1 Samuel 20 - Portuguese Creole Bible, Guinea-Bissau

Jonatas juda Davi

1Davi kuri di Naiot na Ramá, i bai pa Jonatas, i puntal: “Ke ku N fasi? Kal ki ña krimi? Kal kusa mau ku N fasi bu pape ku manda i misti tiran vida?”

2Jonatas ruspundil: “Deus ta libra! Bu ka na muri. Jubi, ña pape ka ta fasi nin kusa garandi nin pikininu sin i ka kontan purmeru. Pabia di ke ku ña pape na sukundin e kusa? N ka fia!”

3Davi jurmenta i falal: “Bu pape sibi diritu kuma bu gosta ciu di mi. E ku manda i fala na si sintidu kuma Jonatas ka dibi di sibi e kusa, pa ka i fika tristi, ma na bardadi, N jurmentau pa vida di SIÑOR, ku bu vida tambi, kuma i faltan son un pasu pa mortu.”

4Jonatas fala Davi: “N na fasiu kualker kusa ku bu misti.”

5Davi fala Jonatas: “Jubi, amaña i festivalNum 28.11 di lua nobu. N dibi di kume ku bu pape, ma disan pa N bai sukundi na lugar te di tardi di ermon di amaña.

6Si bu pape nota pa ña falta, bu ta falal kuma N pidiu lisensa pa N janti pa Belen, ña prasa, pabia i na fasidu la ki sakrifisiu di kada anu pa tudu ña familia.

7Si i fala kuma i sta bon, bu servu na fika diskansadu, ma si i paña raiba, bu na sibi kuma i pui tudu si sintidu pa fasin mal.

8N pidiu pa bu mostra bondadi pa bu servu, pabia bu leban pa N fasi kontratuKap 18.3 ku bo dianti di SIÑOR. Si N sedu kulpadu, bu ta matan, abo propi; ka bu ntregan na mon di bu pape.”

9Jonatas falal: “E kusa ka na kontisi ku bo! Nta si N teneba ideia kuma ña pape pui sintidu pa fasiu mal, N ka na kontau?”

10Davi punta Jonatas: “Kin ku na kontan si bu pape ruspundiu ku raiba?”

11Jonatas falal: “Bin no bai pa lugar.” Asin e bai juntu.

12Jonatas fala Davi: “N jurmentau na nomi di SIÑOR Deus di Israel kuma N na punta ña pape ne ora amaña o ermon di amaña. Si i na mostra un bon spiritu pa bo, N na manda kontau pa bu pudi sibi.

13Tambi si ña pape pui sintidu pa fasiu mal, SIÑOR ta kastigan ciu si N ka kontau, pa N disau kapli pa bu bai ku pas. SIÑOR ta sta ku bo suma ki staba ku ña pape.

14Si N kontinua ku vida, bu na mostran bondadi di SIÑOR pa N ka matadu.

15Tambi bu ka na para mostra bu bondadi pa ña familiaKap 24.21; 2 Sam 9.3,7; 21.7 pa sempri, mesmu na tempu ku SIÑOR na kaba ku kada un di inimigus di Davi.

16SIÑOR na kastigau si abo ku bu familia bu ka guarda no kontratu.”

17Asin Jonatas pui Davi konfirma ki juramentu, pabia di si amor, pabia i amalba2 Sam 1.26 ku tudu si korson.

18Dipus Jonatas falal: “Amaña i festival di lua nobu. E na sinti bu falta, pabia bu lugar na sta vaziu.

19Ermon di amaña bu ta bai di tardi pa ki kau nunde ku bu sukundiba nel na ki diaKap 19.2 ku e purblema kumsa; bu ta pera lungu di pedra di Ezel.

20N na ferca tris fleŝa na ki ladu, suma ora ku N na ferca pa un alvu.

21N na manda rapas, N na falal: ‘Bai, bu bai buska fleŝas.’ Si N falal: ‘Jubi, fleŝas sta ne ladu di bo; tisi elis,’ bu pudi bin, pabia N jurmenta na nomi di SIÑOR bibu kuma bu pudi diskansa; pirigu ka ten,

22ma si N fala rapas: ‘Jubi, fleŝas sta la bu dianti,’ bu ta bai, pabia i SIÑOR ku disau pa bu bai.

23SIÑOR na sta na no metadi pa sempri pa no kumpri ki palabras ku no da ŋutru.”

24Asin Davi sukundi na lugar. Oca festival di lua nobu ciga, rei sinta pa kume,

25i sinta na si lugar di kustumu, lungu di paredi; Jonatas sinta si dianti; Abner sinta lungu di Saul, ma lugar di Davi staba vaziu.

26Saul ka fala nada na ki dia, pabia i pensa kuma sertamenti Davi staSir 7.20-21 impuru; yar un kusa kontisi ku el ku pul pa i ka sta puru.

27Na utru dia, ku sedu sugundu dia di lua nobu, lugar di Davi staba vaziu. Saul punta si fiju Jonatas: “Pabia di ke ku fiju di Jesé ka bin kume aonti nin aos?”

28Jonatas ruspundi Saul i falal: “Davi pidin ciu pa N dal lisensa pa i bai pa Belen;

29i falan: ‘N pidiu pa bu disan bai, pabia no familia tene un sakrifisiu na prasa; ña ermon manda falan pa N bai. Si N oja fabur bu dianti, bu ta disan bai jubi ña ermons.’ E ku manda i ka bin kume ku rei.”

30Raiba di Saul rebenta kontra Jonatas, i falal: “Fiju di minjer tortu i rebeldi! N sibi kuma bu sta a fabur di fiju di Jesé; bu na tisi borgoña riba di bu kabesa, tambi riba di mame ku padiu.

31Nkuantu fiju di Jesé sta bibu ne mundu, nin abo nin bu renu ka sta suguru. Manda buskan el gosi-gosi, pabia i dibi di muri.”

32Jonatas ruspundi si pape i puntal: “Pabia di ke ki ten ku muri? Ke ki fasi?”

33Saul ferca si kañakuKap 18.11 pa el pa matal. Asin Jonatas ntindi kuma si pape pui na sintidu pa mata Davi.

34Jonatas lanta na mesa ku raiba, i ka kume na ki sugundu dia di lua nobu, pabia i fikaba ku kasabi manera ku si pape na maltrataba Davi.

35Parmaña di utru dia Jonatas bai pa ki lugar na ora ki rumaba ku Davi; i leba un rapasiñu ku el,

36i falal: “Kuri, bu bai buska fleŝas ku N na ferca.” Oca rapas na kuri, Jonatas ferca un fleŝa si dianti.

37Oca rapas na ciga na kau ku fleŝa staba nel, Jonatas grita si tras i falal: “Jubi, ala fleŝa bu dianti.

38Janti! Kuri dipresa; ka bu tarda!” Rapas kuji fleŝa, i riba pa si mestre.

39I ka ntindi nada; son Jonatas ku Davi ku sibiba di ki asuntu.

40Jonatas ntrega mansasa na mon di rapas, i falal: “Leban el pa prasa.”

41Oca rapas bai, Davi lanta tras di ki pedra, i mpina tris bias ku si rostu na con; e beẑa ŋutru, e cora juntu, ma Davi ku mas cora ciu.

42Jonatas fala Davi: “Bai ku pas. Deus ta judanu kumpri kil ku no jurmenta pa ŋutru na nomi di SIÑOR, oca no fala: ‘SIÑOR na sta na no metadi pa sempri, ku na metadi di no familias.’ ”

Davi lanta i bai; Jonatas riba pa prasa.