga abakoIsrayeli ngomona wami.
12Ngakhoke mtshele uthi: Ngiyamnika isivumelwano sami sokuthula;
13yena lenzalo yakhe emva kwakhe bazakuba lesivumelwano sobupristi obungelakuphela, ngoba wayelomhawu ngoNkulunkulu wakhe, wabenzela abakoIsrayeli indlela yokubuyisana.
14Ibizo lalowomuntu wakoIsrayeli owabulawayo kanye lowesifazana waseMidiyani lalinguZimri indodana kaSalu, owayeyinhloko yendlu yabakoSimeyoni.
15Ibizo lowesifazana waseMidiyani owabulawayo lalinguKozibi indodakazi kaZuri, owayeyinhloko yendlu yamaMidiyani.
16INkosi yathi kuMose:
17Hlupha amaMidiyani, uwahlasele;
18ngoba alihluphile ngobuqili bawo alikhohlisa ngendaba kaPeyori langendaba kaKozibi udadewabo, indodakazi yesikhulu saseMidiyani, owabulawa ngosuku lomkhulane ngenxa kaPeyori.
Who We AreWhat We EelieveWhat We Do
2025 by iamachristian.org,Inc All rights reserved.
