1 Reis 4 - Portuguese Creole Bible, Guinea-Bissau

Gubernu di Salomon

1Salomon seduba rei riba di tudu Israel.

2Ali nomis di si ŝefis:

Azarias,1 Kron 6.8-10 fiju di Zadok, seduba saserdoti.

3Elioref ku Aias, fijus di Sisa, e seduba sekretarius.

Jeosafá,2 Sam 20.24 fiju di Ailud, seduba sekretariu di stadu.

4Benaia,2 Sam 8.18 fiju di Jeoiada, seduba ŝef di tropas.

Zadok ku AbiatarKap 2.26-27,35 seduba saserdotis.

5Azarias, fiju di Natan, seduba ŝef di gubernaduris di reẑion.

Zabud, fiju di Natan, seduba konsijadur, amigu1 Kron 27.33 di rei.

6Aisar seduba nkargadu di kasa di rei.

Adoniran,Kap 5.13-14; 2 Sam 20.24 fiju di Abda, seduba nkargadu di tarbaju obrigatoriu.

7Riba di tudu Israel Salomon teneba dozi gubernadur di reẑion ku ta ranjaba kumida pa rei ku jinti di si kasa. Kada gubernadur tenba ku ranja kumida pa un mis na kada anu.

8Ali se nomis:

Ben-Ur na montañas di Efrain;

9Ben-Deker na prasas di Makaz, Saalabin, Bet-Semes, Elon ku Bet-Anan;

10Ben-Esed na Arubot ku Sokó ku tudu tera di Efer;

11Ben-Abinadab na tudu tera di Dor; Tafat, fiju femia di Salomon, i seduba si minjer;

12Baaná, fiju di Ailud, na prasas di Taanak ku Mejidu, ku tudu Bet-Sean ku sta lungu di Zaretan pa sul di Jizreel, te na Abel-Meolá, te na Jokmean na utru banda;

13Ben-Jeber na Ramot-Jilead, ku teneba tambi tabankas di Jair, fiju di Manasés, ku sta na Jilead; i teneba tambi area di Argob ku sta na Basan, ku sedu sesenta prasa garandi ku tene muras ku trinkus di kobri;

14Ainadab, fiju di Idu, na Maanain;

15Aimaaz na Naftali, ku kasaba ku Basemat, fiju di Salomon;

16Baaná, fiju di Usai, na Aser ku Alot;

17Jeosafá, fiju di Paruá, na Isakar;

18Simei,Kap 1.8 fiju di Elá, na Benjamin;

19Jeber, fiju di Uri, na tera di Jilead (ku seduba tera di Sion, rei di amoreus, ku Og, rei di Basan).

Fora desis, i tenba un gubernadur riba di tudu tera.

Kumida ku ranjadu pa kasa di rei

20Pobu di Judá ku Israel e ciu ba suma reiaKum 13.16 na praia. E ta kumeba, e bibi, e fika kontenti.

21Salomon na renaba riba di tudu tera desdi riu EufratesKum 15.18; 2 Kron 9.26 te na tera di filisteus, te na frontera di Ejitu. Elis tudu e ta pagalba mpustu, e fika bas del pa tudu si vida.

22Kada dia i ta ranjadu pa Salomon sentu i oitenta busa di foriña finu, ku trizentus i sesenta busa di foriña di miju,

23des baka ku kriadu dentru pa e gurdu, vinti baka ku ta kume paja na kampada, ku sen karnel, fora di gazela, kabra di montaña, boka-branku ku kacus di karni finu.

24Salomon na renaba riba di tudu ku sta ne ladu di riu Eufrates, di Tifsa te na Gaza, riba di tudu reis di banda di riu pa kaida di sol. I tenba pas ku tudu teras na ki ladus.

25Na tudu vida di Salomon, jinti di Judá ku Israel, desdi Dan te na Berseba, e morabaJer 23.6; Ez 39.26; Mik 4.4; Zak 3.10 suguru; kada kin mora bas di si pe di uva ku si pe di figu.

26Salomon teneba korenta mil kasa di kabaluKap 10.26; Lei 17.16; 2 Sam 8.4; 2 Kron 9.25; Sal 20.7 ku ta leba karu, ku dozi mil kabalu ku ta montadu pa gera.

27Asin, ki gubernaduris di reẑion, kada kin na si mis, e ta ranjaba kumida pa rei Salomon ku tudu jinti ku ta staba na mesa di rei; e ka ta disa pa nin un kusa falta elis.

28Tambi, konformi se dever, e ta lebaba sevada ku paja pa un lugar sertu, pa kabalus di karu ku ki utru kabalus.

Jiresa di Salomon

29Deus da Salomon jiresa ku garandi ntindimentu ku ka pudi mididu, suma reia di praia.

30Jiresa di Salomon i mas kil di tudu jinti di ladu di saida di sol, ku tudu jinti di Ejitu.

31El i mas jiru ba di ki tudu omis, mas di ki Etan, ki ezraita, mas di ki Eman, Kalkol1 Kron 2.6 ku Darda, fijus di Maol. Si fama lagaKap 5.7; 10.1,6; Mat 4.24 na tudu nasons na roda di Israel.

32I skirbi mil i sinku kantiga ku tris mil ditu.Dit 1.1

33I fala aserka di plantas, desdi arvuri garandi comadu sedru ku sta na Líbanu te na isopiSai 12.22; Eb 9.19 ku ta lanta na paredi. I fala tambi di limarias, kacus, limarias ku ta rasta na con, ku pis.

34Tudu reis di mundu ku obi di jiresa di Salomon e manda jinti di tudu rasa pa sukutal.