1 Reis 20 - Portuguese Creole Bible, Guinea-Bissau

Ben-Adad ataka Samaria

1Ben-Adad,Kap 15.18 rei di Siria, i junta tudu si tropas ku mas trinta i dus rei ku se kabalus ku karus. I bai taja Samaria, i atakal.

2I manda jinti pa prasa, pa Akab, rei di Israel,

3ku e rekadu: “Ben-Adad fala pa bu ntrega bu prata ku uru, bu minjeris ku bu fijus mas bon, pabia tudu i di sil.”

4Rei di Israel ruspundi i fala: “Bai fala Ñu Rei kuma N seta si palabra. Ami i di sil, ku tudu ku N tene.”

5Ki jinti torna bin mas e fala: “Ben-Adad fala kuma i mandaba ja falau pa bu ntrega bu prata, bu uru, bu minjeris ku bu fijus,

6ma amaña ne ora i na manda si ŝefis pa e bai rabista bu kasa, ku kasas di bu ŝefis; tudu kusa ku dadu balur, e na tomal, e leba.”

7Rei di Israel coma tudu garandis di tera, i fala elis: “Bo jubi kuma ku ki omi na buska mal. Oca ki manda pidin ña minjeris, ña fijus, ña prata ku uru, N ka negal.”

8Tudu garandis ku pobu falal: “Ka bu sukutal nin ka bu seta.”

9Asin rei fala jinti ku Ben-Adad manda: “Bo fala Ñu Rei kuma, tudu ki pidi purmeru bias, N seta, ma es ki na pidi gosi, N ka pudi setal.” Jinti riba, e bai dal rasposta.

10Ben-Adad manda fala Akab: “N na bin ku manga di tropa ku nin reia di Samaria ka na ciga pa inci mon di kada kin. Si N ka fasi asin, deusis ta matan!”

11Rei di Israel ruspundi i fala: “Bo falal kuma, un soldadu ka ta njata1 Sam 14.12-13; Mat 26.33-35,75 antis di gera, ma son dipus.”

12Ben-Adad obi ki palabra oca ku el ku ki reis na bibiba na se tendas; i fala si ŝefis: “Bo purpara pa ataka ki prasa.”

Akab ngaña gera

13Un anunsiadur ciga nunde Akab, rei di Israel, i falal: “Asin ku SIÑOR fala: ‘Bu oja ki garandi multidon? N na ntrega elis na bu mon aos, pa bu sibi kuma ami i SIÑOR.’ ”

14Akab punta: “Kin ku na sta dianti?” Anunsiadur falal: “Asin ku SIÑOR fala: ‘Ki soldadus nobu ku sta bas di ŝefis di reẑion.’ ” Akab puntal: “Kin ku na kumsa gera?” I falal: “Abo.”

15Asin Akab coma ki soldadus nobu di ŝefis di reẑion; e seduba duzentus i trinta i dus. I junta tambi tudu tropas di Israel ku sedu seti mil.

16E pega kamiñu me-dia, e bai, oca ku Ben-Adad ku ki trinta i dus rei ku na judalba e na bibiba na se tendas tok e cami.

17Ki soldadus nobu di ŝefis di reẑion staba dianti. Ben-Adad teneba si sintinelas; e manda avisal, e falal: “I ten omis ku sai di Samaria, e na bin.”

18I fala: “Nin ke na bin pa pidi pas, bo tisi elis bibu, o si e na bin pa gera, bo tisi tambi elis bibu.”

19Asin ki soldadus nobu di ŝefis di reẑion e sai di prasa, ku tudu tropas se tras.

20Kada kin mata si inimigu ki kontra ku el. Jinti di Siria kuri; omis di Israel bai se tras, ma Ben-Adad, rei di Siria, kapli na kabalu, ku utru kabalerus.

21Rei di Israel bai, i paña kabalus ku karus, i mata jinti di Siria, i fasi garandi danu.

22Ki anunsiadur bai nunde rei di Israel, i falal: “Bai bu bai fortifika, bu jubi diritu ke ku bu dibi di fasi, pabia na anu ku na bin, rei di Siria na bin atakau.”

Sugundu ataki sirianu

23Ŝefis di rei di Siria falal: “Se deusis e sedu deusis di montis; e ku manda e ngañanu. No na geria ku elis na kau rasu; asin no na sedu mas forti di ki elis,

24ma i ten un kusa ku bu na fasi: Tira ki reis, kada kin na si lugar, bu pui kapitonsKap 22.31 na se konta.

