2 Samuel 18 - Portuguese Creole Bible, Guinea-Bissau

Mortu di Absalon

1Davi rapati omis ku staba ku el, i pui kapitons riba di grupus di mil ku sen.

2Dipus i rapati elis na tris grupu, un grupu bas di Joab, utru bas di Abisai, ermon di Joab, fiju di Zeruia, utru bas di ki jiteu Itai.Kap 15.19-22 Rei fala tropas: “Ami tambi N na bai ku bos.”

3Ma e falal: “Bu ka na bai, pabia si no ten ku kuri, e ka na mporta ku nos; nin si metadi di nos muri e ka na liga, ma abo, bu bali des mil di nos. I minjor bu fika na prasa pa mandanuSai 17.10-12 sakur.”

4Davi fala elis: “N na fasi kil ku bo oja i bon.” Asin rei fika na ladu di porton oca ku tudu tropas na sai na grupus di sentenas ku di milyaris.

5Rei da ordi pa Joab ku Abisai ku Itai, i fala elis: “Pa amor di mi, ka bo trata rapas Absalon mal.” Tudu tropas obi oca rei na da tudu ŝefis ordi aserka di Absalon.

6Asin tropas sai e bai pa kampu di gera pa kontra ku Israel, e geria na matu di Efrain.

7La tropas di Davi ngaña tropas di Israel. Jinti muri ciu na ki dia, serka di vinti mil,

8pabia gera laga na tudu ladu di ki kau. Kilis ku muri pabia di matu i mas ciu di ki kilis ku spada mata.

9Utru omis di Davi bai kontra ku Absalon ku na yandaba montadu na un mulu. Oca ki yentra bas di un karvaju garandi ku ciu ramu, kabesa ngata na karvaju; mulu kontinua na yanda pa dianti; Absalon fika pindradu na metadi di seu ku con.

10Un omi ku ojal bai konta Joab, i falal: “Ala N oja Absalon pindradu na un karvaju.”

11Joab punta ki omi ku kontal: “Pabia di ke ku bu ojal, bu ka matal logu, bu batil na con? Asin N ta dauba des mueda di prata ku un sintu.”

12Ki omi fala Joab: “Nin ku N dadu mil mueda di prata na mon, N ka na lantanda ña mon kontra fiju di rei, pabia no obi diritu oca rei da ordi pa bo ku Abisai ku Itai, i fala pa kada un di bos toma sintidu, pa amor del, pa ka fasi rapas Absalon mal.

13Si N disobdisiba rei, N ta puiba ña vida na pirigu; rei ten ku sibi, pabia i ka ta sukundidu nada; abo propi bu na staba kontra mi.”

14Joab falal: “N ka na pirdi tempu ku bo!” I toma tris fleŝa, i fidi Absalon ku elis na ladu di korson, oca ki staba inda bibu na karvaju.

15Des rapas ku ta lebaba feramentu di gera di Joab e da volta di Absalon, e kabanta matal.

16Joab toka korneta; tropas para serka Israel pabia Joab paranta elis.

17E toma kurpu di Absalon, e botal na un koba garandi na matu, e lantanda un garandi monti di pedraJos 7.26; 8.29 riba del. Tudu Israel kuri, kada kin pa si kau.

18Oca ku Absalon bibu ba inda, i lantanda un pilar1 Sam 15.12 pa el, na kobonKum 14.17 di rei, pabia i fala kuma i ka tene nin un fiju macuKap 14.27 pa kontinua si nomi. I coma ki pilar ku si propi nomi. Asin i ta comadu Pilar di Absalon te aos.

Davi cora si fiju

19Aimaaz, fiju di Zadok, fala: “Disan kuri pa konta rei kuma SIÑOR libral ja na mon di si inimigus.”

20Joab falal: “Aos bu ka na sedu kontadur di rekadu; utru dia bu ta lebal, ma aos bu ka na lebal pabia fiju di rei muri.”

21Joab rabida i fala Kusi: “Bai, bu konta rei kil ku bu oja.” Omi mpina dianti di Joab, i kuri.

22Aimaaz, fiju di Zadok, nsisti ku Joab, i falal: “Kualker manera, disan tambi N kuri tras di Kusi.” Joab puntal: “Ña fiju, ke ku bu misti bai pa el? Bu ka tene noba ku bu na oja premiu ku el.”

23Aimaaz fala: “Tudu manera, N misti kuri.” Joab falal: “Nta kuri.” Aimaaz kuri pa kamiñu di terenu rasu di Jordon, i jumna Kusi.

24Davi staba sintadu na metadi di porton di fora ku kil di dentru. Sintinela subi riba di si kasasiñu2 Re 9.17-20; Ez 33.1-9 ku sta lungu di mura, i yalsa uju, i oja un omi ku na kuri, el son.

25Sintinela coma rei, i kontal. Rei falal: “Si i na bin el son, i na tisi noba.” Ki algin bin tok i na pertu.

26Dipus, sintinela oja utru omi ku na kuri; i coma guarda di porton i falal: “Ala utru omi na kuri pa bin, el son.” Rei fala: “Es tambi i na tisi noba.”

27Sintinela fala: “Parsin kuma ki purmeru na kuri suma Aimaaz, fiju di Zadok.” Rei fala: “Kila i bon omi; i na bin ku bon1 Re 1.42 noba.”

28Aimaaz yalsa fála i fala rei: “N tisi noba di pas.” I mpina dianti di rei ku rostu na con, i falal: “No ngaba SIÑOR bu Deus ku ntrega omis ku lanta kontra Ñu Rei!”

29Rei puntal: “Tudu sta bon ku rapas Absalon?” Aimaaz falal: “Na ki ora ku bu ŝef Joab na mandan, N oja un garandi jumbulumani, ma N ka sibi i ke.”

30Rei falal: “Pasa, bu pera li ne ladu.” Asin i pasa, i firma na ki ladu.

31Kusi ciga, i fala: “N tene bon noba pa Ñu Rei. Aos SIÑOR librau di tudu kilis ku lanta kontra bo.”

32Rei punta Kusi: “Tudu sta bon ku rapas Absalon?” Kusi falal: “I bon pa inimigus ku tudu jinti ku lanta kontra Ñu Rei pa fasil mal pa e sedu1 Sam 25.26; Dan 4.19 suma ki rapas!”

33Rei fika tarpajadu, i subi pa kuartu ku staba riba di porton, i na cora pa bai, i na fala: “Ña fiju Absalon, ña fiju! Ña fiju Absalon! I bon ba pa N muri na bu konta, Absalon, ña fiju, ña fiju!”