Esdras 5 - Portuguese Creole Bible, Guinea-Bissau

Tarbaju di templu kumsa mas

1Anunsiadur Aẑeu ku anunsiadur Zakarias,Zak 1.1 fiju di Idu, e kumsa na anunsia, na nomi di Deus di Israel, pa judeus ku staba na Judá ku Jerusalen.

2Asin Zorobabel, fiju di Sealtiel, ku Jesua, fiju di Jozadak, e kumsa na kumpu kasa di Deus na Jerusalen. AnunsiadurisAẑeu 1.12-15 di Deus staba ku elis, e juda elis.

3Na ki tempu Tatenai, gubernadur di Trans-Eufrates, ku Setar-Boznai ku se kumpañeris, e bai punta elis: “Kin ku da bos ordi pa bo kumpu e kasa, pa kompleta si paredis?”

4E punta tambi: “Kuma ku nomi di omis ku na kumpu e kasa?”

5Ma uju di Deus staba riba di garandis di judeus; ki jinti ka tuji elis tarbaja, tementi e ka manda asuntu pa Dariu, e ka risibi karta di rasposta.

6Ali kopia di karta ku Tatenai, gubernadur di Trans-Eufrates, juntu ku Setar-Boznai ku se kolegas, ŝefis di pruvinsia, manda pa rei Dariu.

7E mandal relatoriu ku fala asin:

“No dija pas pa rei Dariu.

8“No misti pa rei sibi kuma no bai pa pruvinsia di Judá, pa kasa di Deus garandi ku na kumpudu ku pedras garandi. Madera na pudu ja riba di paredis. Obra na fasidu diritu, i na bai dianti dipresa.

9No punta garandis kin ku da elis ordi pa e kumpu ki kasa, pa kompleta si paredis.

10No punta elis tambi se nomis, pa no pudi skirbi elis, no manda kontau kin ku sedu se ŝefis.

11“E ruspundinu asin: ‘Anos i servus di Deus di seu ku tera; no na torna kumpu kasa ku kumpuduba ja disna di manga di anu. Un garandi rei di Israel kumpul, i kabantal,

12ma dipus di no papes lantanda raiba di Deus di seu, el i ntrega elis na mon di ki kaldeu2 Kron 36.16-17,19 Nabukodonosor, rei di Babilonia, ku kaba ku e kasa, i leba pobu pa Babilonia.

13Na purmeru anu ku Siru na renaba na Babilonia, i da ordiKap 1.1-8 pa e kasa di Deus kumpudu.

14Ki vasus di uru ku di prata di kasa di Deus ku Nabukodonosor tira na templu di Jerusalen i miti na baloba di Babilonia, rei Siru bai tira elis na baloba, pa e ntregadu na mon di un omi comadu Sesbazar, ku rei pui pa i sedu gubernadur di Judá.

15I falal: “Toma e kusas, bu bai, bu leba elis pa templu ku sta na Jerusalen, bu kumpu kasa di Deus na kau ki staba nel.”

16Sesbazar bin, i pui alisersu di kasa di Deus li na Jerusalen. Disna di ki dia i na kumpudu, ma te gosi i ka kaba.’

17“Asin, si rei konkorda, algin ta buska na librus na armazen di rei, la na Babilonia, pa jubi si i bardadi ku rei Siru da ordi pa kumpu ki kasa di Deus na Jerusalen. Dipus rei ta manda kontanu ke ki misti pa no fasi ne kasu.”