Ezekiyeli 41 - Kinyarwanda Catholic Bible with DC

Icyumba gitagatifu

1Arongera anjyana mu cyumba gitagatifu, apima inkuta, zigira imikono itandatu ku ruhande rumwe n’imikono itandatu ku rundi.

2Ubugari bw’umuryango bwari imikono icumi, naho impande zombi z’urukuta uwo muryango wari utoboreyemo, rumwe rukagira imikono itanu, urundi na rwo itanu. Apima uburebure bw’icyumba gitagatifu, bugira imikono mirongo ine kuri makumyabiri y’ubugari.

Icyumba gitagatifu rwose

3Nuko yinjiramo imbere, apima urukuta rurimo umuryango, rugira imikono ibiri. Apima n’umuryango ubwawo, ugira imikono itandatu y’ubugari; naho impande zombi z’urukuta uwo muryango wari utoboreyemo, rumwe rukagira imikono irindwi, urundi na rwo irindwi.

4Apima uburebure bw’icyo cyumba cya kabiri, bugira imikono makumyabiri kuri makumyabiri y’ubugari, maze arambwira ati «Aha ni Ahatagatifu rwose.»

Amazu matoya yometse ku mpande zombi z’Ingoro

5Hanyuma apima urukuta rw’Ingoro, rugira imikono itandatu; naho andi mazu yari akikije Ingoro agira ubugari bw’imikono ine.

6Ayo mazu agizwe n’utwumba tugerekeranye mu magorofa atatu, igorofa imwe igizwe n’utwumba mirongo itatu. Urukuta rw’imbere rw’utwo twumba rwari rwegeranye n’urw’Ingoro, ariko rutarwubakiyeho.

7Ubugari bw’utwo twumba bwagendaga bwiyongera kuva hasi ugana ejuru, kuko ubugari bw’urukuta rw’Ingoro bwazamukaga bugabanuka. Hari kandi n’aho umuntu anyura, ashatse kuva mu nzu yo hasi ajya mu yo hagati, cyangwa se mu yo hejuru.

8Nuko mbona ko Ingoro yari iseguwe hasi n’ikirundo cy’ibitaka kiyikikije, cyari gifite uburebure bw’imikono itandatu, kikaba ari na cyo mfatiro za twa twumba turi iruhande rw’Ingoro.

9Hagati ya twa twumba twometse ku Ngoro

10n’andi mazu yubatse hirya yayo, hari ikibuga gifite ubugari bw’imikono makumyabiri, kizengurutse Ingoro.

11Imiryango yajyaga muri utwo twumba yerekeraga ahari hasigaye umwanya, umuryango umwe werekeraga mu majyaruguru, undi ukerekera mu majyepfo, maze ubugari bwayo bukaba imikono itanu.

Inzu yari iburengerazuba inyuma y’Ingoro

12Ku ruhande rw’iburengerazuba hari hubatse inzu iteganye n’ikibuga, ikagira ubugari bw’imikono mirongo irindwi, na mirongo cyenda y’uburebure, naho umubyimba w’urukuta rwayo ukaba imikono itanu.

13Hanyuma apima Ingoro igira uburebure bw’imikono ijana. Ikibuga na cyo wongeyeho iyo nzu n’inkike zayo, na byo bigira uburebure bw’imikono ijana.

14Ubugari bw’uruhande rw’imbere rw’Ingoro, wongeyeho ikibuga giherereye iburasirazuba buba imikono ijana.

15Arongera apima uburebure bw’inzu ahereye ku ruhande rw’ikibuga cyari inyuma yayo, ndetse n’amabaraza y’impande zose, bigira imikono ijana.

Imitako y’imbere mu Ngoro

Imbere mu cyumba gitagatifu no mu birongozi byerekera mu gikari,

16ku bitabo by’imiryango, ku madirishya no ku mabaraza y’impande uko ari eshatu yagendaga ateganye n’igitabo cya buri muryango, aho hose hari hakikijeho imbaho z’igiciro kuva hasi kugera ku madirishya. Ayo madirishya ubwayo na yo yari akikijeho utwuma dusobekeranye.

17Kuva ku rwinjiriro kugera imbere mu Ngoro, ndetse no ku nkuta hose imbere n’inyuma,

18hari hatatsweho ibishushanyo by’abakerubimu n’imikindo. Hagati y’umukerubimu n’undi hari umukindo, kandi buri mukerubimu akagira imitwe ibiri:

19umutwe werekeraga ku mukindo w’uruhande rumwe wasaga n’uw’umuntu, uwerekera ku mukindo wo ku rundi ruhande ugasa n’uw’intare, bikaba bimeze bityo ku mpande zose z’Ingoro.

20Ibishushanyo by’abakerubimu n’iby’imikindo byari byarabajwe mu rukuta, byaheraga hasi bikagera ndetse no hejuru y’umuryango;

21kandi inkomanizo z’umuryango w’icyumba gitagatifu zari zifite impande enye zingana.

Urutambiro rubajwe mu biti

Imbere y’icyumba gitagatifu rwose hari ikintu gisa

22n’urutambiro rubajwe mu biti, rufite imikono itatu y’ubujyejuru, imikono ibiri y’uburebure kuri ibiri y’ubugari. Hasi yarwo mu maguni no mu mpande, hose hari habajwe mu biti. Nuko wa muntu arambwira ati «Aya ni ameza ari imbere y’Uhoraho.»

Inzugi z’Ingoro

23Icyumba gitagatifu cyari gikinzwe n’urugi rurimo ebyiri; icyumba gitagatifu rwose na cyo ari uko.

24Urugi rumwe rwari rugizwe n’inzugi ebyiri zikingurwa zose, n’urundi na rwo rugizwe n’inzugi ebyiri.

25Ku nzugi z’icyumba gitagatifu hari hatatsweho ibishushanyo by’abakerubimu n’iby’imikindo, mbese rwose nk’ibyari bishushanyije ku nkuta. Imbere y’umuryango hari ibaraza risakaje imbaho.

26Hirya no hino ku nkuta hari amadirishya ariho utwuma dusobekeranye, hatatseho n’imikindo, kimwe no ku twumba dukikije Ingoro no ku ibaraza ry’imbere y’umuryango.