Daniel 8 - Portuguese Creole Bible, Guinea-Bissau

Vison di karnel ku kabra

1Na terseru anu di renansa di Belsazar, ami, Daniel, N tenebaKap 7.1 vison, dipus di ki utru ku N teneba purmeru.

2Na tempu ku N teneba ki vison, N staba na prasa fortifikadu diNe 1.1 Susan, na pruvinsia di Elan, ma na vison N oja kuma N staba lungu di riu Ulai.

3N yalsa uju, N oja un karnel macu ku firma lungu di riu, ku teneba dus cifri kumpridu. Kil ku kumsa kirsi na ultimu i bin sedu mas kumpridu di ki ki utru.

4N oja ki karnel manera ki na ataka ku cifris pa ladu di kaida di sol, pa norti i pa sul. Nin un limaria ka pudiba nguental, ku fadi pa libra di si puder. I ta fasiba konformi iKap 5.19; 11.3 misti; asin i ta mostra si garandesa.

5Oca ku N na jubiba, di repenti i sai un kabra macu na ladu di kaida di sol. I pasa kinti-kinti riba di tudu tera suma ki na bua, sin toka pe na con. Ki kabra macu teneba un cifri garandi na metadi di si uju.

6I bai pa ki karnel ku teneba dus cifri, ku N ojaba lungu di riu, i kuri kontra el ku tudu si forsa.

7N ojal i ciga pertu di karnel ku garandi raiba; i maja ki karnel, i kebral si dus cifri. Asin karnel ka tenba forsa pa difindi. I botal na con, i masal ku pe; i ka tenba kin ku pudi libra ki karnel na si mon.

8Ki kabra macu mostra si garandesa, ma ocal na si forsa mas altu, si cifri garandi kebradu. I nasi na ki lugar kuatru cifri garandi; un bai pa norti, utru pa sul, utru pa lesti, utru pa kaida di sol.

9Na un delis i sai un cifri pikininuKap 7.8 dimas, ma i bin kirsi ciu pa ladu di sul, pa saida di sol, suma tambi pa tera bonitu di Judá.

10I torna forti tok i ataka tropas ku staba suma strelas di seu, i bati utru di ki tropas pa con, i masa elis.

11I mistiba disafiaKap 11.31,36; Jos 5.14 ŝef di tropas di seu, tok i kaba ku ki sakrifisiu ku ta fasidu pa el kada dia; kau sagradu di ŝef di tropas batidu na con.

12Pabia di pekadu, ki tropas ntregadu na si mon, ku sakrifisiuKap 11.31 di kada dia. I toma bardadi, i botalIs 59.14 na con. Tudu ki fasi i ta kurilba diritu.

13Dipus N obi un anju ku na papia. Utru anju ruspundi, i puntal: “Te kal tempu1 Ped 1.10-12 ku kusas de vison na kontinua? E pekadu ku ta dana, kantu tempu ki na kontinua toma lugar di sakrifisiu di kada dia? Kantu tempu ku tropas di seu ku kau sagradu na masadu ku pe?”

14N obi rasposta ku fala: “Te 2.300 di tardi ku parmaña, ku sedu 1.150 dia. Dipus kau sagradu na purifikadu.”

Splikason di vison

15Ami, Daniel, dipus ku N oja ki vison, N buska ntindil. Di repenti i bin ña dianti un algin ku parsi ku omi.

16N obi vos di un omi lungu di riu Ulai ku na grita i fala: “Gabriel,Luk 1.19 splika e omi ki vison.”

17Oca ki ciga pertu di kau nunde ku N firmaba, N fika ku medu tok N mborka na con. I falan: “Fiju di omi, ntindi kuma e vison i sta ligadu ku tempu di kabantada.”

18Oca ki na papia ku mi, N kai na con, NKap 10.9-10; Apok 1.17 dismaja. El i pegan, i firmantan,

19i falan: “N na kontau ke ku na bin sedu na kabantada, na tempu di raiba di Deus, pabia e visonAb 2.3 i sta ligadu ku tempu markadu di kabantada.

20Ki karnel macu ku bu oja ku dus cifri i reis di Media ku Persia.

21Ki kabra macu ku manga di kabelu i rei di Gresia. Cifri garandi na metadi di si uju i si purmeru rei.

22Ki kuatru cifri ku lanta na lugar di kil ku kebradu i kuatru renuKap 11.4 ku na bin lanta na mesmu nason, ma e ka na ten forsa suma kil di purmeru.

23“Na kabantada di se renansa, ora ku pekadu di jinti ciu dimas, un rei na bin lanta, ku rostuLei 28.50 duru, ku sedu garandi nganadur.

24I na bida kada bias mas forti, ma i ka na sedu pa si propi forsa. I na dana kau dimas; i na ten sorti, i na fasi ke ki misti. I na kaba ku omis di forsa, ku pobu di Deus tambi.

25Ku si jiresa i na pui pa nganu vensi. Dipus i na sinti orgulyu na si korson. I na kaba ku manga di jinti sin avisu. I na lanta kontra Rei mas garandi di tudu, ma i na kebradu sin ajuda di monKap 2.34,45; Mis 4.6 di omi.

26“Ki vison aserka di 2.300 di parmaña ku di tardi ku bu kontadu, i bardadi, ma bu na guarda ki vison naKap 10.14; 12.4,9; Ez 12.27; Apok 10.4; 22.10 sigridu, pabia i na fala di dias ku lunju inda.”

27Ami, Daniel, N pirdi forsa, N fika duenti pa puku dia. Dipus N lanta, N fasi tarbaju di rei. N fikaba ku spantuKap 7.28 ku ki vison; i ka tenba algin ku na splikan el.