Markus 14 - Portuguese Creole Bible, Guinea-Bissau

Planu di saserdotis(Mat 26.3-5; Luk 22.1-2; Jon 11.45-53)

1I faltaba dus dia pa Paskua, ki festival ke ta kumeba pon sin fermentu. Ŝefis di saserdoti ku pursoris di lei e na buskaba manera di prindi Jesus sukundidu di pobu, pa e matal.

2E fala: “I ka dibi di sedu na ora di festival, pa ka pui pobu lanta ku baruju.”

Jesus purfumadu pa nteru(Mat 26.6-13; Jon 12.1-8)

3Jesus staba na Betânia, na kasa di Simon ku teneba mpincu. Oca i sinta na mesa, un minjer yentra ku un jaru kumpudu di un pedra lebi ku ta comaduLuk 7.37 alabastru, ku teneba dentru del un purfumu puru, karu dimas, kumpudu di un planta ku ta comadu nardu. I kebra jaru pa yabril, i darma purfumu riba di kabesa di Jesus.

4Utru jinti ku staba la e paña raiba, e punta ŋutru: “Ke ku manda i dana purfumu?

5I pudiba bindidu pa mas di ki trizentus mueda di prata, pa da koitadis.” E papia risu kontra minjer.

6Jesus fala elis: “Bo disal. Pa ke ku bo na kansal? I fasi un bon kusa pa mi.

7Sempri bo na tene koitadisLei 15.11 ku bos. Bo pudi juda elis ora ku bo misti, ma ami, i ka sempri ku bo na tenen.

8El i fasi kil ki pudi. I jumna i pui purfumuKap 16.1; Jon 19.40 na ña kurpu pa ña nteru.

9N na konta bos bardadi kuma, na tudu parti di mundu ku Bon Noba na kontadu, kusa ku e minjer fasi i na kontadu tambi, pa si lembransa.”

Falsiamentu di Judas(Mat 26.14-16; Luk 22.3-6)

10Judas Iskariotis, un di ki dozi disipulu, i bai pa ŝefis di saserdoti pa ntrega elis Jesus.

11Oca ke obi ke ki fala, e kontenti, e fala e na dal diñeru. Judas kumsa montia tempu pa ntrega Jesus.

Ultimu sia di Jesus ku si disipulus(Mat 26.17-30; Luk 22.7-23; Jon 13.21-30; 1 Kor 11.23-29)

12Na purmeru dia di festival di pon sin fermentu, oca judeus na mataba karnelsiñu pa Paskua,Sai 12.1-36; Sir 23.5 disipulus di Jesus puntal nunde ki misti pa e bai purpara sia di Paskua pa e kume.

13I manda dus di si disipulus, i fala elis: “Bo bai na prasa; un omi ku karga puti di yagu i na kontra ku bos. Bo bai si tras.

14Kau ki yentra nel, bo ta fala dunu di kasa: ‘Mestre manda puntau na kal sala ki na kume sia di Paskua nel ku si disipulus.’

15I na mostra bos un sala garandi na purmeru andar, tudu pruntu ku mobilia. Bo purpara sia la.”

16Si disipulus sai, e bai prasa, e oja tudu suma ki fala elis; e purpara sia di Paskua.

17Oca sol na noti, Jesus ciga ku si dozi disipulu.

18Oca ke sinta na mesa, e na kume, Jesus fala elis: “N na konta bos bardadi, un di bos ku na kume ku mi i na falsian.”

19E kumsa na fika tristi. Kada kin na puntal: “Nta i ami, Siñor?”

20Jesus ruspundi, i fala elis: “I un di bos dozi ku na moja pon juntu ku mi na pratu.

21Na bardadi, Fiju di omi na muri, suma ku Skritura fala del, ma koitadi di ki omi ku na falsia Fiju di omi! I ta minjor pa ki algin si i ka padiduba.”

