1 Tesalonisensis Introduson - Portuguese Creole Bible, Guinea-Bissau

IntrodusonDipus di funda igreẑa di Fílipus, Paulu bai pa Tesalónika, utru prasa di Masedonia (At 17.1-9). I pirsigidu la, i pasa pa Bereia; di la i bai pa Atenas, na pruvinsia di Akaia, na sul. Di Atenas, Paulu manda Timótiu pa juda krentis di Tesalónika (3.1-3). Timótiu riba di la, i oja Paulu staba ja na Korintu (3.6; At 18.5), nunde ki purbita skirbi e karta. Krentis na sufriba pirsigison; utrus muriba ja; utrus na yandaba ku prigisa, pabia e na pera pa Jesus riba kualker dia. Paulu splika mas aserka di sugundu vinda di Jesus, i konsija krentis pa e pega tesu na tarbaju, pa e yanda diritu dianti di Deus, e ten pas na se metadi.