Ŝefis 20 - Portuguese Creole Bible, Guinea-Bissau

Israelitas geria ku jorson di Benjamin

1Tudu fijus di Israel, desdi Dan te Berseba, suma tambi tera di Jilead, e junta suma un omi son, dianti di SIÑOR na Mizpá.Jos 11.3

2Ŝefis di pobu ku tudu jorsons di Israel e pursenta na juntamentu di pobu di Deus, kuatrusentus mil soldadu di pe, yarmadu ku spadas.

3Fijus di Benjamin obi kuma israelitas baiba pa Mizpá. Fijus di Israel punta kuma ku e maldadi yanda i sedu.

4Ki levita, omi di minjer ku matadu, i fala: “N ciga ku ña kumadri na Jibeá, prasa di Benjamin, pa pasa noti la.

5Omis di Jibeá lanta kontra mi, e da volta di kasa di noti, e mistiba matan. E abusa na ña kumadri tok i muri.

6N tomal, N padasal, N manda padasis pa tudu parti di tera di Israel, pabia e fasi e brutasku ku diskarna na Israel.

7Abos tudu li bo sedu fijus di Israel. Bo konta ke ku bo oja.”

8Tudu pobu lanta suma un omi son, e fala: “Nin un di nos ka na bai pa si kau. Nau, nin un di nos ka na riba pa si kasa.

9Asin ku no na fasi Jibeá: no na juga sorti pa jubi kuma ku no na bai kontra el.

10Na tudu jorson di Israel, di kada sen omi no na toma des; di kada mil no na toma sen; di kada des mil no na toma mil, pa e ranja kumida pa tropas. Asin, ora ke ciga na Jibeá di Benjamin, e pudi vinga elis pa tudu maldadi ke fasi na Israel.”

11Asin tudu omis di Israel junta suma un omi son, e bai kontra ki prasa.

12Jorsons di Israel manda jintiLei 13.12-15; Jos 22.13-16; Rom 12.18 pa tudu jorson di Benjamin pa bai fala elis: “Es i kal maldadi ku fasidu na bo metadi?

13Bo ntreganuKap 19.22; 2 Sam 20.21-22 ki omis malvadu ku sta na Jibeá pa no mata elis, pa no pudi tira ki maldadiLei 17.7 na Israel.”

Fijus di Benjamin ka seta obi se ermons, ku sedu fijus di Israel.

14E sai na prasas, e bai junta na Jibeá pa geria kontra fijus di Israel.

15E mobilisa na se prasas 26.000 omi ku ta geriaba ku spada, fora di 700 omi di Jibeá ku ka tenba igual.

16Na tudu ki tropas i tenba 700 ku sedubaKap 3.15 skerdus, e ta fercaba pedra di lamparan pa un kabelu, e ka ta yaraba.

17Omis di Israel, fora di kilis di Benjamin, e seduba 400.000 soldadu ku ta geriaba ku spada; elis tudu i gererus.

18Fijus di Israel lanta e bai pa Betel, e punta Deus: “Na no metadi, kin ku na bai purmeru pa bai geria kontra Benjamin?” SIÑOR fala: “Judá ku na bai purmeru.”

19Fijus di Israel lanta parmaña, e kampa pertu di Jibeá.

20Omis di Israel sai pa geria kontra Benjamin, e pui se tropas na pusison di gera pertu di Jibeá.

21Omis di BenjaminKum 49.27 sai na Jibeá, e mata na ki dia 22.000 omi di Israel.

22-23Fijus di Israel bai cora dianti di SIÑOR te di tardi; e puntal: “Nta no na torna bai geria kontra no ermons, fijus di Benjamin?” SIÑOR fala elis: “Bo bai kontra elis.” Asin israelitas e ngaña koraẑen, e toma mas se pusison pa geria na mesmu kau ke staba na purmeru dia.

24E torna avansa kontra Benjamin na sugundu dia.

25Tropas di Benjamin sai di Jibeá pa bai kontra ku elis, e mata mas 18.000 omi ku ta geriaba ku spada.

