Neemias 2 - Portuguese Creole Bible, Guinea-Bissau

Artaserksis disa Neemias pa i bai Jerusalen

1Un dia, na mis di Nisan, na anu 20 di rei Artaserksis, oca biñu staba pruntu, N tomal, N da rei. Es i purmeru bias ku N staba tristi si dianti.

2Rei puntan: “Ke ku manda bu rostu sta tristi, sin bu ka sta duenti? Es i ka utru kusa si i ka tristesa di korson.”

N panta,

3N fala rei: “Viva Ñu Rei! Kuma ku ña rostu ka na fika tristi si prasa nunde ku ña papes nteradu nel dana tudu, si portons kemadu ku fugu?”

4Rei puntan: “Ke ku bu misti?”

N ora Deus di seu,

5N fala rei: “Si Ñu Rei oja kuma i bon, si bu servu oja fabur na bu uju, bu ta mandan pa Judá, pa prasa nunde ku ña papes nteradu nel, pa N torna kumpul.”

6Rei, ku raiña sintadu lungu del, i puntan kantu tempu ku N na leba na bias, ku kal tempuKap 5.14; 13.6 ku N na riba. N marka tempu; rei seta mandan.

7Tambi N fala rei: “Si Ñu Rei oja kuma i bon, i ta dan kartas pa gubernaduris di utru banda di riu Eufrates, pa e pudi disan pa N pasa pa Judá.

8N pidi tambi karta pa Asaf, guarda di floresta di rei, pa i pudi dan madera pa vigas di portas di fortalesa di templu, tambi pa mura di prasa, ku kasa nunde ku N na bin bai sta nel.” Rei dan ki kartas, pabia bon mon di DeusEsd 7.28 staba riba di mi.

9Tambi i manda ŝefis di tropa ku mi, ku tropas di kabalu. N ciga nunde gubernaduris na utru banda di riu Eufrates, N da elis kartas di rei.

10Oca Sambalat, di tabanka di Oronain, ku Tobias, ŝef amonita, obi kuma algin bin pa tarbaja pa juda fijus di Israel, e fika ku kasabi.

11N ciga na Jerusalen. Dipus di N tene la tris dia,

12N lanta di noti, ami ku grupu pikininu di omis, oca N ka kontaba ningin inda ke ku ña Deus pui na ña korson pa N fasi na Jerusalen. Uniku limaria ku N leba i kil ku N monta riba del.

13Ki di noti N sai na porton di kobon, N pasa pa banda di fonti di dragon, ku porton di muntudu. N fika N na jubi diritu kaus nunde ku mura di Jerusalen findiba, ku si portons kemadu ku fugu.

14N pasa na porton di fonti, dipus na pisina di rei; i ka tenba lugar nunde ku N pudi pasa montadu na ña limaria.

15Inda di noti, N yanda na kobon di riusiñu, N na jubi mura, N riba, N torna yentra na prasa na porton di kobon.

16Ŝefis ka sibi nunde ku N bai, nin ke ku N na fasi, pabia te na ki tempu N ka konta judeus nada inda, nin garandis, nin ŝefis, nin kilis ku na bin fasi ki tarbaju.

17Dipus N fala elis: “Bo oja miseria ku no sta nel; JerusalenMis 2.8-9; 3.45-46; Ez 5.14-15 danadu, si portas kemadu ku fugu. Bo bin pa no torna kumpu mura di Jerusalen, pa ka no fika mas na borgoña.”

18N konta elis kuma ku mon di ña Deus staba ku mi pa judan, suma tambi palabra ku rei falan. E fala: “No lanta, no torna kumpu kau.” Asin e pega ku vontadi pa ki tarbaju bai dianti.

19Oca ki oronita Sambalat ku ki ŝef amonita Tobias, ku Jesen di Arabia, obi e kusa, e fasi trosa, e njutinu, e punta: “Es i ke ku bo na fasi? Bo misti lanta kontraKap 6.6; Luk 23.2; Jon 19.12 rei?”

20N ruspundi N fala elis: “Deus di seu na judanu pa kusa bai dianti; anos ku sedu si servus no na lanta pa kumpu, ma abos bo ka ten partiEsd 4.5; At 8.21 nin diritu li, nin bo ka sedu di Jerusalen.”