Isa 48 - Ndebele Bible (iBhayibhili Elingcwele) 1978

UNkulunkulu uyiNkosi yezinto ezizayo

1Zwana lokhu, wena ndlu kaJakobe,

obizwa ngebizo likaIsrayeli,

owenzalo kaJuda, ofunga ibizo leNkosi,

odumisa uNkulunkulu kaIsrayeli,

kodwa kungesikho ngeqiniso.

2Kanti lizibiza ngokuthi lingabantu bomuzi ongcwele,

lithembela kuNkulunkulu kaIsrayeli,

obizwa ngokuthi yiNkosi yamabandla.

3INkosi ithi: Ngamemezela endulo izinto zakuqala,

ngaziveza ngomlomo wami;

ngasengizenza ngokuphangisa, zenzeka.

4Ngoba ngiyazi ukuthi ulenkani,

lentamo yakho injengensimbi,

lebunzi lakho linjengethusi,

5ngazimemezela kuwe kusukela endulo,

zingakafiki ngakutshela ngazo,

funa uthi: Isithombe sami sizenzile,

isithombe sami esibaziweyo lesithombe sami esibunjiweyo sizimisile.

6Konke engakubikezelayo wakuzwa, wakubona;

kumele uvume ukuthi kuqinisekile;

khathesi ngikutshela izinto ezintsha ezizayo,

izinto ezifihlakeleyo obungazazi kuqala.

7Zidalwe khathesinje, kungesikho endulo;

kawuzwanga ngazo ngaphambili,

funa uthi: Khangela, bengizazi.

8Kawuzwanga, kawazanga,

kusukela endulo indlebe yakho kayivulekanga.

Ngoba bengisazi ukuthi uzakhohlisa kakhulu,

lokuthi kusukela ekuzalweni kwakho wawungumhlubuki.

9Ngenxa yebizo lami ngiyabamba ulaka lwami,

langenxa yodumo lwami ngizibambile ukuba ngingakuchithi.

10Khangela, ngikuhlolile emlilweni ongesiwo wokupheka isiliva,

kodwa ngikuhlole ngomlilo wezinhlupheko.

11Ngenxa yebizo lami lodwa ngiyakwenza;

ngoba ibizo lami lingcoliselwani na?

Kanginiki omunye udumo lwami.

UKurosi ungokhethiweyo yiNkosi

12Ngilalela, wena Jakobe, lawe Israyeli engikubizileyo.

Nginguye, ngingowokuqala lowokucina.

13Isandla sami sabeka isisekelo somhlaba,

lesandla sami sokunene sendlala iphezulu;

lapho ngikubiza, kuyasukuma konke.

14Buthanani lonke, lizwe.

Kasikho isithombe esasingabikezela ukuba

uKurosi engimthandayo, uzahlasela iBabiloni,

achithe khona amaKaladiya.

15Mina uqobo ngikhulumile, ngambiza,

ngimlethile, uzakuphumelela ekuhambeni kwakhe.

16Sondelani kimi, lizwe lokhu;

kusukela ekuqaleni ngakhuluma obala,

kusukela ekuqaliseni kwezinto lezi ngangikhona.

— Khathesike iNkosi, uNkulunkulu kanye lomoya wayo ingithumile —

INkosi izakuhlenga uIsrayeli

17INkosi, uMhlengi wakho, oNgcwele kaIsrayeli, ithi:

NgiyiNkosi, uNkulunkulu wakho, ekufundisa lokho okukusizayo,

ekuhola ngendlela ofanele ukuba uhambe ngayo.

18Kungathi ngabe walalela imilayo yami!

Ng’khona izibusiso zakho zazizakuba njengomfula ogelezayo,

lokuphumelela kwakho kube njengamavinqo olwandle;

19lenzalo yakho yayizakuba ngangetshebetshebe,

labantwana bakho babe ngangezinhlamvu zalo;

lebizo labo belingayikucima phambi kwami.

20Phumani eBabiloni, libalekele amaKaladiya,

limemezele lokhu ngelizwi lokuthokoza,

likuphumisele endaweni zonke,

lithi: INkosi ihlengile inceku yayo uJakobe.

21Kabomanga lapho ibahola enkangala;

yabakhuphela amanzi edwaleni,

yaqhekeza idwala, amanzi ampompoza.

22INkosi ithi: Kakulakuthula lakancinyane kwababi.