1 Lan 16 - Ndebele Bible (iBhayibhili Elingcwele) 1978

1Bawuletha umtshokotsho kaNkulunkulu, bawubeka phakathi kwethente uDavida ayelilungisele wona; banikela iminikelo yokutshiswa leminikelo yokuthula phambi kukaNkulunkulu.

2UDavida eseqedile ukunikela iminikelo yokutshiswa leminikelo yokuthula wababusisa abantu ebizweni leNkosi,

3wababela abakoIsrayeli bonke abesilisa labesifazana, kwaba yilowo lalowo isinkwa, leqatha lenyama, lesinkwa sezithelo zevini ezomisiweyo.

4Wamisa amaLevi athile ukukhonza phambi komtshokotsho weNkosi ukuba ayibonge ayidumise iNkosi, uNkulunkulu kaIsrayeli.

5UAsafi wayeyinduna yawo, elandelwa nguZekariya loJahaziyeli loShemiramothi loJehiyeli loMathithiya loEliyabi loBenaya loObedi‐Edoma loJeyiyeli ababezatshaya amachacho lemihubhe; uAsafi wayezatshaya izigubhe;

6oBenaya loJahaziyeli abapristi babezakhalisa impondo njalonjalo phambi komtshokotsho wesivumelwano sikaNkulunkulu.

Ihubo likaDavida lokubonga

7UDavida wamisa ngalolosuku ukuba uAsafi lezihlobo zakhe baqale ukuhlabelela bedumisa iNkosi.

8Bongani iNkosi, litshumayele ibizo layo,

lizazise phakathi kwabantu izenzo zayo.

9Hlabelani kuyo, liyihubele amahubo,

likhulume ngezenzo zayo ezimangalisayo.

10Jabulani ebizweni layo elingcwele;

kazithokoze inhliziyo zabo abafuna iNkosi.

11Funani iNkosi lamandla ayo,

liyidinge yona njalonjalo.

12Khumbulani izenzo zayo ezimangalisayo eyazenzayo,

izimangaliso eyazenzayo lezahlulelo eyazikhulumayo,

13lina nzalo kaAbrahama inceku yayo,

lina bantwana bakaJakobe, okhethiweyo wayo.

14Yona iyiNkosi uNkulunkulu wethu;

iyawahlulela wonke umhlaba.

15Iyakhumbula isivumelwano sayo kuze kube nininini,

ilizwi eyalitsho yaliqinisa kuzo izizukulwana eziyinkulungwane,

16isivumelwano eyasenza loAbrahama,

isithembiso eyasenza kuIsaka,

17yasiqinisa kuJakobe saba yisimiso,

lakuIsrayeli saba yisivumelwano esingapheliyo,

18yathi; Ngizakukunika ilizwe laseKanani libe yisabelo sakho esiyilifa lakho.

19Obaba babeyingcosana,

yebo, bebalutshwana beyizihambi kulo,

20bazula kuzizwe ngezizwe,

besuka komunye umbuso besiya kwabanye abantu;

21kodwa kayivumelanga muntu ukubahlupha;

yakhuza amakhosi ngenxa yabo,

22yathi: Lingathinti abagcotshiweyo bami,

lingoni abaprofethi bami.

23Hlabelani eNkosini lina, mhlaba wonke,

litshumayele ukukhulula kwayo insuku ngensuku.

24Landisani ubukhosi bayo phakathi kwezizwe,

lemisebenzi yayo emangalisayo phakathi kwabantu bonke.

25Ngoba yinkulu iNkosi, ifanele ukudunyiswa kakhulu,

iyesabeka ukwedlula onkulunkulu bonke.

26Ngoba bonke onkulunkulu bezizwe bayizithombe;

kodwa iNkosi yenza amazulu.

27Udumo lobukhosi kuphambi kwayo,

amandla lentokozo kusendaweni yayo.

28Inikeni iNkosi, lina zizukulwana zezizwe,

inikeni iNkosi udumo lamandla.

29Inikeni iNkosi udumo olufanele ibizo layo,

lethani umnikelo lize phambi kwayo.

Ikhonzeni iNkosi, lambethe okungcwele,

30lithuthumele phambi kwayo, mhlaba wonke;

umhlaba wamiswa waqina, kawuyikunyikinyeka.

31Kawathokoze amazulu, lomhlaba ujabule,

abantu kabatsho phakathi kwezizwe ukuthi:

INkosi iyabusa.

32Kaluhlokome ulwandle lakho konke okukulo,

lamaganga athabe lakho konke okukuwo.

33Ng’khonake zizahlabela ngokuthokoza izihlahla zamahlathi phambi kweNkosi, ngoba iyeza ukwahlulela umhlaba.

34Bongani iNkosi ngoba ilungile,

uthando lwayo olungapheliyo lumi kokuphela.

35Lithi futhi:

Sikhulule, Nkulunkulu mkhululi wethu,

usibuthe usikhulule phakathi kwezizwe,

ukuba sibonge ibizo lakho elingcwele,

sithabe ekukudumiseni.

36Kayibongwe iNkosi, uNkulunkulu kaIsrayeli,

kusukela endulo kuze kube nininini.

Bonke abantu basebesithi: Kakube njalo! Kayibongwe iNkosi!

Labo abakhethelwa ukulondoloza umtshokotsho wesivumelwano

37UDavida wasebatshiya oAsafi lezihlobo zakhe phambi komtshokotsho wesivumelwano seNkosi ukukhonza khona njalonjalo njengokudingekayo insuku ngensuku;

38watshiya loObedi‐Edoma kanye lezihlobo zakhe ezingamatshumi ayisithupha lesificaminwembili. UObedi‐Edoma indodana kaJeduthuni loHosa babengabagcini bamasango.

39Watshiya uZadoki umpristi lezihlobo zakhe ezingabapristi phambi kweTabernakeli leNkosi endaweni ephakemeyo yokukhonzela eyayiseGibeyoni,

40ukuba banikele iminikelo yokutshiswa eNkosini phezu kwealtare lokutshisela iminikelo ekuseni lantambama njalonjalo, njengakho konke okulotshiweyo emlayweni weNkosi eyawulaya uIsrayeli.

41Babekanye laboHemani loJeduthuni labanye ababekhethiwe bamiswa ukubonga iNkosi ngothando lwayo olungapheliyo, olumi kuze kube nininini.

42OHemani loJeduthuni babelezimpondo lezigubhu zokuhlabelela, lezinto zokutshayela uNkulunkulu. Amadodana kaJeduthuni abekwa esangweni.

43Basebehambake bonke abantu baya emizini yabo, uDavida wabuyela ekhaya lakhe ukubusisa abomuzi wakhe.