Kumsada 43 - Portuguese Creole Bible, Guinea-Bissau

Ermons di José riba pa Ejitu

1Fomi staba duru na tera.

2Dipus de kume tudu kumida ke tisi di Ejitu, se pape fala elis: “Bo riba, bo bai kumpranu un bokadiñu di kumida.”

3Judá falal: “Ki omi avisanu klaru kuma no ka na oja si rostu mas si no ermon ka bai ku nos.

4Si bu manda no ermon ku nos, no na bai kumprau kumida,

5ma si bu ka mandal, no ka na bai, pabia ki omi falanu kuma no ka na oja si rostu si no ermon ka bai ku nos.”

6Israel punta: “Kuma ku bo tisi e kansera pa mi, manera ku bo konta ki omi kuma bo tene inda utru ermon?”

7E falal: “Ki omi puntanu diritu aserka di nos ku no familia. I puntanu si no pape sta di vida inda, si no tene mas un ermon. No ruspundi si purguntas. Kuma ku no pudi sibi kuma i na falanu pa no leba no ermon?”

8Judá fala si pape Israel: “Manda rapas ku mi, no lanta no bai, pa no tene vida, pa ka no muri, nin anos, nin abo, nin no fijus.

9Ami N na sedu fiadurKap 44.32 pa el; bu na nkargan suma responsavel. Si N ka tisiu el, N ka pul dianti di bu rostu, N na sedu kulpadu bu dianti pa sempri.

10Si no ka tardaba, gosi no staba ja na kamiñu pa riba.”

11Se pape Israel fala elis: “Si i ten ku sedu, bo fasi asin: Bo toma kusas de tera ku mas ten balur, bo pui na bo sakus, bo leba ki omi un pursenti:Kap 32.20-21 un bokadiñu di bálsamu, un bokadiñu di mel, purfumu, mira, nozis di pistasera, ku fruta di amenduiña.

12Bo toma diñeru dus bias na bo mon; ki diñeru ki pui na boka di bo sakus, bo torna ribantalRom 12.17; 13.8; 2 Kor 8.21 mas. I pudi sedu ki yaraba.

13Bo toma bo ermon tambi, bo lanta, bo riba pa ki omi.

14Deus ku ten tudu puder i na pui ki omi pa i ten miserikordia di bos, pa i disa ki utru bo ermon pa i bin, tudu ku Benjamin. Si ami N pirdi ña fijus, nta N na fika sin fijus!”

Ermons di José kume ku el

15Ermons di José toma ki pursenti, ku diñeru dobradu na se mon, ku Benjamin, e lanta e bai pa Ejitu, e bai pursenta dianti di José.

16Kontra José oja Benjamin ku elis, i fala nkargadu di si kasa: “Leba e omis pa kasa, bu mata un limaria, bu purpara tudu, pabia e omis na kume ku mi me-dia.”

17Omi fasi suma ku José mandal, i leba ki omis pa kasa di José.

18Oca e na lebadu pa kasa e sinti medu, e pensa: “I pabia di ki diñeru ku ribantadu na no sakus na purmeru bias ku no bin, e ku manda no tisidu li, pa i kulpanu, i kai riba di nos, i tomanu ku no burus pa fasinu katibus.”

19Asin e bai pa nkargadu di José, na porta di kasa, e papia ku el,

20e falal: “Siñor, danu lisensa pa no papia. No bin li purmeru bias pa kumpra kumida,

21ma no ciga na lugar ku no na paraba di noti; oca no na yabri no sakus, diñeru di kada kin staba na boka di si saku, tudu kompletu ku si pesu sertu. No torna tisil mas;

22tambi no tisi utru diñeru pa kumpra kumida. No ka sibi kin ku pui no diñeru na no sakus.”

23Nkargadu fala: “I sta bon. Ka bo ten medu. Bo Deus, Deus di bo pape, i da bos un rikesa na bo sakus. N risibi bo diñeru.” I tisi Simeon fora pa i sta ku elis.

24Nkargadu leba elis pa kasa di José, i da elis yagu pa e laba pe; tambi i da kumida pa se burus.

25E purpara pursenti pa ora ku José bin me-dia, pabia e obi kuma e ten ku kumeba la.

26Oca José bin pa kasa, e tisil ki pursentis ke teneba; e mpina dianti del na con.

27I punta elis kuma ke staba; i punta mas: “Bo pape, ki omi beju ku bo kontan del, i sta bon? I bibu inda?”

28E ruspundi: “Bu servu, no pape, i sta bibu inda, i sta bon.” E baŝa kabesa, e mpina.

29Kontra José na jubi, i oja Benjamin, si ermon, fiju di si mame,Kap 35.16-18 i punta: “Es i ki bo ermon mas nobu ku bo kontan aserka del?” Dipus i falal: “Deus ta bensuau, ña fiju.”

30José sinti tokadu dimas pa si ermon, i buska kau nunde ki na cora; i yentra na un kuartu partikular, i cora la.

31Dipus i laba rostu, i sai, i domina si kasabi, i fala: “Bo sirbi kumida.”

32E sirbi di sil aparti, e sirbi tambi di si ermons aparti; ejipsius ku ta kumeba ku el, e sirbi elis tudu aparti; ejipsius ka pudiba kume ku ebreus, pabia i sedu un kusa nujenti pa elis.

33Ermons di José sintandadu si dianti konformi se idadi, desdi mas garandi te na ki mas pikininu. E fika e na jubi ŋutru; e dimira ciu.

34Kumida sirbidu pa elis di mesa di José, ma kumida di Benjamin i seduba sinku bias mas garandi di ki kualker un delis. E kume, e bibi, e fika kontenti ku el.