Ezekiel 21 - Portuguese Creole Bible, Guinea-Bissau

Spada di SIÑOR

1SIÑOR bin papia ku mi, i falan:

2“Fiju di omi, jubi pa Jerusalen, bu papia kontraKap 6.2 kau sagradu, bu anunsia kontra tera di Israel,

3bu falal kuma SIÑOR fala: ‘N sta kontra bo; N na tira ña spada na baiña, N na mata jinti justu ku jinti mau na bo metadi.

4Suma N ten ku mata justu tudu ku jinti mau, N na tira ña spada na baiña kontra tudu jinti, desdi sul te na norti.

5Tudu jinti na sibi kuma ami, SIÑOR, N tira ña spada na baiña; nunka mas i ka na ribantadu la.’

6“Abo, fiju di omi, jimi se dianti suma korson na kemau; jimi ku tristesa.

7Ora ke puntau ke ku manda bu na jimi, bu ta fala elis: ‘Pabia di nobas ku na bin. Tudu korson na dismaja, tudu mon na bidaKap 7.17 moli, tudu jinti na sta na kasabi, tudu juju na tirmi.’ E kusas na bin, e ten ku sedu. I SIÑOR Deus ku fala.”

8SIÑOR bin papia ku mi, i falan:

9“Fiju di omi, anunsia, bu konta kuma SIÑOR fala:

“‘Spada, spada sta ben moladuLei 32.41 i pulidu,

10i moladu pa mata;

i pulidu pa lampra.

Nta no pudi fika kontenti?

Ña fiju ta njuti mantampa ku kualker avisu.

11Spada dadu pa i pulidu

pa i pudi usadu.

I moladu, i pulidu

pa ntregadu na mon di matadur.

12Grita, bu jimi, o fiju di omi,

pabia spada sta kontra ña pobu,

kontra tudu ŝefis di Israel.

E na ntregadu pa spada

juntu ku ña pobu.

Asin, suta bu pitu!

13Probason na bin;

ke ku manda bo njuti mantampa?’ ”

Asin ku SIÑOR Deus fala.

14“Abo, fiju di omi, anunsia, bu toka palmu;

Spada na bati dus bias, te tris bias.

I un spada di mata,

di garandi matansa.

I ta taja jinti di kada ladu.

15N koloka spada di matansa na tudu porton,

pa pui se korson dismaja,

pa buri numeru di kilis ku kai.

Ki spada kumpudu pa lampra suma raiu,

i sta pruntu pa mata.

16O spada! Korta pa direita,

korta paKap 14.17 skerda,

pa nunde ku bu misti pa bu ponta vira.

17Ami tambi N na toka palmu;

dipus, ña raiba na kaba.

I ami, SIÑOR, ku fala.”

18SIÑOR bin papia ku mi, i falan:

19“Fiju di omi, diseña dus kamiñu nunde ku rei di Babilonia pudi bin ku si spada. Ki dus kamiñu na sai na mesmu tera. Pui un sinal na kau nunde ku kamiñu ta rapati; un ta bai pa prasa.

20Marka un kamiñu pa spada pudi ciga kontraKap 25.5; 2 Sam 12.26; Am 1.14 Rabá, na tera di fijus di Amon; marka utru kontra Judá ku prasa fortifikadu di Jerusalen.

21Rei di Babilonia na pera na ntronkamentu nunde ku kamiñu ta rapati. I na bota sorti ku fleŝas, i na punta si idulus, i na jubi figadu di un limaria.

22Sorti na kai na ladu direita kontra Jerusalen; rei na risibi ordis pa mata, pa da gritus di gera, pa pui po di bati kontra porton, pa lantanda rampasKap 4.2; 26.8; Jer 32.24; 33.4; 52.4 di kamba, pa kumpu toris di bisia.

23Pa judeus i na parsi kuma ki adiviña i ka bardadi, pabia e puduba pa jurmentaKap 17.13 pa i sedu un kontratu entri elis, ma rei di Babilonia na lembra di se maldadi, i na fasi elis katibu.

24“E ku manda SIÑOR Deus fala: ‘Bo fasin pa N lembra di bo maldadi manera ku bo na disobdisin. Bo ta mostra bo pekadu na tudu kusa ku bo ta fasi. Manera ku bo na lembrantan, bo na pañadu.

25“‘Abo, rei di Israel, omi mauJer 52.2-11 ku ka ta mporta ku Deus, tempu di bu garandi kastigu i ciga.

26Asin ku SIÑOR Deus fala: Tiral koroa na kabesa, bu pul di ladu. Kusas na muda; omi umildiKap 17.24 na yalsadu, orgulyosu na batidu.

27Danu! Danu! N na dana prasa tudu! I ka na kumpudu mas tok kil ku sedu si propi dunuKum 49.10; Luk 1.32-33 bin; N na dal el.’

28“Abo, fiju di omi, anunsia, bu konta kuma SIÑOR Deus fala aserka di fijus di AmonKap 25.1-7; Jer 49.1-6; Sof 2.8-11 ku se nsultus:

‘Un spada, un spada tiradu di si baiña,

pulidu pa mata, pa lampra suma raiu!

29Visons ke oja aserka di bo i falsu;

bu adiviñas i mintida.

Spada na pudu na garganti

di jinti mau ku na matadu.

Se dia ciga,

dia di kastigu di kabantada.

30Torna spada na si baiña.

N na julgau na kau ku bu formadu nel,

na tera ku bu padidu nel.

31N na darma ña raiba riba di bo.

N na supra fuguKap 22.20-21 di ña raiba kontra bo.

N na ntregau na mon di omis brutu

ku ten jitu na dana.

32Bu na sedu leña pa fugu;

bu sangi na darmadu ne tera;

bu ka na lembradu del mas,

pabia i ami, SIÑOR, ku fala e kusa.’ ”