1Reoboan bai pa Siken, pabia tudu Israel baiba ja la pa fasil rei.
2Jeroboan, fiju di Nebat, staba na Ejitu, nunde ki kuriba pa kapli di rei Salomon. Oca ki obi noba, i riba di Ejitu.
3Jinti manda comal. El ku tudu Israel e bai papia ku Reoboan, e falal:
4“Bu pape kastiganu ku kargu pisadu. Gosi ja, bu ta rapati ki tarbaju kansadu ku ki kargu pisadu ku bu pape pui riba di nos. Asin no ta sirbiu.”
5Reoboan fala elis: “Bo bai pera tris dia, bo riba pa mi.” Asin jinti bai.
6Rei Reoboan bai konsulta ideia di garandis ku ta konsijaba si pape Salomon ocal bibu, i punta elis: “Kal ki bo konsiju pa mi pa N pudi ruspundi e pobu?”
7E falal: “Si bu mostra bondadi pa e pobu, bu fasi elis kontenti ku bon palabra, elis e ta sedu bu servus pa sempri.”
8Ma Reoboan ka seta konsiju di ki garandis; i bai pa si kolegas ki kriadu juntu ku elis, ku seduba ja si konsijaduris, i konsulta elis se ideia.
9I punta elis: “Kuma ku bo na konsijan? Kuma ku no na ruspundi e pobu ku falan pa N rapati ki kargu pisadu ku ña pape pui riba delis?”
10Si kolegas falal: “Si bu na ruspundi e pobu ku falau kuma bu pape pui elis kargu pisadu dimas, ma pa bu rapati ki kargu, bu ta fala elis: ‘Ña dedu pikininu i mas gros di ki rabada di ña pape.
11Si ña pape karganta bos kusa pisadu, ami N na buri bo kargu. Ña pape suta bos ku ŝikoti; ami N na kastiga bos ku lakaran!’ ”
12Na terseru dia, Jeroboan ku tudu pobu riba nunde Reoboan, suma ki falaba elis.
13Rei Reoboan ruspundi pobu ku palabra duru, pabia i negaba konsiju ku garandis dalba.
14I papia ku elis konformi konsiju di jovens; i fala elis: “Ña pape kastiga bos ku kargu pisadu, ma ami, N na buri bo kargu. Ña pape suta bos ku ŝikoti, ma ami, N na kastiga bos ku lakaran.”
15Asin, rei ka sukuta ke ku pobu na fala, pabia SIÑOR1 Sam 2.25 mistiba e mudansa pa kumpri palabra ki falaba ja ku Jeroboan, fiju di Nebat, pa boka di Aías di Siló.
16Oca ku tudu israelitas oja kuma rei ka na sukuta se palabra, e rabida e ruspundil, e punta:
“Ke ku no ten ku Davi?
Yardansa ka ten pa nos na fiju di Jesé!
Omis di Israel, bo bai pa bo kasas!
Davi, jubi pa bu propi kasa!”
Asin tudu Israel bai pa se kasas.
17Reoboan fika i rena riba di ki fijus di Israel ku mora na prasas di Judá.
18Rei Reoboan manda Adoniran,2 Sam 20.24 ku staba riba di tarbaju obrigatoriu, ma fijus di Israel dal ku pedra tok i muri. Rei Reoboan janti, i mbarka na si karu, i kuri pa Jerusalen.
19Asin israelitas disliga ku renansa di jorson di Davi te aos.
Who We AreWhat We EelieveWhat We Do
2025 by iamachristian.org,Inc All rights reserved.