26Tudu jinti di Israel bai pa Betel, e cora, e staba la dianti di SIÑOR, e junjuŋa ki dia te di tardi, e kema ofertas, e da tambi ofertas di pas dianti di SIÑOR.

27-28Arka di kontratu di Deus staba la na ki tempu. Fineias, fiju di Eleazar, fiju di Aron, i ta sirbiba SIÑOR dianti di arka. Fijus di Israel punta SIÑOR: “No na torna bai geria mas kontra no ermons, fijus di Benjamin, o no na disa?” SIÑOR fala elis: “Bo bai, pabia amaña N na ntrega elis na bo mon.”

29Asin Israel bai e bati mboskadaJos 8.4; 2 Sam 5.23 na roda di Jibeá.

30Fijus di Israel bai na terseru dia kontra fijus di Benjamin, e toma se pusison di gera pertu di Jibeá suma ke fasiba ja na ki dus bias.

31Fijus di Benjamin sai pa bai kontra ku elis, e lunjusi di prasa, e kumsa na mata elis suma ke fasiba; e mata serka di trinta omi la na matu, na kamiñu ku ta bai pa Betel ku kil ku ta bai pa Jibeá.

32Fijus di Benjamin fala: “No na ngaña elis suma ki bias.” Fijus di Israel fala: “No rakua, pa tira elis na prasa pa matu.”

33Asin tudu tropas di Israel rakua di se lugar, e toma mas pusison na Baal-Tamar. Kilis di mboskada sai di se lugar na kaverna di Jeba.

34Des mil di minjor tropas di Israel e bai kontra Jibeá; gera torna forti. Jinti di Benjamin ka notaba kuma mal na binba pa elis.

35SIÑOR da Israel vitoria riba di Benjamin; na ki dia e mata 25.100 omi di Benjamin ku ta geriaba ku spada.

36La ku fijus di Benjamin oja kuma e pirdi gera, pabia israelitas e rakua se dianti, fiansadu na mboskada ke batiba kontra Jibeá.

37Jinti ku staba na mboskada e bai dipresa pa bai ataka ku forsa; e pajiga tudu na prasa di Jibeá, e mata ku spada tudu jinti ku staba la.

38Tropas di Israel daba ja sinal pa kilis ku staba na mboskada, kuma e ten ku pui fugu tok garandi nuven di fumu lanta na prasa;

39asin tropas di Israel ten ku rabida kontra Benjamin. Benjamin kumsaba ja mata jinti di Israel, serka di trinta omi, pabia e na falaba: “No na ngaña elis sin falia, suma na ki gera ku pasa.”

40Fumu kumsa na subi na prasa suma nuven. Jinti di Benjamin vira pa tras, e oja fumu na lanta na prasa, i na subi pa seu.

41Tropas di Israel vira pa tras. Omis di Benjamin panta, pabia e oja kuma e staba ja mal.

42E kuri di jinti di Israel pa kamiñu di lala, ma gera pañaba ja elis. Kilis ku staba na prasa e staba ja na se metadi, e na mata elis,

43e taja elis, e serka elis, e na mata-mata na kamiñu, te pertu di Jibeá na ladu ku sol ta sai.

44Disoitu mil omi di Benjamin kai, tudu elis di koraẑen pa gera.

45Kilis ku fika e kuri pa lala pa pedra garandi di Rimon.Jos 15.32; Zak 14.10 Israelitas mata sinku mil delis na kamiñu, e serka utrus te na Jidon, e mata mas dus mil.

46Na ki dia i muri 25.000 omi di Benjamin ku ta geriaba ku spada, tudu elis omis di koraẑen.

47Ma seizentus omi rabida e kuri pa lala, pa pedra garandi di Rimon, e bai fika la kuatru mis.

48Israelitas riba pa tera di fijus di Benjamin, e mata ku spada tudu ke oja na prasas, jintiLei 13.15-17 tudu ku limarias. Tambi tudu prasas ke oja, e kema elis ku fugu.