Ŝefis 15 - Portuguese Creole Bible, Guinea-Bissau

Sanson pui fugu na lugaris di filisteus

1Mas tardi, na tempu di kebur di trigu, Sanson leba un fiju di kabra pa bai visita si minjer. I fala pape di minjer: “N misti yentra na kuartu di ña minjer.” Si pape tujil yentra,

2i falal: “N kudaba kuma bu negal di un bias; e ku manda N da bu kumpañer el, ma si irmasiña i ka mas bonitu di ki el? Bu ta toma kila na si konta.”

3Sanson fala: “N ka na ten kulpa e bias si N fasi filisteus mal.”

4I bai paña trizentus raposa, i mara se rabus, dus dus, i mara paja na metadi di kada dus rabu;

5i pui fugu na paja, i larga raposas na lugar di filisteus. Asin i kema2 Sam 14.30 tudu maraduras di trigu ku kebradu, suma kil ku ka kebradu inda; i kema tambi ortas di uva ku di olivera.

6Oca ku filisteus punta kin ku fasi e kusa, e kontadu kuma i Sanson, pabia pape di si minjer, ki omi di Timnat, i toma si minjer i da si kumpañer. Filisteus bai kema ki minjer tudu ku si pape.

7Sanson fala elis: “Asin ku bo ta fasi! N ka na para tementi N ka vinga bos.”

8I ataka elis ku forsa, i mata manga delis. Dipus i bai fika na kaverna di roca di Etan.

Sanson ngaña filisteus

9Filisteus bai pui se kampamentu na Judá, e bai te Leí.

10Jinti di Judá punta elis: “Pabia di ke ku bo bin geria kontra nos?” E ruspundi elis: “No bin pa bin mara Sanson, pa no fasil manera ki fasinu.”

11Asin tris mil omi di Judá bai pa ki koba garandi di roca di Etan, e bai fala Sanson: “Nta bu ka sibiba kuma filisteus domina riba di nos? Jubi ke ku bu fasinu!” Sanson ruspundi elis: “Manera ke fasin, asin tambi ku N fasi elis.”

12E falal: “No bin marau pa bai ntregau na mon di filisteus.” Sanson fala elis: “Bo jurmenta si i ka abos propi ku na matan.”

13E falal: “I sta bon; no na marau son, no ntregau na se mon, ma no ka na matau.” Asin e maral ku dus korda nobu, e lebal.

14Oca ki na bin pa Leí, filisteus bin pa dal kontrada, e na grita ku kontentamentu, ma Spiritu di Deus bin riba delKap 3.10; 16.9,12 ku forsa; ki kordas ki teneba na mon e bida suma fius di liña ku na kemaba na fugu. Asin e sapa na si mon.

15I oja un os di keŝada di buru ku ka muitu tarda ki muri; i tomal, i mata mil omi ku el.

16Dipus Sanson kanta e kantiga:

“Ku os di keŝada di buru

N fasi monton riba di monton!

Ku os di keŝada di buru

N mata mil omi!”

17Oca ki kaba kanta, i bota ki keŝada di buru; ki kau bin comadu Ramá-Leí, ku signifika monti di Keŝada.

18Manera ki teneba sedi di yagu dimas, i coma SIÑOR i falal: “Bu da bu servu e garandi vitoria. Nta N na bin muri gora ku sedi di yagu, pa N bin kai na mon de jinti ku ka sirkunsidadu?”

19SIÑOR yabri koba ku staba na Leí; yagu sai nel. Sanson bibi; si forsa riba; i sinti mas vida. E ku manda ki fonti pudu nomi di fonti di kil ku na coma; i sta na Leí te aos.

20Sanson manda na Israel vinti anu na tempu di filisteus.