Atus 11 - Portuguese Creole Bible, Guinea-Bissau

Pedru konta igreẑa ke ku pasa

1Apostolus ku utru ermons di Judeia e obi kuma jinti ki ka judeus tambi risibi palabra di Deus.

2Oca ku Pedru bai Jerusalen, kilis ku mas pui sintidu na sirkunsisonKap 15.1,5; Gal 6.12-13 e diskuti ku el,

3e falal: “Bu yentra na kasa di omis ku ka sirkunsidadu, tok bu kume ku elis.”

4Pedru kumsa na splika elis tudu manera ki pasa, i fala:

5“Oca N na oraKap 10.9-48 na prasa di Jope, sintidu bai lunju ku mi, N sinti kuma N ka sta na mi. N teneba un vison, N oja un kusa suma lensol garandi, maradu na kuatru ponta, ku na ria di seu, i ciga te pertu di mi.

6N pui uju N jubi, N oja limarias di kuatru pe, di kasa ku di matu, ku kilis ku ta rasta, ku kacus ku ta bua.

7N obi tambi un vos ku falan: ‘Pedru, lanta, bu mata, bu kume.’

8N falal: ‘Di nin un manera, Siñor, pabia nunka N ka pui na boka kusa ku ka puru, ku anos judeus no ka dibi di kume.’

9Ki vos ruspundin di seu sugundu bias: ‘Kusa ku Deus fala bu pudi kume, ka bu fala i ka ta kumedu.’

10I kontisi te tris bias. Tudu torna rukuji pa seu.

11“Na ki ora i para dianti di kasa nunde ku N staba tris omi ku mandadu di Sesareia pa mi.

12Spiritu falan pa N bai ku elis, pa N ka duvida. Tambi e seis ermon bai ku mi; no yentra na kasa di ki omi.

13I kontanu kuma ki oja na si kasa un anju sikidu ku falal: ‘Manda jinti pa Jope pa e bai coma Simon ku tene nomi di Pedru.

14El i ta kontau palabras ku pudi salbau, abo ku bu familia tudu.’

15“Logu ku N kumsa na fala, Spiritu Santu ria riba delis, suma ki ria na nosKap 2.4 tambi na kumsada.

16Na ki ora N lembra di palabra ku Siñor fala: ‘Na bardadi Jon batisa ku yagu,Kap 1.5 ma abos bo na batisadu ku Spiritu Santu.’

17Asin, si Deus da elis mesmu don ki danu tambi, anos ku seta Siñor Jesus Kristu, ami i kin pa purfia ku Deus?”

18E kaba di obi e kusas, e kalma, e da Deus gloria, e fala: “Na bardadi Deus da tambi jinti di utru rasaRom 10.12-13; 15.9 ripindimentu pa e pudi tene vida.”

Igreẑa na Antiokia

19Kilis ku pajigadu na pirsigisonKap 8.1 ku lanta pabia di Stevon e pasa te Fenísia, Ŝipri ku Antiokia, e konta palabra son pa judeus.

20I tenba na se metadi utrus ki di Ŝipri ku Sireni. Oca ke bai Antiokia e papia ku gregus tambi, e konta elis Bon Noba di Siñor Jesus.

21Mon di Siñor staba ku elis. Manga di jintiKap 11.24; 2.47 seta, e konverti pa Siñor.

22Noba de kusas ciga na oreja di jinti di igreẑa di Jerusalen. E manda BarnabéKap 4.36; 9.27 pa Antiokia.

23Oca i ciga, i oja kuma Deus na tarbaja la, i fika kontenti, i konsijaKap 13.43; 14.22 elis pa e pega tesu na Siñor ku tudu se korson.

24El i bon omi, ku inci ku Spiritu Santu, ku fe. Manga di jinti bai pa kamiñu di Siñor.

25Barnabé bai Tarsu pa buska Saulu. Oca ki ojal, i lebal pa Antiokia.

26Un anu ntidu elis dus e junta ku krentis di ki igreẑa, e nsina manga di jinti. I na Antiokia ku jinti kumsa coma krentis Kristons.

27Na ki dias utru anunsiadurisKap 2.17; 13.1; 1 Kor 12.28-29; Ef 4.11 bai di Jerusalen pa Antiokia.

28Un delis, ku comaduKap 21.10 Ágabu, i lanta, i konta na puder di Spiritu kuma, i na bin ten garandi fomi na tudu mundu. (E fomi bin na tempu di rei garandi Klaudiu.)

29Krentis konkorda pa kada un delis da konformi i pudi, pa manda juda ermonsKap 24.17; Rom 15.26; 1 Kor 16.1; 2 Kor 9.1; Gal 2.10 na fe ku staba na Judeia.

30Asin ke fasi. E manda ofertaKap 12.25 pa garandis di igreẑa na mon di Barnabé ku Saulu.