22Oca ke na kume, Jesus toma pon, i fala Deus obrigadu, i kebral, i da elis, i fala: “Bo toma; es i ña kurpu.”

23Dipus i toma kopu, i fala Deus obrigadu, i da elis; e bibi nel tudu.

24I fala elis: “Es i ña sangi, sangi di kontratu, ku darmadu pa manga di jinti.

25N na konta bos bardadi, N ka na bibi mas biñu di uva te ki dia ku N na bibi biñu nobu na renu di Deus.”

26Dipus ke kanta kantiga, e sai, e bai pa monti di Olivera.

Pedru avisadu(Mat 26.31-35; Luk 22.31-34; Jon 13.36-38)

27Jesus fala elis: “Abos tudu bo na disan, pabia i sta skritu kuma Deus fala i na mataZak 13.7 bakiadur; karnelis na pajiga.

28Dipus ku N lantandadu di mortu, N na bai bo diantiKap 16.7 pa Galileia.”

29Pedru ruspundi, i falal: “Nin ku tudu disau, ma ami, nunka N ka na disau.”

30Jesus falal: “N na kontau bardadi, e di noti, antis di galu kanta dus bias, bu na fala tris bias kuma bu ka kunsin.”

31Pedru ruspundil ku mas forsa: “Nin ki pirsis pa N muri ku bo, di nin un manera N ka na negau!” Tudu utrus fala tambi asin.

Jesus ora na Jetsemane(Mat 26.36-46; Luk 22.39-46; Jon 18.1)

32Oca i ciga na un lugar ku comadu Jetsemane, Jesus fala si disipulus: “Bo sinta li nkuantu N na bai ora.”

33I bai ku Pedru, Tiagu ku Jon. I kumsa na sinti tristesa meduñu.

34I fala elis: “Ña korson sta tristiJon 12.27 dimas, kuas pa muri. Bo fika li, bo ba ta bisia.”

35I bai mas dianti un bokadu, i kai mborkadu na con, i pidi si Pape, si i pudi sedu, pa i libral di ki ora.

36I fala: “Ña Pape,Rom 8.15; Gal 4.6; Eb 5.7 bu pudi tudu. Lunjusi di mi e kopu di sufrimentu, ma i ka na manera ku ami N misti, ma sumaJon 5.30; 6.38 ku bu misti.”

37Dipus i riba, i oja disipulus na durmi. I punta Pedru: “Simon, nta bu na durmi? Bu ka pudi fika kordadu, nin si i un ora?

38Bo toma sintidu, bo ora pa ka bo kai na tentason. Na bardadi, vontadi sta pruntu, ma kurpuRom 7.18-19; Gal 5.17 i fraku.”

39I bai utru bias pa bai ora; i torna fala mesmu palabra.

40I riba mas pa si disipulus, i oja elis mas e na durmi, pabia se uju staba pisadu ku sonu. E ka sibiba nin ke ke na ruspundil.

41I riba terseru bias, i fala elis: “Bo na durmi inda, bo na diskansa! I justa! OraJon 13.1 ciga ja. Fiju di omi na ntregadu na mon di omis mau.

42Bo lanta no bai, pabia kil ku na falsian, ali i na bin.”

Jesus prindidu(Mat 26.47-56; Luk 22.47-53; Jon 18.2-12)

43Oca ki na papiaba inda, Judas ciga, ku sedu un di ki dozi disipulu. I bin ku manga di jinti ku teneba spadas ku mandukus. I ŝefis di saserdoti ku pursoris di lei ku jinti garandi ku manda elis.

44Falsiadur da elis un sinal, i fala elis: “Kil ku bo oja N da beẑu, bo ta sibi kuma i el; bo ta prindil, bo lebal suguru.”

45I ciga son, i bai pa Jesus, i falal: “Rabi!” i dal beẑu.

46Ki omis pañal, e bafal risu.

47Un di kilis ku staba la busi spada, i da kriadu di ŝef di saserdotis ku el, i sapal oreja.

