1 Kronikas 26 - Portuguese Creole Bible, Guinea-Bissau

Guardas di porton di templu

1Utru levitas e kujidu pa sedu porterus. Meselemias, fiju di Kore, di familia di Asaf, i kujidu na jorson di koraitas.

2Meselemias teneba seti fiju: Zakarias ku padidu purmeru, dipus Jediael, Zebadias, Jatniel,

3Elan, Joanan ku Elioenai.

4-5Obed-Edon2 Sam 6.10 teneba oitu fiju pabia Deus bensual. Si purmeru fiju seduba Semaias; dipus i padi Jeozabad, Joá, Sakar, Netanel, Amiel, Isakar ku Peuletai.

6Si fiju Semaias i padi fijus ku tenba otridadi na familia di se pape, pabia e seduba omis di kapasidadi.

7Se nomis sedu: Otni, Refael, Obed ku Elzabad, ku se ermons Eliu ku Semakias, tambi omis di kapasidadi.

8Esis tudu e sedu di familia di Obed-Edon; elis ku se fijus ku se ermons seduba sesenta i dus omi ku kapasidadi ku forsa pa ki tarbaju.

9Meselemias ku si fijus ku ermons seduba disoitu omi di kapasidadi.

10Osa, di familia di Merari, i pui si fiju Sinri pa i sedu ŝef, mesmu ki ka sedu purmeru fiju.

11I padi tambi Ilkias, Tebalias ku Zakarias. Tudu fijus ku ermons di Osa e sedu trezi.

12Porterus divididu na grupus, konformi se ŝefis. E dadu kargu di tarbaju na kasa di SIÑOR, suma se ermons.

13Sorti jugadu pa ŝefis di familia, garandis ku jovens, pa kada porton.

14Sorti di porton di lesti i paña Selemias. Dipus e juga sorti pa si fiju Zakarias ku sedu omi ku ta da bon konsiju; i paña porton di norti.

15Obed-Edon paña di sul; si fijus e paña kargu di guarda armazen.

16Supin ku Osa e paña portons di kaida di sol ku porton di Saleket, lungu di kamiñu di riba. Un guarda ta rindi si kumpañer.

17Seis levita ta staba na porton di lesti kada dia, kuatru kada dia na porton di norti, ku kuatru kada dia na porton di sul. Na armazen e ta staba dus dus na sirvis.

18Na kintal, pa ladu di kaida di sol, i tenba kuatru guarda lungu di kamiñu ku dus dentru di kintal.

19Esis i grupus di porterus kujidu di familia di koraitas ku familia di Merari.

Guardas di rikesas

20Utru levitas tenba konta di rikesas di kasa di Deus ku armazensKap 9.26-29; 28.12; Ne 10.38; Mal 3.10 di ofertas sagradu.

21Ladan, di familia di Jerson, i seduba ŝef di familia di si fiju Jeieli.

22Fijus di Jeieli, Zetan ku Joel, e tenba kargu di rikesas di kasa di Deus.

23Kargu i dadu tambi pa omis di familias di Anran, Izar, Ebron ku Uziel.

24Sebuel, di familia di Jerson, fiju di Moisés, i seduba ŝef di rikesas.

25Eliezer, ermon di Jerson, i padi Reabias, pape di Jesaias, pape di Joran, pape di Zikri, pape di Selomit.

26E Selomit ku si parentis e nkargadu di guarda ofertas sagradu ku rei Davi, ku ŝefis di familia, ku kapitons di mil ku di sen, ku utru ŝefis di tropa, dedika pa Deus,

27pabia e tira utru parti di kusas ke toma na gera, e dedikal pa i usadu na kasa di SIÑOR.

28Tudu ku anunsiadur Samuel dedika, ku Saul, fiju di Kis, ku Abner, fiju di Ner, ku Joab, fiju di Zeruia, es tudu staba guardadu na mon di Selomit ku si parentis.

Administraduris ku juisis

29Kenanias ku si fijus e kujidu na metadi di izaritas, e pudu riba di Israel pa tarbaju fora di templu, pa sedu administraduris ku juisis.

30Asabias ku si parentis, mil i setsentus omi di kapasidadi, e kujidu na metadi di ebronitas, e dadu kargu administrativu na Israel, na ladu di Jordon pa kaida di sol, pa tudu tarbaju di SIÑOR ku sirvis di rei.

31Jerijá seduba ŝef di ebronitas. Na anu 40 di renansa di Davi, jinti buska na reẑistu di familias di ebronitas; i ojadu na se metadi omis di kapasidadi ku staba na JazerNum 32.1 na tera di Jilead.

32Rei Davi kuji Jerijá ku dus mil i setsentus di si parentis, omis di kapasidadi, ŝefis di familia, i pui elis suma administraduris riba di rubenitas, gaditas ku metadi di jorson di Manasés, pa e trata di kusas di Deus ku kusas di rei.