Saida 37 - Portuguese Creole Bible, Guinea-Bissau

Arka(Sai 25.10-16)

1Bezaleel kumpu arka di madera di akasia di 110 sentimetru di kumprimentu, 70 di largura ku 70 di altura.

2I kubril ku uru puru dentru ku fora, i pui koroa di uru na si roda.

3I kumpu kuatru anilia di uru pa el, i fiksa elis na kuatru pe, dus na un ladu ku dus na utru ladu.

4I kumpu varas di madera di akasia, i kubri elis ku uru.

5I miti varas na anilias na ladu di arka pa pudi kargal.

Kubertura di miserikordia(Sai 25.17-22)

6I kumpu tambi kubertura di miserikordia di uru puru, di 110 sentimetru di kumprimentu ku 70 di largura.

7I kumpu tambi dus kirubin di uru batidu na ponta di kada ladu,

8un kirubin na un ponta, utru na utru ponta. E forma un pesa son ku kubertura di miserikordia.

9Ki kirubins e distindi se asas pa riba, e kubri kubertura di miserikordia ku elis. E na jubi ŋutru riba del.

Mesa(Sai 25.23-30)

10I kumpu mesa di madera di akasia, di 88 sentimetru di kumprimentu, 44 di largura ku 66 di altura.

11I kubril ku uru puru, i pui koroa di uru na si roda.

12I kumpu tambi un moldu na si roda ku tene largura di kuatru dedu; i fasi koroa di uru na roda di ki moldu.

13I kumpu tambi kuatru anilia di uru, i fiksa elis na kuatru ponta nunde ku si pes sta.

14Ki anilias, ku varas ta mitidu nelis pa karga mesa, e pudu lungu di moldu.

15Ki varas pa ba ta karga mesa ku el e kumpudu ku madera di akasia e kubridu ku uru.

16Ku uru puru i kumpu material pa mesa, ku sedu pratus, kopus, tiẑelas ku jarus ku ta usadu pa darma ofertas di bibida.

Kanderu(Sai 25.31-40)

17I kumpu tambi kanderu di uru puru batidu, ku ramus, tudu ku pe. Si bokas staba suma floris ku sta ficadu, utrus yabri; ma tudu kanderu formadu na un pesa son.

18Seis ramu sai na si ladus, tris na un ladu, tris na utru.

19Na kada un di ki seis ramu i tenba tris boka ku parsi ku flor di amenduiña, utru ficadu, utru ku yabri.

20Na kanderu propi i tenba kuatru boka ku parsi ku flor di amenduiña, utrus ficadu, utrus ku yabri.

21I tenba un flor ficadu bas di kau nunde ku purmeru dus ramu sai nel; utru flor ficadu i staba bas di kau nunde ku sugundu dus ramu sai nel; terseru flor ficadu i staba bas di kau nunde ku terseru dus ramu sai nel.

22Ki floris ficadu ku ki ramus ku tudu kanderu i seduba un pesa son, di uru puru batidu.

23I fasi seti lus pa kanderu. Si material di limpal ku si apagaduris e seduba di uru puru.

24I kumpu kanderu ku tudu si material ku trinta i kuatru kilu di uru puru.

Altar di nsensu(Sai 30.1-5)

25I kumpu altar di nsensu di madera di akasia, kuadradu, di 45 sentimetru di kumprimentu, 45 di largura ku 90 di altura. El ku si cifris e formaba un pesa son.

26I kubri parti di riba, tudu ladus ku cifris, ku uru puru. I kumpu un koroa di uru na si roda.

27I kumpu pa el dus anilia di uru pa dus ladu, i fiksa elis bas di koroa, pa varas ki na kargadu ku el pudi pasa.

28I kumpu varas ku madera di akasia, i kubri elis ku uru.

Azeiti di unson ku nsensu(Sai 30.22-38)

29I kumpu tambi azeiti sagradu di unji, ku nsensu puru ku ta cera sabi; i kumpudu suma tarbaju di algin ku ta kumpu purfumu.