Romanus Introduson - Portuguese Creole Bible, Guinea-Bissau

IntrodusonPaulu skirbi e karta, na anu 57 o 58, pa igreẑa di Roma ku pudiba tene si rais na dia di Pentekostis (At 2.10). Nunka i ka baiba la, ma i mistiba visita elis, pa pasa pa Spaña. Oca ki staba na Korintu, pruntu pa riba pa Jerusalen dipus di si terseru bias, i purbita manda karta na mon di un minjer krenti comadu Febe, di Senkreia, purtu di Korintu (15.22—16.2). Oca ki ciga na Jerusalen, i prindidu. Son dipus di tris anu ki ciga na Roma, suma prezu.E karta, utru ora i ta comadu Konstituison di Kristianismu. Purblemas tenba na manga di igreẑa; utru judeus mistaba pa krentis di tudu rasa kumpri tudu lei di Moisés. Ki krentis di Roma staba na prasa mas importanti di mundu na ki tempu; Paulu mistiba pa e ntindi palabra di Deus diritu, pa e sibi kuma Deus ta fasi algin justu si dianti son pa fe (1.17). I mostra kuma tudu jinti, judeus ku jintius, e pirsisa di purdon di se pekadu, pa e sedu justu dianti di Deus. Es i pudi fasidu son pa fe na Jesus Kristu (kapitulus 1-4). Krenti ta risibi nobu vida na Kristu, i ta sta libri di puder di pekadu ku di mortu (5—8). Dipus, na kapitulus 9 ku 11, Paulu ta splika aserka di Israel na planu di Deus. Di 12.1 pa dianti, i ta fala di manera ku krenti dibi di vivi. “Kil ku ama si kumpañer i kumpri lei.” (13.8) Na kapitulu 16 i manda manteñas pa manga di jinti, suma algin ku sta na Gine, ku nunka ka bai Lisboa, i pudi tene manga di amigu la, i manda elis manteña.