Sirmonias 13 - Portuguese Creole Bible, Guinea-Bissau

Leis aserka di mpincu ku ta kamba

1SIÑOR fala Moisés ku Aron:

2“Si algin ten kau ku inca, o sinal branku sai na si peli, o i tene spiña, kusas ku pudi bin sedu mpincuLei 24.8 ku ta kamba, i ten ku lebadu pa saserdoti Aron o pa un di si fijus ku sedu saserdoti.

3Saserdoti ten ku jubi ki kau na si peli ku tene duensa; si kabelu di ki kau bida branku, tambi si duensa parsi mas fundu di ki peli, i sedu un koldadi mpincu ku ta kamba. Saserdoti, dipus di jubil, i ta diklaral impuru.

4Si ki kau na si peli sedu branku, ma i ka parsi mas fundu di ki peli, tambi kabelu di ki kau ka bida branku, saserdoti na pui ki duenti na un kau el sonNum 12.15 pa seti dia.

5Na setimu dia, saserdoti ten ku torna jubil. Si i oja kuma ki duensa sta na mesmu, i ka bai dianti, i na guardal el son pa mas seti dia.

6Na setimu dia, saserdoti na jubil utru bias. Si duensa disparsi na si peli, i ka bai mas dianti, saserdoti na diklaral puru; i un duensa kualker ku sai na si peli. Ki algin i na labaKap 14.8; 2 Re 5.10,12-14 si ropa, i na sedu logu puru.

7Si, dipus di saserdoti jubil i diklaral puru, ki duensa torna bai mas dianti na si peli, i ten ku bai mostral mas pa saserdoti.

8Saserdoti na jubil diritu. Si ki duensa bai mas dianti na peli, i na diklaral impuru. I sedu duensa di mpincu ku ta kamba.

9“Si algin ten mpincu ku ta kamba, i ten ku lebadu pa saserdoti,

10ku na jubil diritu. Si i ten kualker kau brankuSai 4.6; Num 12.10-12; 2 Re 5.27 ku inca, ku pui kabelu di ki kau bida branku, i ten tambi inflamason na ki kau ku inca,

11i sedu mpincu beju ku tarda ja. Saserdoti na diklaral impuru, ma i ka na fical na un kau el son, pabia i sedu ja impuru.

12“Si duensa sai na tudu parti di peli, konformi saserdoti pudi oja, i kubri tudu peli di duenti desdi kabesa te na pe,

13saserdoti na jubil diritu. Si mpincu kubri tudu si kurpu, i na diklara ki duenti puru. Suma ki bida tudu branku, i sta ja puru,

14ma na dia ku caga bin parsi nel, i na sedu impuru.

15Ora ku saserdoti oja ki caga, i na diklara si dunu impuru, pabia e caga i ka puru. I sedu mpincu ku ta kamba.

16Si ki caga muda pa branku, si dunu ten ku bai pa saserdoti.

17Kila na jubil diritu; si caga bida branku, saserdoti na diklaral puru. Asin i sta puru.

18“Si algin tene mandita na si peli, i bin san;

19kau ku mandita staba nel bin inca, i bida branku; o sinal branku jagasidu ku burmeju parsi, i ten ku bai pursenta dianti di saserdoti.

20Saserdoti na jubil diritu; si i bin parsi mas fundu di ki peli, tambi si kabelu di ki kau bida branku, saserdoti na diklaral impuru. I sedu mpincu ku sai na kau ku mandita staba nel.

21Ora ku saserdoti ojal, si kabelu branku ka ten na ki kau, nin i ka sta mas fundu di ki peli, ma i na disparsi ja, saserdoti na fical na un kau, el son, pa seti dia.

22Si i na bai dianti na peli, saserdoti na diklaral impuru. I sedu un duensa ku ta kamba,

23ma si ki sinal para na si lugar, i ka bai mas dianti, i sedu son sinal di mandita. Saserdoti na diklaral puru.

24“Si algin tene kemadura di fugu na si peli, si na ki kau ku kemaba i bin parsi sinal branku, o branku jagasidu ku burmeju,

25saserdoti ten ku jubi ki sinal. Si kabelu na ki kau bida branku, tambi ki sinal parsi mas fundu di ki peli, i mpincu ku sai na lugar di kemadura. Saserdoti na diklaral impuru, pabia i sedu mpincu ku ta kamba.

26Ma ora ku saserdoti jubil, si kabelu branku ka sta la, si sinal i ka mas fundu di ki peli, ma i disparsi, saserdoti na pul na un kau, el son, pa seti dia.

27Na setimu dia saserdoti ten ku jubil. Si i buri ciu na si peli, saserdoti na diklaral impuru. I sedu mpincu ku ta kamba,

28ma si ki sinal para na si lugar, i ka bai dianti na peli, ma i disparsi, i sedu inflamason di kemadura. Saserdoti na diklaral puru; i son sinal di kemadura.