48Jesus fala elis: “Bo bin ku spadas ku mandukus pa prindin, suma un ladron.

49Tudu diaLuk 19.47 N ta sta ku bos na kasa di Deus, N na nsina; bo ka prindin, ma es kontisi pa i sedu suma ku SkrituraIs 53; Dan 9.26; Luk 24.44-47 fala.”

50Na ki ora tuduKap 14.27 disal, e kuri,

51ma un rapas ku na sigil, ku kubriba son lensol, oca e misti pañal,

52i larga elis ku lensol, i kuri nun.

Jesus dianti di Konseliu di judeus(Mat 26.57-68; Luk 22.63-71; Jon 18.13-24)

53Dipus, e leba Jesus pa kasaLuk 22.54 di ŝef di saserdotis; e junta tudu ŝefis di saserdoti ku garandis ku pursoris di lei.

54Pedru na sigil di lunju, te na baranda di tras di ŝef di saserdotis. I sinta la juntu ku guardas, i na kenta na fugu.

55Ŝefis di saserdoti ku tudu jinti di Konseliu e buska tustumuñu kontra Jesus pa e pudi matal, ma e ka oja,

56pabia manga di jinti na lantanda falsu tustumuñu kontra Jesus, ma se palabra ka filaba.

57Utrus lanta, e konta mintidaSal 35.11 kontra el, e fala:

58“No obil i fala kuma i na kebra e kasaKap 15.29; Jon 2.19-21 di Deus li, ku mon di omi kumpu; na tris dia i ta kumpu utru ku ka kumpudu ku mon di omi.”

59Nin ku sin, se tustumuñu ka fila.

60Ŝef di saserdotis lanta na metadi di tribunal, i punta Jesus: “Bu ka tene nada di ruspundi aserka de kusas ke testifika kontra bo?”

61Jesus kalaIs 53.7 boka, i ka ruspundi nada. Ŝef di saserdotis torna puntal mas: “Abo i Mesias, Fiju di Deus ku mersi ngabadu?”

62Jesus falal: “Na bardadi ami i el. Bo na oja Fiju di omi sintadu na direita di Deus di puder; bo na ojal i na binMat 16.27 na nuven di seu.”

63Ŝef di saserdotis rumpi si ropa, i fala: “Pa ke ku no pirsisa inda di tustumuña?

64Bo kaba ja obi kuma ki na lebsi Deus! Ke ku bo oja?” Elis tudu e fala kuma i ten kulpa, i dibi di muri.

65Utrus kumsa na kuspi riba del, e tapal uju, e dal suku, e falal: “Suma abo i anunsiadur, diviña!” Guardas tambi dal bofotada.

Pedru nega Jesus(Mat 26.69-75; Luk 22.54-62; Jon 18.15-18,25-27)

66Oca ku Pedru staba bas na baranda di tras, un bajuda di kasa di ŝef di saserdotis pasa,

67i oja Pedru na kenta, i jubil diritu, i falal: “Abo tambi bu staba ku Jesus di Nazaré.”

68Pedru nega, i falal: “N ka kunsil, nin N ka ntindi ke ku bu na fala.” I sai fora. Galu kanta.

69Ki bajuda ojal mas, i rabida i fala kilis ku staba la: “Es i un delis.”

70Ma el i torna nega utru bias.

Mas un bokadu, kilis ku staba la e fala Pedru utru bias: “Sertamenti abo i un delis, pabia abo tambiAt 2.7 i di Galileia.”

71I kumsa na jurmenta ku palabras forti, i fala: “N ka kunsi ki omi ku bo na papia del.”

72Na ki ora galu kanta sugundu bias. Pedru lembra palabraKap 14.30 ku Jesus falalba: “Antis di galu kanta dus bias, bu na fala tris bias kuma bu ka kunsin.” Ki ora i ka pudi nguenta; i kumsa na cora.