2 Kronikas 1 - Portuguese Creole Bible, Guinea-Bissau

Salomon pursenta sakrifisius

1Salomon, fiju di rei Davi, i fortifika si renansa; SIÑOR si Deus staba ku el, i garandisil.

2Salomon papia ku tudu Israel, ku kapitons di mil ku di sen, ku juisis, ku tudu ŝefis ku sta na Israel, ku ŝefis di familia.

3Salomon ku tudu juntamentu e bai pa ki kau altu na Jibeon,Jos 9.3; 1 Re 3.4 nunde ku tenda di juntamentuSai 26.1 di Deus staba nel, ku Moisés, servu di SIÑOR, kumpuba na lala.

4Davi lebaba ja arka di Deus di Kiriat-Jearin pa tenda1 Kron 13.5; 16.1 ki yarmaba pa el na Jerusalen,

5ma altar di kobri ku Bezaleel, fiju di Uri, fiju di Ur, kumpuSai 31.2-3,9; 38.1-7 staba inda la dianti di tenda di SIÑOR na Jibeon. Salomon ku juntamentu di pobu e bai buska SIÑOR la.

6Salomon ciga pa altar di kobri na tenda di juntamentu, i pursenta la dianti di SIÑOR mil oferta kemadu.

Salomon pidi Deus jiresa(1 Re 3.5-15)

7Ki di noti Deus bin pa Salomon i falal: “Pidin kualker kusa ku bu misti pa N dau.”

8Salomon fala Deus: “Bu mostra garandi bondadi pa Davi ña pape; dipus bu fasin rei na si lugar.

9O SIÑOR Deus, N misti pa bu konfirma ja ki palabra ku bu fala ña pape Davi, pabia bu fasin pa N rena riba di un pobu ku ciu dimas, suma reia.Kum 13.16

10Asin, bu ta dan jiresa ku kuñisimentu pa N pudi gia e pobu,1 Kron 22.12 pabia kin ku pudi guberna es bu pobu manera ki garandi?”

11Deus fala Salomon: “Es i bon kusa ku bu tene na bu korson. Suma ku bu ka pidin rikesa, nin kusas di balur, nin rispitu, nin mortu pa kilis ku ten odiu di bo, nin bu ka pidin vida kumpridu, ma bu pidin jiresa ku kuñisimentu pa pudi guberna ña pobu ku N fasiu rena riba del,

12asin N na dau jiresa ku kuñisimentu. Tambi N na dau rikesas ku kusas di balur, ku rispitu, ku nin un reiKap 9.22 antis di bo ka teneba; dipus di bo, nin un ka na tenel.”

Puder ku rikesa di Salomon(1 Re 10.26-29)

13Asin Salomon sai na Jibeon, di ki kau altu nunde ku tenda di juntamentu staba, i riba pa Jerusalen, i rena riba di Israel.

14I junta mil i kuatrusentus karu ku dozi milKap 9.25-28 kabalu, i pui elis na prasas di karu, ma i fika ku utrus na Jerusalen.

15Rei fasi Jerusalen pa i tene prata ku uru ciu suma pedras, ku sedrus ciu suma figera brabu ku sta na matu.

16Kabalus di Salomon ta tisiduba di Ejitu ku di Koa. Nogosiantis di rei ta kumpra elis na Koa pa un sertu pres.

17E ta importa karus di Ejitu, kada un pa seizentus mueda di prata; tambi kada kabalu ta kusta sentu i sinkuenta mueda; dipus e ta manda bindi elis pa tudu reis di eteus ku reis di Siria.