25Ranja utru tropas na mesmu numeru di kilis ku bu pirdi, ku kabalus ku karus tambi na mesmu numeru. No ten ku geria ku elis na kau rasu. Asin no na sedu mas forti di ki elis.” Rei seta ke ke falal, i fasi suma ke fala.

26Dipus di un anu Ben-Adad junta omis di Siria, i bai pa Afeka pa bai geria kontra Israel.

27Fijus di Israel juntadu tambi, e ekipadu pa gera, e marŝa kontra elis, e bai kampa se dianti suma dus koral pikininu di kabra, ma sirianus inciba ki kau.

28Ki omi di Deus ciga i fala rei di Israel: “Asin ku SIÑOR fala: ‘Suma ku sirianus fala kuma SIÑOR i Deus di montis, i ka Deus di kau rasu, N na ntrega e garandi multidon na bu mon, pa bu sibi kuma ami ki SIÑOR.’ ”

29E kampa dianti di ŋutru pa seti dia. Na setimu dia gera kumsa. Fijus di Israel mata jinti di Siria, na numeru di sen mil omi di pe, na un dia.

30Kilis ku sobra kuri pa prasa di Afeka. Mura kai riba di vinti i seti mil delis, ma Ben-Adad kuri, i ciga na prasa, i bai sukundi na un kuartu di tras.

31Si ŝefis falal: “Jubi, no obi kuma reis di Israel ta sinti pena di jinti. Disanu no mara sakuKap 21.27; Kum 37.34; 2 Sam 3.31; Est 4.1-3; Is 22.12; 37.1; Jona 3.5-6; Apok 11.3 na kurpu, ku kordas na kabesa, pa no bai pa rei di Israel; talves i ka ta matau.”

32Asin e mara saku na kurpu, ku kordas na kabesa, e bai pa rei di Israel, e falal: “Bu servu Ben-Adad manda pidiu pa ka bu matal.” Akab punta: “A! I ka muri? El i ña ermon.”

33Ki omis kontenti ku ki palabra, e janti pa purbita del, e fala: “Sin, bu ermon Ben-Adad.” I fala: “Bo bai tisin el.” Ben-Adad bin pa el. Akab kumbidal pa i mbarka na si karu.

34Ben-Adad fala: “N na ribantau ki prasasKap 15.20 ku ña pape toma na mon di bu pape. Tambi bu pudi ranja kau pa bo na Damasku pa fasi nogos, suma ku ña pape fasiba na Samaria.” Akab falal: “Suma ku bu sta pruntu pa e kontratu, N na disau pa bu bai.” Asin i fasi kontratu ku el, i disal pa i bai.

Un anunsiadur raprindi Akab

35Un omi di grupu2 Re 2.3 di anunsiaduris risibi ordi di SIÑOR, i fala si kumpañer: “Fidin.” Kila nega.

36Anunsiadur falal: “Suma ku bu ka obdisi ordi di SIÑOR, bu na disan son, lionKap 13.24 na matau.” Omi sai pa bai; lion kontra ku el, i matal.

37Ki anunsiadur kontra ku utru omi, i falal: “Fidin.” Ki omi dal, i molostal.

38Anunsiadur mara ujus ku ligadura pa kamufla, i bai pera rei na kamiñu.

39Oca ku rei na pasa, anunsiadur comal, i falal: “Ami, bu servu, N bai na metadi di gera. Un soldadu tisin un katibu, i falan: ‘Guardan e omi. Si i kapli, bu na pirdi bu vida2 Re 10.24 na konta del, o bu na paga trinta mil mueda di prata.’

40Oca ku N staba okupadu ku utru tarbaju, omi disparsi.” Rei falal: “Es i bu sentensa. I abo propi ku tiral na bu boka.”

41Anunsiadur janti, i tira ligadura na si uju. Rei rapara kuma i un di anunsiaduris.

42I fala rei: “Asin ku SIÑOR fala: ‘Manera ku bu larga ki omi ku N markaba pa i muri, bu vidaKap 22.31-37 na bai na konta di si vida, bu pobu na muri na konta di si pobu.’ ”

43Rei di Israel fika ofindidu, i paña raiba, i riba pa si kasa na Samaria.