1 Kronikas Introduson - Portuguese Creole Bible, Guinea-Bissau

IntrodusonKronikas signifika relatorius ku skirbidu di kusas ku kontisi. 1 ku 2 Kronikas seduba un libru son, ligadu tambi ku Esdras ku Neemias. Judeus ta falaba sempri kuma i Esdras ku skirbi e librus. I pudiba konsulta utru librus ki tenba, suma libru di reẑistu di rei Davi (1 Kron 27.24), librus di Storia di Anunsiaduris Samuel, Natan ku Gad (1 Kron 29.29), Storia di Anunsiadur Natan, Anunsius di Aias di Siló ku Visons di Anunsiadur Idu (2 Kron 9.29), Storias di Anunsiaduris Semaias ku Idu (2 Kron 12.15; 13.22), Apontamentus di Jeu ku sta na libru di Storias di Reis di Israel (2 Kron 20.34; 24.27), libru ku Isaias skirbi aserka di Uzias (2 Kron 26.22), Vison di Anunsiadur Isaias ku libru di Storia di Reis di Judá ku di Israel (2 Kron 32.32) ku Storia di Anunsiaduris (2 Kron 33.19).1 Kronikas ta konta manga di kusa ku sta na 2 Samuel, ma i tene novi kapitulu di listas di jorsons, ku kumsa ku Adon, e bai te dipus di judeus riba di katiberasku na Babilonia, pa kumsa un nobu vida na se propi tera. Reẑistus seduba importanti pa elis, pa e sibi di yardansa di kada familia, tambi pa sibi kin ku pudi sedu saserdoti. Jorson di Davi teneba garandi importansia, pabia Deus fala kuma si tronu na sedu firmi, i na ba ta pasa di pape pa fiju pa sempri (Sal 89.3-4). Mas tardi, Mesias (Kristu) bin padidu na ki jorson. E listas na 1 Kron 1—9 pudi ojadu suma skeletu di Beju Testamentu.Rusumu1.1—9.44 Listas di jorsons10.1-14 Mortu di Saul11.1—29.30 Renansa di DaviNa kapitulu 22 Davi kumsa purpara pa kumpu templu. I si fiju Salomon ku bin pui tudu na pratika, ma no pudi nota kuma ku Davi fasi planta konformi Deus mostral (28.19), i junta material, tambi i organisa levitas pa e sirbi Deus na templu.