Ŝefis 19 - Portuguese Creole Bible, Guinea-Bissau

Un levita ku si kumadri

1Na ki tempu, oca ki ka tenba inda rei na Israel, i tenba un omi levita ku moraba na un kau na matu na montaña di Efrain. I ranja un kumadri na BelenKap 12.8 di Judá,

2ma kila paña raiba del, i riba pa kau di si pape na Belen di Judá, i bai fika la kuatru mis.

3Si omi leba un rapas ku dus buru, i bai tras di minjer pa bai ngodal pa i riba ku el. Minjer lebal pa kasa di si pape. Oca si pape ojal, i fika kontenti, i risibil diritu,

4i nsisti pa i pudi fika la. I fika tris dia; e na kume, e bibi, e na durmiba la.

5E lanta sedu na kuartu dia; levita purpara pa bai, ma pape di minjer falal: “Kume un bokadu di pon, pa bu pudi fika mas forti; dipus bo ta bai.”

6Asin ki dus omi sinta e kume juntu, e bibi. Pape di minjer fala omi: “Ten pasensa, bu ta pasa mas e di noti li, bu divirti.”

7Ma omi lanta pa bai; pape di si minjer ngodal pa i pasa noti la.

8Na kintu dia i mandurga pa bai. Pape di minjer falal: “Ba ta kume un kusa, bu pera te di tardi.” Asin elis dus e torna kume juntu.

9Dipus, omi lanta pa bai, ku si kumadri, ku si rapas. Si sogru, pape di minjer, falal: “Sol na kai ja; i tardi dimas. Ten pasensa, bu ta pasa noti li, bu divirti. Amaña bu ta mandurga, bu bai bu kamiñu pa bu kasa.”

10Ma omi ka misti pasa noti la; i lanta, i bai ku si kumadri, ku si dus buru kargadu; e ciga lungu di Jebus, ku sedu Jerusalen.

11Oca ke na ciga la, sol na kaiba ja. Rapas fala si mestre: “Bin no panti ne prasa di jebuseus pa no pasa noti la.”

12Si mestre falal: “No ka na panti na un prasa di stranjerus ku ka sedu di fijus di Israel, ma no pasa pa dianti

13tok no ciga na JibeáJos 18.28 o na Ramá; no ta pasa noti na un di ki lugaris.”

14E pasa dianti, e na yanda pa bai. Sol kai oca ke pertu Jibeá, ku sedu un prasa di Benjamin.

15E panti na Jibeá pa bai pasa noti la, e bai sinta na kau publiku na metadi di prasa, ma ningin ka rukuji elis na kasa pa pasa noti.

16Jinti di ki prasa seduba di jorson di Benjamin. Ki di noti un omi beju, di montaña di Efrain, ku moraba na Jibeá, i na binba di si tarbaju na matu.

17I oja ki ospri na kau publiku di prasa, i puntal: “Nunde ku bu na bai? Nunde ku bu sai?”

18I ruspundil: “No sta na kamiñu di Belen di Judá pa un kau na matu na montaña di Efrain, di nunde ku N sedu, pabia N baiba Belen di Judá, ma gosi N na bai pa kasa. Ningin ka kumbidan pa si kasa.

19No tene paja ku kumida pa no burus, ku pon ku biñu pa mi, pa es bu servu ña kumadri, tambi pa e rapas ku bin ku bu servus. Nada ka faltanu.”

20Omi beju falal: “Bu pudi bin pa ña kasa.Rom 12.13; Eb 13.2; 1 Ped 4.9 N na dau tudu ku faltau, ma bu ka pudi pasa noti ne kau publiku.”

21I lebal pa si kasa, i da kumida pa si burus. E laba pe, e kume, e bibi.

22Oca ke na divirti, omis malvadu di ki prasa da volta di kasa, e na maja porta, e fala omi beju, dunu di kasa: “Tira pa fora ki omi ku yentra na bu kasa, pa no pudi ditaKum 19.4-8; Sir 18.22; Os 9.9; 10.9 ku el.”

23Dunu di kasa sai i fala elis: “Nau, ña ermons, ka bo fasi e kusa mau asin. Suma ku e omi sedu ña ospri, ka bo fasi e diskarna.

24Ali ña fiju femia ku sedu inda bajuda, ku kumadri de omi; N ta tira elis fora; bo ta toma elis, bo fasi ke ku bo misti ku elis, ma ka bo fasi diskarna pa e omi.”

25Ki omis ka seta obi. Ki levita toma si kumadri, i tiral pa fora. E dita ku el, e abusa nelJer 5.7-8; Ef 4.19 te mandrugada.

26Oca sol na mansi, minjer bai i kai na porta di kasa di ki omi, nunde ku si omi staba; i fika la tok kau klaru.

27Si omi lanta parmaña, i yabri porta di kasa pa kontinua si kamiñu; i oja si kumadri ditadu na porta di kasa, ku si dus mon na entrada.

28I falal: “Lanta no bai.” Ma i ka ruspundi. I pul riba di buru, e bai pa si kasa.

29Oca ki ciga na si kasa, i toma faka, i pega si kumadri, i sapa-sapal na dozi padas; i manda elis1 Sam 11.7 pa tudu parti di Israel.

30Kada kin ku oja ki kusa i ta falaba: “Nunka kusa suma es ka fasidu, nin i ka ojadu, disna ku fijus di Israel sai di tera di Ejitu te aos. Bo pensa diritu ne kusa, bo kontaKap 20.7; Dit 11.14 ke ku no dibi di fasi.”