Daniel Introduson - Portuguese Creole Bible, Guinea-Bissau

IntrodusonNa anu 605 aK (antis di Kristu), Daniel ku si tris amigu e lebadu pa Babilonia ku purmeru grupu di katibus; e ngaña bon pusison na palasiu, ma e manti se fe na Deus, e nega adora idulus o kume karni di ronia. Deus da Daniel jiresa pa splika dus suñu di rei Nabukodonosor (kapitulus 2 ku 4). I rei propi ku skirbi kapitulu 4, i da si tustumuñu.I parsi kuma, antis di tempu di rei Belsazar, Daniel pirdi si lugar suma ministru, o talves i raforma. Dipus di Nabukodonosor, i tenba mas kuatru rei antis di Belsazar yentra na renansa. Daniel, ku fasiba ja manga di anu na Babilonia, i oja un vison di limarias (kap. 7) ku konfirma ki suñu ki splikaba rei Nabukodonosor na kapitulu 2, kuma utru nasons tenba ku lanta e toma puder. No ntindi gosi kuma i sedu Media ku Persia, Gresia ku Roma. Dipus di dus anu, Daniel oja utru vison (kapitulu 8). Anju Gabriel bin splikal (v 20-21) kuma Media ku Persia na ten forsa na mundu, ma un rei di Gresia na bin ngañal. Na ultimu noti di imperiu di Babilonia, dedus bin skirbi na paredi na kasa di rei. Daniel yentra, i splika ki palabras, i fala kuma medus ku persas na bin toma konta di renu. Asin ki kontisi ki di noti propi. Na kapitulu 6 no oja kuma ku Daniel ribantadu pa un pusison di puder na renu.Daniel lei na libru di Jeremias kuma Deus na ribanta si pobu pa Judá ora ke kompleta 70 anu na Babilonia. I pega tesu na orason ku junjun; i staba inda di vida na purmeru anu di rei Siru, pa oja rasposta di orason (10.1; Esd 1.1).Deus kontinua mostral visons aserka di imperiu gregu ku tenba ku bin, tambi aserka di tempu di kabantada.