2 Kronikas 16 - Portuguese Creole Bible, Guinea-Bissau

Purblemas ku Israel(1 Re 15.17-22)

1Na anu 36 di renansa di Asa, Baasa, rei di Israel, bai kontra Judá, i fortifika prasa di Ramá, pa ka ningin sai nin yentra na tera di Asa, rei di Judá.

2Asa toma prata ku uru2 Re 16.8 na armazens di kasa di Deus, ku kasa di rei, i mandal pa Ben-Adad, rei di Siria, ku moraba na Damasku, i falal:

3“N misti pa i ten un kontratu entri nos, ami ku bo, suma ki tenba entri ña pape ku bu pape. Ali N na mandau prata ku uru; bai bu pajiga bu kontratu ku Baasa, rei di Israel, pa i pudi sai na ña tera.”

4Ben-Adad seta palabra di rei Asa, i manda si kapitons di tropa kontra prasas di Israel. E toma prasas di Ijon, Dan, Abel-Main ku tudu prasas di armazens di Naftali.

5Baasa obi ki noba, i disisti fortifika Ramá; i ka kontinua mas ku ki tarbaju.

6Rei Asa leba tudu pobu di Judá, e bai karga ki pedras ku madera ku Baasa na fortifikaba Ramá ku el, e bai fortifika Jeba ku Mizpá ku el.

7Na ki mesmu tempu, anunsiadur Anani bin pa Asa, rei di Judá, i falal: “Manera ku bu fiansa na rei di Siria, bu ka fiansaKap 13.18; Is 31.1; Jer 17.5 na SIÑOR bu Deus, tropas di rei di Siria kapliu.

8Nta tropas di EtiopiaKap 14.9-12 ku Libia e ka seduba ciu dimas, ku ki manga di karu ku kabaleru? Ma suma ku bu fiansaba na SIÑOR, el i dau vitoria riba delis,

9pabia uju di SIÑORJo 34.21; Dit 5.21; 15.3; Jer 16.17; 32.19; Zak 4.10; Eb 4.13; 1 Ped 3.12 ta pasa pa tudu parti di mundu, pa fortifika kilis ku tene korson pirfituKap 15.17 pa el. Bu fasi kusa tulu; disna di gosi gera na ten kontra bo.”

10Asa paña raibaSal 141.5; Dit 9.7-9 kontra ki anunsiadur, i manda fical na kalabus, ku pe na tronku, pabia i fika abursidu ku ki palabra. Na ki mesmu tempu i kalka utru jinti ku duresa.

Mortu di Asa(1 Re 15.23-24)

11Kusas ku pasa ku Asa, disna di kumsada te na kabantada, e sta skritu na libru di Storia di Reis di Judá ku di Israel.

12Na anu 39 di si renansa, Asa bin paña duensa di pes, ku bin torna muitu mal. Mesmu asin, na si duensa i ka buska SIÑOR, son medikus.

13Na anu 41 di si renansa i muri.

14E ditandal na kama, ku inci ku kusas ku ta cera sabi ku jinti ku ta tarbaja na purfumus purpara. E nteral na prasa di Davi, na koba ki fasiba pa si kabesa; e sindi garandi fugu na si onra.