Isaias Introduson - Portuguese Creole Bible, Guinea-Bissau

IntrodusonIsaias i comadu anunsiadur ivanjeliku o anunsiadur mesianiku, pabia i ta papia ciu di Mesias (Kristu), i fala kuma benson na bin pa mundu atraves di nason di Israel. Konformi storia antigu di judeus, Isaias matadu ku sera na tempu di rei Manasés. Eb 11.37 konta aserka di jinti ku matadu na ki manera. I ten manga di palabra di Isaias ku ripitidu na Nobu Testamentu.Israel (ki des jorson di norti) lebadu pa katiberasku na Asiria na tempu di Isaias. Rei di Asiria staba pruntu pa ngaña Judá tambi. Isaias fala di purblemas di pulitika ku sosiedadi na Judá, i mostra kuma rais di tudu i spiritual. I avisa elis kuma se idulatria ku disobdiensia ten ku tisi garandi kastigu.I fala tambi di Rei ku na bin na jorson di Davi, ku na tisi pas pa mundu.Kapitulus 1—39 tene palabras pa jinti di tempu di Isaias. Na kapitulu 39 i avisa aserka di katiberasku na Babilonia, ku bin sedu dipus di mas di ki sen anu. Di kapitulu 40 pa dianti, no tene manga di palabra di konsolason pa katibus, ku purmesas di gloria ku na bin pa Israel mas tardi. I ta papia di kusas ku ka seduba inda suma i mati na ki ora, o suma ki kusa seduba ja. Na 44.28 ku na kapitulu 45, i coma nomi di Siru, un rei ku Deus staba pa lantanda pa i liberta si pobu. E anunsiu i kumpridu na libru di Esdras. Konformi utru libru di storia antigu, Siru lei ki palabra, i obdisi. Talves i Daniel ku mostral el.