1 Koríntius 14 - Portuguese Creole Bible, Guinea-Bissau

Mas aserka di dons di Spiritu

1Bo pui amorSir 19.18 na purmeru lugar, ma bo buskaKap 12.31 ku mpeñu dons di Spiritu, prinsipalmenti puder di anunsia rekadu di Deus.

2Kil ku na fala na lingua ki ka obi i ka na fala pa jinti, ma pa Deus, pabia ningin ka ta ntindil. Na puder di Spiritu i na fala bardadi sukundidu,

3ma kil ku na anunsia rekadu di Deus i na fala pa jinti, pa lantanda elis, pa konsija elis, pa da elis koraẑen.

4Kil ku na fala na lingua strañu i ta juda son si kabesa, ma kil ku ta anunsia rekadu di Deus i ta juda tudu jinti na igreẑa.

5N ta kontenti si abos tudu bo ta fala lingua strañu, ma N ta mas kontenti si bo na anunsia, pabia kil ku na anunsia rekadu di Deus i ten mas purbitu di ki kil ku na fala lingua strañu; son si i pudi splika tambi kusa ki fala na lingua, pa igreẑa pudi lantandadu.

6Ermons, si N bai nunde bos, N fala na lingua strañu, kal purbitu ku N pudi sedu pa bos si N ka konta bos kusa ku Deus mostran, o sklarisi bos un kusa, o anunsia rekadu di Deus, o nsina?

7Bo pudi pensa na kusa sin vida, suma instrumentu ku ta tokadu, flauta o viola. Si nota di musika ka tokadu klaru, kuma ku algin pudi ntindi kantiga ki na toka?

8Si omi ku na toka korneta ka toka nota klaru, kin ku na purpara pa gera?

9Di mesmu manera, kuma ku algin na ntindi ke ku bo na fala si bo na papia un lingua ku ka kunsidu? I ta sta suma bo na papia na bentu.

10I ten manga di koldadi lingua na mundu, ma elis tudu e ten se sintidu.

11Si N ka ntindi lingua ku na faladu, ki algin i ta sedu strañu pa mi; ami tambi N ta sedu strañu pa el.

12Ja ku bo dija dons di Spiritu, bo buska manera di usa mas ciu kilis ku ta lantandaKap 12.7 igreẑa.

13Algin ku ta papia lingua strañu dibi di ora pa Deus dal puder di splika ke ki na papia.

14Si N ora na lingua strañu, ña spiritu na ora, ma ña ntindimentu ka na toma parti.

15Ke ku N na fasi gora? N na ora ku spiritu, ma tambi N na ora ku ntindimentu. N na kantaEf 5.19 ku spiritu; tambi N na kanta ku ntindimentu.

16Si bu fala Deus obrigadu son na spiritu, si algin ku falta di ntindimentu sta la, kuma ki pudi fala Amen riba di bu gardisimentu si i ka ntindi ke ku bu na fala?

17Na bardadi bu gardisimentu pudi sedu bon, ma i ka na juda utru jinti.

18N na fala Deus obrigadu pabia N ta papia lingua strañu mas di ki kualker di bos,

19ma na runion di igreẑa N mas misti papia sinku palabra ku na ntindidu, pa pudi nsina utrus, di ki des mil palabra na lingua strañu.

20Ermons, ka bo sedu mininusMar 10.14-15; Rom 16.19; Ef 4.14; Eb 5.12-13 na ntindimentu; bo sedu mininus na fasi mal, ma na ntindimentu bo sedu jinti maduru.

21I sta skritu na lei kuma:

“Siñor fala: ‘Ami N na papiaIs 28.11-12 ku e pobu

na boka di omis ku ta papia utru lingua,

ku sedu na boka di stranjerus,

ma mesmu asin e ka na obin.’ ”

22Asin, lingua strañu i ka sinal pa krenti, ma i pa kilis ki ka krenti. Anunsiu i ka sinal pa kilis ki ka krenti, ma pa krenti.

23Asin, si tudu igreẑa junta na un lugar, si tudu na papia lingua strañu, i yentra un algin ku ka ten ntindimentu o ki ka krenti, nta i ka ta falaAt 2.13 bo tulu?

24Ma si tudu na anunsia rekadu di Deus, si un algin ku ka ten ntindimentu o ki ka krenti yentra, palabra di kada un ki na obi i na konvensil, i na julgal;

25sigridus di si korson na bin pa lus. Asin i ta mborka na con, i adora Deus, i diklara: “Na bardadi, Deus staIs 45.14; Zak 8.23 na bo metadi!”

Ordi na kultu

26Pa kabanta, ermons, ora ku bo junta pa adorason, un ta tene kantiga, utru tene nsinamentu, utru ta konta kusa ku Deus mostral, utru ta fala lingua strañu, utru ta splikal. Bo fasi tudu pa ajuda diKap 12.7; Rom 14.19; 2 Kor 12.19; Ef 4.11-12 igreẑa.

27Pa kilis ku na papia lingua strañu, son dus o tris ku na papia, un di kada bias; tambi pa i ten kil ku na torna palabra.

28Si i ka ten kin ku na splikal, minjor pa ka i papia pa tudu igreẑa, ma son pa el ku Deus.

29Pa anunsiaduris, dus o tris pudi fala; restu ta jubi1 Jon 4.1 palabra diritu.

30Si Deus mostra un kusa pa algin ku sinta la, kil ku na papia dibi di kala.

31Abos tudu bo pudi anunsia rekadu di Deus, un di kada bias, pa tudu pudi prindi, e fika animadu.

32Anunsiaduris ten ku rugula se don di anunsiu,

33pabia Deus i ka Deus di kunfuson, ma i Deus ku ta da pas.

Suma na tudu juntamentu di pobu di Deus,

34minjerisKap 11.3; Ef 5.24; 1 Tim 2.11-12 dibi di kala na runion, pabia e ka tene lisensa di papia, ma i pa e fika suẑetu, suma ku lei fala.

35Si e misti sibi kualker kusa, e ta bai punta se maridu na kasa, pabia i borgoñosu pa minjer papia na igreẑa.

36Nta palabra di Deus kumsa ku bos? I bin son pa bos?

37Si algin oja kuma2 Kor 10.7 el i anunsiadur, o i tene don spiritual, i dibi di ntindi kuma e kusas ku N skirbi bos i mandamentu di Siñor,

38ma si algin ka liga ku e kusas, ka bo liga ku si dunu.

39Asin ermons, bo buska ku mpeñuKap 14.1; 12.31 pa anunsia; ka bo tuji jinti papia lingua strañu.

40Tudu dibi di fasidu diritu, ku ordi.