Sirmonias 15 - Portuguese Creole Bible, Guinea-Bissau

Impuresa di omi ku di minjer

1SIÑOR fala Moisés ku Aron

2pa e papia ku fijus di Israel, e fala elis: “Kualker omi ku tene un kusa ku na saiKap 22.4; Num 5.2; 2 Sam 3.29 na si kurpu, i na sedu impuru pabia di ki kusa.

3Si ki kusa na kuri na si kurpu, o si i sta ntupidu, i na fasil impuru. De manera ki kusa ku na sai nel i na tornal impuru.

4Tudu kama ku ki algin dita nel i na sedu impuru, suma tudu kusa ki sinta nel.

5Kualker algin ku toka na si kama, i na laba si ropa, i laba kurpu ku yagu, i na fika impuruKap 11.25 te di tardi.

6Kil ku sinta riba di kau ku ki algin sintaba nel, i na laba si ropa, i laba si kurpu tambi ku yagu, i na fika impuru te di tardi.

7Kil ku toka na ki omi ku tene kusa ku na sai nel i na laba si ropa, i laba si kurpu ku yagu, i na fika impuru te di tardi.

8“Si ki algin ku tene ki kusa ku na sai nel i kuspi na un algin puru, ki algin puru na laba si ropa, i laba kurpu ku yagu, i na fika impuru te di tardi.

9Si ki omi ku tene kusa ku na sai nel pui un kusa riba di un limaria, i monta riba del, ki kusa na sedu impuru.

10Tudu algin ku toka na kualker kusa ku staba bas di ki omi, i na fika impuru te di tardi; algin ku lambu ki kusa i na laba si ropa, i laba kurpu ku yagu, i na fika impuru te di tardi.

11Si ki omi toka na algin sin laba si mon ku yagu purmeru, ki algin ku tokadu i na laba si ropa, i laba si kurpu ku yagu, i na fika impuru te di tardi.

12“Basia di lamaKap 6.28; 11.32-33 ku ki omi toka nel i na kebradu, ma si i di madera i na labadu ku yagu.

13“Ora ku kusa para sai na kurpu di ki omi, i na pera inda seti dia pa i purifikadu. Dipus i ten ku laba si ropa, i laba si kurpu ku yagu ku na lagua; i na sedu puru.

14Na oitavu dia i na toma dus pumba di matu o dus pumba pikininu di kasa, i bai dianti di SIÑOR na entrada di tenda di juntamentu, i ntrega elis na mon di saserdoti.

15Saserdoti ten ku sakrifika elis, un son suma oferta pa pekadu, utru pa oferta kemadu. Asin i na kompleta sakrifisiu dianti di SIÑOR pa purifikason di ki omi pabia di kusa ku na saiba na si kurpu.

16“Omi ku simenti di kopulaKap 22.4; Lei 23.10-11 sai nel i na laba tudu si kurpu ku yagu, i na fika impuru te di tardi.

17Kualker ropa o kuru ku tene ki simenti nel, i na labadu ku yagu, i na fika impuru te di tardi.

18Si minjer dita ku omi ku si simenti di kopula sai nel, elis tudu dus e na laba kurpu ku yagu, e na fika impuru te di tardi.

19“Si minjer sta na si dias di pirdi sangi, i na sta seti dia na si impuresa. Kualker ku toka nel i na fika impuru te di tardi.

20Tudu kusa ki dita nel o i sinta nel duranti ki dias, i na fika impuru.

21-22Kualker ku toka na si kama, o na kualker kusa ki sinta riba del, i na laba si ropa, i laba kurpu ku yagu, i na fika impuru te di tardi.

23Nin si i kama, o kualker kusa ki sinta riba del, si algin toka nel, i na fika impuru te di tardi.

24“Si un omi dita ku el, si ki sangi toka nel, i na fika impuru pa seti dia; tambi tudu kama ki dita nel na fika impuru.

25“Si un minjer na pirdi sangi pa manga di dia fora di tempu normal di kada mis, o si ki sangi di kada mis kontinua na sai pa mas tempu, i na fika impuru tudu tempu ki na pirdi sangi, suma na si dias normal di kada mis.

26Tudu kama ki dita nel, ku tudu kusa ki sinta nel duranti ki dias, i na fika impuru.

27Kualker algin ku toka nelis i na sedu impuru. I na laba si ropa, i laba kurpu ku yagu, i na fika impuru te di tardi.

28“Ora ku sangi para sai, i na konta inda seti dia; dipus i na sedu puru.

29Na oitavu dia, i na toma dus pumba di matu o dus pumba pikininu di kasa, i leba elis pa saserdoti na entrada di tenda di juntamentu.

30Saserdoti na sakrifika un suma oferta pa pekadu, ku utru pa oferta kemadu. Asin i na kompleta sakrifisiu dianti di SIÑOR pa ki minjer, pabia di si impuresa.

31“Asin bo ten ku guarda fijus di Israel separaduNum 19.20; 1 Kor 3.17; 2 Kor 6.17 di kusas ku ta fasi elis impuru, pa e ka bin susa ña tenda nunde ku N mora na se metadi. Si e fasi asin, e na muri na se impuresa.”

32Es i leis pa omi ku kusa na sai na si kurpu, o i sta impuru pabia simenti di kopula sai nel,

33suma tambi pa minjer na si tempu di kada mis, pa omi o minjer ku kusa na sai nel, tambi pa omi ku dita ku minjer ku ka sta puru.