1INkosi isethenteni lokuhlangana yambiza uMose, yakhuluma kuye yathi:
2Tshono ebantwini bakoIsrayeli uthi: Nxa umuntu wakini eletha umnikelo eNkosini, kathathe umnikelo wakhe enkomeni loba ezimvini.
3Uba umnikelo wakhe ungumnikelo wokutshiswa owenkomo, uzakunikela ngenkunzi engelasici, ayinikele ngasemnyango wethente lokuhlangana, ukuba amukeleke phambi kweNkosi.
4Uzakubeka isandla sakhe enhlokweni yomnikelo wokutshiswa, ukuze wamukelwe ngenxa yakhe, umenzele indlela yokubuyisana.
5Kayihlabe inkunzi phambi kweNkosi; amadodana kaAroni angabapristi azathatha igazi, alikhaphazele ealtareni, inxa zonke elingasemnyango wethente lokuhlangana.
6Uzakuhlinza umnikelo wokutshiswa, awuhlahlele.
7Amadodana kaAroni umpristi alungise umlilo ealtareni, abeke inkuni phezu komlilo.
8Amadodana kaAroni angabapristi abeke izitho kuhle, inhloko lamahwahwa phezu kwenkuni ezisemlilweni ophezu kwealtare.
9Imibilini yayo lemilenze yayo kayigeziswe ngamanzi; umpristi akutshise konke ealtareni kube ngumnikelo wokutshiswa, umnikelo owenziwe ngomlilo, olephunga elimnandi eNkosini.
10Uba umnikelo wakhe ungumnikelo wemihlambi, owezimvini loba owezimbuzini, uzanikela ngenduna engelasici;
11ayihlabe ngasohlangothini lwealtare olungasenyakatho, phambi kweNkosi; amadodana kaAroni angabapristi akhaphazele igazi layo ealtareni inxa zonke.
12Uzakuyihlahlela; umpristi abeke kuhle izitho zayo, inhloko lamahwahwa, phezu kwenkuni ezisemlilweni ophezu kwealtare.
13Imibilini lemilenze kayigeziswe ngamanzi; umpristi anikele konke, akutshise ealtareni; kungumnikelo wokutshiswa, umnikelo owenziwe ngomlilo, olephunga elimnandi eNkosini.
14Uba umnikelo wakhe eNkosini ungumnikelo wokutshiswa owezinyoni, uzanikela amajuba loba inkwilimba.
15Umpristi ayilethe ealtareni, ayitshile intamo, ayitshise ealtare, igazi layo lichithekele ngasohlangothini lwealtare,
16asuse isidlelo sayo lensiba, akulahle ngaseceleni kwealtare ngasempumalanga, endaweni yomlotha,
17ayidonse ngamaphiko, kodwa angayidabuli; umpristi ayitshise ealtareni, phezu kwenkuni ezisemlilweni, kube ngumnikelo wokutshiswa, umnikelo owenziwe ngomlilo, olephunga elimnandi eNkosini.
Who We AreWhat We EelieveWhat We Do
2025 by iamachristian.org,Inc All rights reserved.