29“Si omi o minjer tene caga na kabesa o na keŝada,

30saserdoti ten ku jubi ki caga diritu. Si i parsi kuma i sedu mas fundu di ki peli, tambi kabelu ku sta nel i amarelu, i finu, saserdoti na diklaral impuru; ki duensa na kabesa o na keŝada i mpincu ku ta kamba.

31Ora ku saserdoti jubi ki caga, si i ka parsi mas fundu di ki peli, si inda i ka ten kabelu pretu la, saserdoti ten ku fica ki duenti, el son, pa seti dia.

32Na setimu dia, saserdoti na jubi ki caga diritu. Si mpincu ka bai dianti, i ka tene kabelu amarelu, nin i ka parsi mas fundu di ki peli,

33kabelu na rapadu, ma i ka na rapadu na ki kau di mpincu. Saserdoti na fical, el son, pa mas seti dia.

34Na setimu dia, saserdoti na jubi ki mpincu diritu. Si i ka bai dianti na peli, i ka parsi mas fundu di ki peli, saserdoti na diklaral puru. Duenti na laba si ropa, i na sedu puru.

35Dipus di i diklaradu puru, si ki mpincu kontinua na buri na si peli,

36saserdoti na jubil mas. Si mpincu bai dianti na si peli, saserdoti ka pirsisa buska kabelu amarelu; ki algin sta impuru,

37ma si, na si uju, mpincu para, kabelu pretu kumsa na kirsi na ki kau, mpincu i san ja. Ki algin sta puru; asin saserdoti na diklaral puru.

38“Si omi o minjer bin tene sinalis branku na si peli,

39saserdoti na jubil. Si ki sinal i branku ma i na kumsa disparsi, i son mancas ku sai na peli; si dunu sta puru.

40“Si un omi pirdi kabelu, i fika karekadu, i sta puru na mesmu.

41Si i pirdi kabelu na parti di dianti di kabesa, i sta meiu-karekadu, ma i sta puru,

42ma si na ki parti karekadu, o na testa, i ten caga branku jagasidu ku burmeju, es i mpincu ku na sai na ki kau.

43Saserdoti ten ku jubil; si ki caga incadu na si kabesa o testa i branku ku burmeju suma mpincu di peli di kurpu,

44ki omi tene mpincu ku ta kamba; i sta impuru. Saserdoti na diklaral impuru pabia di ki caga na kabesa.

45“Ki algin ku tene mpincu i na bisti ropa rumpidu, i na yanda ku kabelu dispintiadu, i na kubriEz 24.17,22; Mik 3.7 boka, i na ba ta grita: ‘Impuru!Mis 4.15; Mat 8.2-3 Impuru!’

46Tudu tempu ki tene e duensa, i na fika impuru; i na mora el son, foraNum 5.2; 12.14-15; 19.3; 2 Re 7.3; 15.5; Luk 17.12 di kampamentu.

Leis aserka di lima

47“Kualker ropa di lan o di liñu i pudi bin bulura,

48suma kualker fiu ku ki ropa di lan o di liñu kumpudu ku el, o kualker kuru o kusa kumpudu di kuru.

49Si ki manca na ropa, na kuru, o na fiu ku ropa ta kumpudu ku el, o na kualker kusa kumpudu di kuru, i parsi kor verdi o burmeju, i sedu lima ku ta kamba; i ten ku mostradu pa saserdoti.

50Saserdoti na jubi ki manca diritu; i na pui kusa ku tenel na un kau el son pa seti dia.

51Na setimu dia i na torna jubil diritu. Si lima buri na ropa, o na liñu ku ropa tisidu ku el, o na kuru o kusa kumpudu di kuru, i sedu lima ku ta lastra; ki kusa i sta impuru.

52Ki ropa ten ku kemadu, o ki kusa kumpudu di kuru ku tene ki manca, pabia ki lima taKap 14.44-45 lastra. I ten ku kemadu ku fugu.

53“Ma ora ku saserdoti ojal, si ki manca ka buri na ropa o na liñu ku ropa tisidu ku el, o na kusa kumpudu di kuru,

54i na da ordi pa ki kusa ku tene manca pa i labadu. Dipus i na guardal na un kau el son pa mas seti dia.

55Dipus di i labadu, saserdoti na jubil diritu. Si manca ka muda si parsensa, nin si i ka buri, i sta impuru. Bu na kemal ku fugu, nin si lima paña un ladu o utru.

56Si saserdoti jubil, i oja kuma manca na disparsi dipus ki labadu, i na rumpi ki parti di ropa, o di kuru, o di fiu di liñu,

57ma si manca torna parsi na ropa, o na fiu ki kumpudu ku el, o na ki kusa di kuru, i sedu lima ku ta lastra. Ki kusa ku tene lima, bu na kemal ku fugu.

58Ropa o fiu di liñu ku ropa tisidu ku el, o kualker kusa di kuru ku bu laba, si ki manca sai nel, bu na labal sugundu bias; i na sedu puru.”

59Es i lei aserka di lima ku paña ropa di lan o di liñu, o fiu ki kumpudu ku el, o kualker kusa di kuru, pa mostra manera ki na diklaradu puru o impuru.