1 Kronikas 11 - Portuguese Creole Bible, Guinea-Bissau

Davi unjidu rei(2 Sam 5.1-3)

1Tudu pobu di Israel junta nunde Davi na Ebron,Jos 14.15 e falal: “Anos ku bo no sedu mesmu sangi.

2Mesmu na tempu ku Saul seduba inda rei, i abo ku ta baiba dianti di Israel pa gera. SIÑOR bu Deus falauba kuma bu na sedu bakiadur di si pobu Israel, bu na rena riba delis.”

3Oca ku tudu garandis di Israel bin pa rei Davi na Ebron, i fasi kontratu ku elis la, dianti di SIÑOR. E unjil pa i sedu rei riba di Israel, suma ku SIÑOR falaba ja na boka di Samuel.

Davi ngaña Jerusalen(2 Sam 5.6-10)

4Davi ku tudu Israel e bai pa Jerusalen, ku comaduba Jebus, nunde ku jebuseusJos 11.3 moraba.

5Jebuseus fala Davi: “Bu ka na yentra li.” Ma nin ku ’sin, Davi toma kuartel di Sion, ku gosi ta comadu prasa di Davi.

6Davi falaba si tropas: “Purmeru omi ku yentra pa ataka jebuseus, i el ku na sedu bo ŝef mas garandi.” Joab,2 Sam 2.13 fiju di Zeruia, i yentra purmeru; asin i bin sedu ŝef di tropas.

7Davi bai mora na ki kuartel; asin jinti pasa ta comal prasa di Davi.

8I kumpu prasa na roda di kuartel, desdi Milu te na mura. Joab kumpu restu di prasa.

9Davi fika i na ngaña forsa kada bias mas, pabia SIÑOR ku ten tudu puder staba ku el.

Omis forti di Davi(2 Sam 23.8-39)

10I tenba ŝefis di omis forti di Davi; elis ku tudu Israel e judal pa i sedu rei, suma ku SIÑOR falaba ja; e apoial pa si renu pudi fika suguru.

11Purmeru di ki omis forti i sedu Jesobean,Kap 27.2-15 akmonita, ŝef di kapitons. I yalsa si kañaku kontra trizentus omi, i mata elis tudu.

12Dipus del, i Eleazar, fiju di Dodó, aoita, ku seduba un di ki tris omi forti.

13I staba ku Davi na Pas-Damin, oca ku filisteus juntaba la pa geria na un lugar pikininu ku teneba sevada. Tropas di Israel kuri dianti di filisteus,

14ma Eleazar ku si kumpañeris e firma na metadi di ki lugarsiñu, e difindil, e mata filisteus. SIÑOR juda elis pa e ngaña garandi vitoria.

15Un dia, tris di ki trinta ŝef e bai pa Davi pa pedra garandi, lungu di kaverna di Adulan. Kampamentu di filisteus staba na kobon di Refain.Jos 15.8

16Davi staba na un kau forti; filisteus tomaba konta di Belen.

17Davi sinti diseẑu forti, i fala: “Pañan algin pa i tisin yagu di fonti ku sta lungu di porton di Belen pa N bibi!”

18Ki tris e pasa na metadi di kampamentu di filisteus, e bai kata yagu na ki fonti lungu di porton di Belen, e tisil pa Davi. Ma Davi nega bibil; i darmal dianti di SIÑOR,

19i fala: “Deus ta libran di fasi un kusa suma es! Nta N pudi bibi sangi di vida de omis? E pui se vida na pirigu pa tisin e yagu.” Asin i nega bibil. Es i kusa ku ki tris omi di koraẑen fasi.

20Abisai, ermon di Joab, i seduba ŝef di ki trinta. I lantanda si kañaku kontra trizentus omi, i mata elis; i teneba nomi na metadi di ki trinta,

21tok i bin sedu se ŝef. Utrus ta pensa kuma i mas tenba fama di ki ki tris, ma i ka ciga di kontadu na se metadi.

22Benaia,2 Sam 8.18 fiju di Jeoiada, i seduba un omi di koraẑen, di Kabzeel, ku fasi manga di kusa garandi. I mata dus omi di Moab, forti suma lion. Tambi i ria, i mata lion dentru di un koba, na tempu di nevi.

23I mata tambi un omi kumpridu di Ejitu ku teneba mas di ki dus metru di altura, ku pegaba kañaku garandi na mon, suma ransi di fisial. Benaia bai kontra el ku po pisadu, i roba kañaku na mon di ki ejipsiu, i matal ku el.

24Asin ku Benaia, fiju di Jeoiada, fasi. I tenba fama suma ki tris,

25ma i ka kontadu suma un delis. Ma na metadi di ki trinta, i el ku mas tenba fama. Davi pul suma ŝef di si guarda-kosta.

26Omis forti di tropas e seduba:

Asael,2 Sam 2.18 ermon di Joab;

El-Anan, fiju di Dodó di Belen;

27Samot di Aror;

Elez, pelonita;

28Ira, fiju di Ikes di Tekoa;

Abiezer di Anatot;

29Sibekai di Usa;

Ilai, aoita;

30Maarai di Netofá;

Eled, fiju di Baaná, di Netofá;

31Itai, fiju di Ribai, di Jibeá di Benjamin;

Benaia di Piraton;

32Urai di kobon di Gaas;

Abiel, arbatita;

33Azmavet di Baarun;

Eliaba di Saalbon;

34Fijus di Asen di Jizon;

Jonatas, fiju di Saji, di Arar;

35Aian, fiju di Sakar, di Arar;

Elifal, fiju di Ur;

36Efer di Mekera;

Aías, pelonita;

37Ezru di Karmelu;

Naarai, fiju di Ezbai;

38Joel, ermon di Natan;

Mibar, fiju di Agri;

39Zelek di Amon;

Naarai, di Beerot, ku ta leba tajadera di Joab, fiju di Zeruia;

40Ira ku Gareb, itritas;

41Urias, eteu;

Zabad, fiju di Alai;

42Adina, fiju di Siza, ŝef di rubenitas, ku staba riba di un grupu di trinta;

43Anan, fiju di Maaka;

Jeosafá, mitnita;

44Uzia, asteratita;

Sama ku Jeiel, fijus di Otan, di Aroer;

45Jediael, fiju di Sinri, ku si ermon Joa, di Tiz;

46Eliel di Maava;

Jeribai ku Josavias, fijus di Elnaan;

Itma di Moab;

47Eliel, Obed ku Jaasiel, mezobaita.