Saida 5 - Portuguese Creole Bible, Guinea-Bissau

Moisés ku Aron papia ku Faraó

1Dipus, Moisés ku Aron bai pa Faraó, e falal: “Es i palabra di SIÑOR Deus di Israel: ‘Larga ña pobu pa e bai fasin festival na lala.’ ”

2Faraó punta: “Kin ki e SIÑORJo 21.15 ku N na obdisi si ordi pa N larga Israel? N ka kunsi e SIÑOR, nin N ka na largaJer 44.16-17 Israel.”

3Elis e falal: “Deus di ebreus i bin pa nos; pa kila, disanu bai bias di tris dia na kamiñu pa lala pa fasi sakrifisius pa SIÑOR. Si no ka fasi asin, i na bin kastiganu ku duensa o ku spada.”

4Rei di Ejitu fala elis: “Moisés ku Aron, ke ku manda bo na para pobu di se tarbaju? Bo bai pa ke ku bo dibi di fasi.

5Abos bo mas ciu di ki nos, ma bo na pui elis pa e para tarbaju!”

Faraó kastiga israelitas

6Na ki mesmu dia Faraó da ordi pa kapatasis ku ŝefis di tarbaju, i fala elis:

7“Di li pa dianti bo para da pobu paja pa kumpu tiẑolus; bo disa elis e bai buskal ku se mon propi,

8ma bo na iziẑi elis pa e fasi mesmu numeru di tiẑolus ke tarda ta fasi. Ka bo menusa nin un son, pabia e prigisosu; e ku manda e na grita, e na fala: ‘No bai sakrifika pa no Deus!’

9Bo pui ki omis tarbaju mas duru, pa e fika okupadu nel, pa e ka pui sintidu na palabras di mintida.”

10Kapatasis ku ŝefis di tarbaju e bai pa pobu e fala: “Faraó fala kuma i ka na da bos paja;

11pa bo bai, abos propi, pa buska paja nunde ku bo pudi ojal. Ma numeru di tiẑolus ku bo na fasi i ka na menusadu.”

12Asin pobu spaja pa tudu ladu di Ejitu pa kuji restus di paja na lugaris di miju, pa i pudi sirbi suma ki bon paja ke ta kumpu tiẑolus ku el.

13Kapatasis perta elis, e fala: “Bo fasi mesmu numeru di tiẑolus kada dia, suma ku bo ta fasiba oca bo ta dadu paja.”

14Kapatasis di Faraó e suta ŝefis di Israel ke kujiba pa e toma konta di tarbaju, e punta elis: “Ke ku manda bo ka fasi, aonti ku aos, mesmu numeru di tiẑolus ku bo tarda ta fasi?”

15Ŝefis di Israel bai keŝa nunde Faraó, e puntal: “Ke ku manda bu trata bu servus de manera?

16Bu servus ka na dadu paja, ma e na falanu: ‘Bo fasi tiẑolus!’ Bu servus na sutadu, ma i bu pobu propi ku ten kulpa.”

17Faraó fala elis: “Abos i prigisosu! Abos i prigisosu! E ku manda bo na fala pa bo disadu pa bai sakrifika pa SIÑOR.

18Bo bai pega tarbaju! Paja bo ka na dadu, ma bo ten ku fasi mesmu numeru di tiẑolus.”

19Asin ŝefis di fijus di Israel e oja kuma e sta ku garandi purblema, manera ke faladu kuma e ka na menusadu numeru di tiẑolus ke ta fasiba kada dia.

Israelitas keŝa di Moisés ku Aron

20Oca e sai nunde Faraó, e kontra ku Moisés ku Aron ku na pera elis.

21E fala elis: “SIÑOR na jubi pa bos, i na julga bos, pabia bo pui no na cera mal dianti di Faraó ku si ŝefis. Bo da elis spada na mon pa matanu.”

22Moisés riba pa SIÑOR i puntal: “SIÑOR, ke ku manda bu fasi mal pa e pobu? Pabia di keAb 1.3 ku bu mandan?

23Disna ku N bai pa Faraó pa fala na bu nomi, i maltrata e pobu. Bu ka fasi nada pa libra bu pobu!”