Atus 27 - Portuguese Creole Bible, Guinea-Bissau

Paulu mbarkadu pa Roma

1Oca i rezolvidu pa no mbarka pa Itália, e ntrega Paulu ku utru prezus na mon di un kapiton di soldadus ku comadu Júliu, ku pertensiba kompañia di Agustu.

2No mbarka na un barku di Adramítiu ku na pantiba na purtus di Asia; no larga. I staba ku nos AristarkuKap 19.29 di Tesalónika di reẑion di Masedonia.

3Sol mansi, no ciga na Sidon. Júliu trata Paulu ku bondadi, i disalKap 24.23 pa i bai jubi amigus, pa e pudi dal ke ki pirsisa.

4No rinka di la. Suma bentu staba forti kontra nos, no bai ngostadu tras di jiu di Ŝipri.

5Oca ku no kortela mar lungu di Silísia ku Panfília, no ciga Mira, prasa di Lísia.

6La kapiton oja un barku di Alesandria ku na baiba pa Itália; i mbarkanu nel.

7No bai divagar manga di dia; ku garandi kansera no ciga pertu di Nidu. Bentu ka disanu bai mas dianti; no bai ngostadu tras di jiu di Kreta, pertu di Salmoni.

8No ngosta ku kansera, no ciga na un lugar ku comadu Bon Purtu, pertu di prasa di Laseia.

9No pirdiba ja manga di tempu; junjun di dia di sakrifisiuSir 16; 23.26-31 pa purdon di pekadu i pasa. Suma ku tempu tornaba ja mau pa yanda na mar, Paulu konsija elis,

10i fala: “Siñoris, N oja kuma no bias di li pa dianti i na bida pirigosu, ku manga di danu, i ka son di kargu ku barku, ma tambi ku no vida.”

11Ma Júliu, te pa i fia na kil ku Paulu fala, i mas fia na kapiton di barku, ku si dunu.

12Suma ku ki purtu i ka bon ba pa pasa cuba, mas parti di jinti staba a fabur di sai di la pa jubi si e ta pudi ciga na Feniŝ, un purtu di Kreta ku ta oja pa ladu di bentu di Afrika ku di Koru, pa e pudi pasa cuba la.

Turbada na mar

13Bentu fresku na supraba di ladu di sul. E kuda kuma e na yangasa ke ke misti, e tira fundiadera, e bai ku vela, e fika e na ngosta pertu di Kreta.

14I ka tarda i lanta un turbada garandi ku comadu euru-akilon, na ladu di jiu.

15I rabata barku; suma ku no ka pudi bai kontra bentu, no disal pa i leba barku.

16Oca no na bai ngostadu tras di jiusiñu ku comadu Klauda, la ku no oja garandi kansera pa salba boti.

17Dipus ke isal pa barku, e fasi tudu jitu ke pudi pa rodia korda na barku. E tenba medu pa ka e nkaja pertu di Sirti; e rianta vela, e disa barku bai ku bentu.

18Sol mansi; suma ku turbada sutanu ku forsa, e bota karguJona 1.5 na mar.

19Na terseru dia e bota utru armason di barku na mar ku se mon propi.

20Pa manga di dia no ka pudi oja nin sol nin strela. Ki turbada forti i na sutanu kada bias mas, tok no pirdi speransa di salba.

21Dipus di manga di dia ku ningin ka kume nada, Paulu sikidu na se metadi, i fala elis: “Amigus, bo dibi di obiba ña konsiju pa ka sai di Kreta, pa libraba de danu ku perda,

22ma gosi N na konsija bos pa bo ten koraẑen, pabia nin un di bos ka na pirdi vida. Son barku ku na pirdi.

23E di noti li un anju di ña Deus ku N sedu del, ku N ta adora, i staba lungu di mi,

24i falan: ‘Paulu, ka bu medi; bu ten ku pursentadu dianti di reiKap 23.11 garandi. Bu pudi ten sertesa kuma Deus dau vida di tudu e jinti ku sta ku bo na bias.’

25Asin, amigus, bo ten koraẑen, pabia N fia na Deus kuma i ten ku seduNum 23.19; Luk 1.45; Rom 4.20-21; Titu 1.2 suma ku N kontadu,

26ma i pirsis pa no bai nkaja na unKap 28.1 jiu.”

27Oca ki tenba ja katorzi dia, bentu inda na lebanu pa kada ladu di Mar Adriátiku. Na banda di me-noti mariñerus diskunfia kuma no sta pertu di tera.

28E sonda, e oja vinti brasu. No pasa mas dianti un bokadu; e torna sonda, e oja kinzi brasu.

29Ku medu pa ka maja na pedra, e bota kuatru ferus di fundia na popa; e pera ku faimadesa pa sol mansi.

30Mariñerus na buskaba kuri di barku; e largaba ja boti na mar, e na finji kuma e na bota ferus di fundia di prua.

31Paulu fala kapiton Júliu ku soldadus: “Si e mariñerus ka fika na barku, bo ka na pudi salba.”

32Soldadus korta korda di boti, e disal i kai.

33Oca sol na mansi, Paulu ngoda elis tudu pa e kume un kusa. I fala elis: “Aos fasi katorzi dia ku bo fika sin kume nada; bo na pera son, bo ka pui nada na boka.

34Asin N pidi bos pa bo kume kualker kusa, pa bo pudi tene saudi. Nin un kabeluLuk 12.7; 21.18 ka na kai na kabesa di nin un di bos.”

35Oca i fala asin, i toma pon, i fala DeusMat 15.36 obrigadu dianti di tudu, i kebral, i kumsa na kume.

36Asin elis tudu sinti koraẑen, e kumsa na kume tambi.

37Anos tudu na barku no seduba 276 jinti.

38Dipus de kume, e farta, e bota trigu na mar pa lebia barku.

Fogansa di barku

39Oca ku sol mansi, e ka rapara tera, ma e oja un bokana ku teneba praia. E misti jubi si e pudi nkajanta barku la.

40E dismanca ferus di fundia, e larga elis na mar; e larga tambi maraduras di lemi. E isa vela garandi di prua, e pui barku bai pa praia.

41E ciga na un banku nunde ku dus korenti di yagu ta kontra. Barku nkaja la. Prua yentra dentru di banku, i ka pudi bulbuli, ma forsa di maron na pajiga popa.

42Soldadus kuda pa mata tudu prezus, antis de bin nada e kuri,

43ma se kapiton mistiba libra Paulu; i tuji elis fasi ke ke na fala. I manda pa kilis ku sibi nada pa e kai purmeru na yagu pa e yangasa tera;

44restu pa e pega na tagua o na utru parti di barku. Asin ke salba tudu, e ciga na tera.