1 Samuel 10 - Portuguese Creole Bible, Guinea-Bissau

Samuel unji Saul rei di Israel

1Samuel toma un jaru di azeiti, i darmal riba di kabesa di Saul, i beẑal, i falal: “SIÑOR unjiu pa bu sedu rei di si pobu Israel. Bu na rena riba di pobu di SIÑOR, bu na salba elis di puder di se inimigus na roda. Es na sedu sinal pa bo kuma SIÑOR unjiu pa bu sedu rei di siLei 32.9 yardansa:

2Ora ku bu disan li aos, bu na kontra ku dus omi pertu di kau ku RakelKum 35.19-20 nteradu nel, na frontera di Benjamin, na Zelza. E na kontau kuma burus ku bu na buskaba e ojadu ja; asin bu pape i para ja pensa nelis, i sta forontaduKap 9.5 pabia di bos, i na punta: ‘Ke ku N na fasi aserka di ña fiju?’

3“Ora ku bu pasa dianti, bu na ciga na ki arvuri garandi di Tabor,Jos 19.12 bu na kontra ku tris omi la ku na bai adora Deus na Betel.Kum 12.8 Un son na leba tris kabrasiñu, utru na leba tris pon, ki utru un saku di kuru ku tene biñu.

4E na falau manteña, e na patiu dus pon, ku bu na toma na se mon.

5“Dipus, bu na ciga na monti di Deus nunde ku kampamentu di filisteus sta. Ora ku bu na yentra na prasa, bu na kontra ku grupu di anunsiaduris ku na ria di kau altu; kilis ku sta dianti e na tokaSai 15.20-21; 1 Kron 13.8; 15.19-22,28; 16.5; 25.1-6; 2 Kron 29.25-28; Sal 150.3-5 salterius, tambriñas, flautas ku arpas; e na papia na puder di Spiritu.

6Spiritu di SIÑOR na toma konta di bo; bu na papia juntuNum 11.25 ku elis, bu na mudadu pa bu sedu nobu omi.

7Ora ku tudu e sinal kontisi, fasi kil ku bu sinti kuma bu dibi di fasi, pabia Deus sta ku bo.

8“Bu na bai ña dianti paKap 11.14-15; 13.4,8; Jos 5.9 Jilgal, nunde ku N na bai kontra ku bo, pa sakrifika ofertas kemadu ku ofertas di pas. Bu na pera la seti dia tok N ciga, pa N kontau ke ku bu dibi di fasi.”

9Oca ku Saul dispidi Samuel, i rabida pa bai, Deus dal un korson nobu; tudu ki sinal kontisi na ki mesmu dia.

10Oca ke ciga na monti, un grupu2 Re 2.3 di anunsiaduris sai pa bin kontra ku elis. Spiritu di SIÑOR toma konta del; i anunsia na se metadi.

11Oca tudu kilis ku tarda kunsilba ojal i na anunsia ku anunsiaduris, e kumsa na punta ŋutru: “Es i ke ku kontisi ku fiju di Kis? Nta Saul tambiKap 19.24 i un di anunsiaduris?”

12Un omi ku moraba la ruspundi elis, i punta: “Nta kin ki se pape?” Di la ku ki ditu bin kumsa ku punta: “Nta Saul tambi i un di anunsiaduris.”

13Oca Saul kaba papia na puder di Spiritu, i bai pa kau altu.

14Tiu di Saul ojal ku si kriadu, i punta elis: “Nunde ku bo bai?” I falal: “No bai buska burus; manera ku no ka oja elis, no bai pa Samuel.”

15Si tiu falal: “Kontan ke ku Samuel fala bos.”

16Saul fala si tiu: “Na bardadi i kontanu kuma burus ojadu ja.” Ma i ka kontal ke ku Samuel falal aserka di renansa.

Pobu kuji Saul pa i sedu rei

17Samuel coma pobu di Israel pa e junta dianti di SIÑOR na Mizpá,Jos 11.3

18i fala elis: “Asin ku SIÑOR, Deus di Israel, fala: ‘N tira Israel na Ejitu, N libra bos na mon di jinti di Ejitu, tambi na mon di tudu nasons ku na dominaba riba di bos.’

19Ma aos bo nega bo Deus ku libra bos di tudu bo sufrimentu ku kasabi, bo fala: ‘Ranja un rei ku na sta riba di nos.’ Mbon, bo pursenta dianti di SIÑOR konformi bo jorsonsJos 7.14 ku bo familias.”

20Samuel pursenta tudu jorson; jorson di Benjamin kujidu.

21Dipus i pursenta jorson di Benjamin konformi familias; familia di Matri kujidu. Na familia di Matri, Saul, fiju di Kis, kujidu. E buskal ma i ka ojadu.

22E torna punta SIÑOR si ki omi ka bin inda. SIÑOR fala: “Ali i sukundi na metadi di kargus.”

23E kuri e bai tisil, e pul na metadi di pobu. Desdi ombra pa riba i mas kumpridu di ki tudu jinti.

24Samuel punta tudu pobu: “Bo oja omi ku SIÑORLei 17.15 kuji? I ka ten ningin suma el na metadi di tudu pobu.” Tudu jinti kontenti, e grita: “Viva1 Re 1.25,31,39; 2 Re 11.12; Mat 27.29 rei!”

25Samuel splika pobu leisLei 17.14-20 di renu, i skirbi elis na un libru, i pul dianti di SIÑOR. Dipus i dispidi jinti, kada kin pa si kasa.

26Saul tambi bai pa si kasa na Jibeá.Kap 11.4; Jos 18.28 Kilis di tropas ku Deus toka na se korson e bai ku el,

27ma utru omis mau punta: “Nta i es ku na bin libertanu?” E njutil, e ka lebal1 Re 10.25; 2 Kron 17.5; Mat 2.11 ofertas, ma Saul kala boka.