Jer 1 - Ndebele Bible (iBhayibhili Elingcwele) 1978

Ukubizwa kukaJeremiya

1Nansi indaba kaJeremiya, indodana kaHilikiya omunye wabapristi ababeseAnathothi elizweni lakoBenjamini.

2Ilizwi leNkosi lafika kuye ensukwini zikaJosiya indodana kaAmoni, inkosi yakoJuda, ngomnyaka wetshumi lantathu wokubusa kwakhe;

4Ilizwi leNkosi lafika kimi lisithi:

5Ngingakakubumbi esiswini ngakwazi,

ungakazalwa ngakwahlukanisa,

ngakubeka umprofethi ezizweni.

6Ngasengisithi: Hawu Nkosi Nkulunkulu! Angikwazi ukukhuluma ngoba ngingumntwana nje.

7Kodwa iNkosi yathi kimi:

Ungatsho ukuthi: Ngingumntwana nje;

ngoba kubo bonke engikuthuma kubo uzakuya,

lakho konke engikulaya khona uzakukukhuluma.

8Ungabesabi, ngoba ngilawe ukukuvikela, kutsho iNkosi.

9INkosi yasiselula isandla sayo, yathinta umlomo wami, yathi kimi:

Khangela, sengibekile amazwi ami emlonyeni wakho.

10Ngiyakubeka lamhla phezu kwezizwe laphezu kwemibuso,

ukusiphuna lokudiliza, ukubhubhisa lokuchitha, ukwakha lokuhlanyela.

11Ilizwi leNkosi lafika kimi lisithi: Jeremiya, ubonani na? Ngathi: Ngibona uswazwi lwe‐alimondi.

12INkosi yasisithi kimi: Ubone kuhle, ngoba ngiyalilinda ilizwi lami ukuba ngilenze.

13Ilizwi leNkosi lafika kimi ngokwesibili lisithi: Ubonani na? Ngathi: Ngibona imbiza ebilayo, ifulathele enyakatho.

14INkosi yasisithi kimi: Okubi kuzaqubuka enyakatho, kubehlele bonke abakhileyo elizweni.

15Ngoba ngiyabiza izizwe zonke zemibuso yasenyakatho, kutsho iNkosi; amakhosi azo azakufika, wonke azakumisa izihlalo zawo zobukhosi emasangweni aseJerusalema, azingelezele imiduli yalo lonke, lemizi yonke yakoJuda.

16Ngizabagweba ngenxa yabo bonke ububi babo ngokungihlamuka kwabo. Batshisela abanye onkulunkulu impepha, bakhonza imisebenzi yezandla zabo.

17Kodwa wena, mana isibindi, usuke, ukhulume kibo konke engikulaya khona. Ungabesabi, funa ngehlisele phezu kwakho ukwesaba phambi kwabo.

18Ngoba ngikwenzile lamhla waba njengomuzi obiyelweyo, lensika yensimbi, lemiduli yethusi, ukumelana lalo lonke ilizwe, wonke amakhosi akoJuda, lezikhulu zalo, labapristi balo, labantu balo.

19Bazakulwa lawe, kodwa kabayikukwehlula, ngoba ngilawe ukukuvikela, kutsho iNkosi.