Amaganya 2 - Kinyarwanda Catholic Bible with DC

INDIRIMBO YA KABIRIAlefu

1Mbega ngo Uhoraho ararakarira umwari w’i Siyoni,

bigatuma amutera gusuherwa!

Yahanantuye ikuzo rya Israheli ariroha hasi;

ntiyibuka akabaho akandagizaho ibirenge bye,

ku munsi w’uburakari bwe!

Beti

2Uhoraho yatsembye inzuri zose za Yakobo, atazibabariye;

mu burakari bwe asenya ibigo by’umwari wa Yuda;

yabirunze hasi, ahindanya igihugu n’abatware bacyo.

Gimeli

3Kubera uburakari bwe bukaze

yatsembye ububasha bwose bwa Israheli,

ayihina akaboko k’iburyo imbere y’abanzi;

muri Yakobo ahacana umuriro ugurumana,

uhatwika impande zose.

Daleti

4Yafoye umuheto we nk’umwanzi,

abangura ukuboko kw’iburyo nk’umubisha;

atsemba abari bafite igikundiro bose.

Yacuranuriye uburakari bwe ku ihema ry’umwari w’i Siyoni,

nuko buragurumana nk’umuriro.

He

5Uhoraho yahindutse nk’umwanzi atsemba Israheli,

yatsembye iminara yayo yose, asenya n’ibigo byayo;

umwari w’i Siyoni amugwiriza amaganya n’umubabaro.

Vawu

6Nk’uko bangiza ubusitani n’akazu kaburimo,

ni ko yayogoje igihugu cyose n’umurwa wacyo,

avanaho ahantu haberaga amakoraniro matagatifu.

Uhoraho yatumye iminsi mikuru n’amasabato

byibagirana muri Siyoni;

kubera uburakari bwe bugurumana,

yigizayo umwami n’umuherezabitambo.

Zayini

7Uhoraho yahigitse urutambiro rwe, azinukwa Ingoro ye,

inkike z’iminara azigabiza ibiganza by’umwanzi;

none barasakuriza mu Ngoro y’Uhoraho

nk’abari mu minsi mikuru!

Heti

8Uhoraho agambiriye kurimbura inkike y’umwari w’i Siyoni;

agiye kuharinganiza ateyeho umugozi,

kandi ntazahina akaboko atamaze kuhatsemba.

Inkuta n’inkike azishyize mu cyunamo;

zose zizasenyukira icyarimwe.

Teti

9Amarembo yayo yarigise mu butaka,

ibihindizo yarabikuye, arabicagagura;

umwami wayo n’abatware bayo bigaruriwe n’abanyamahanga,

nta mategeko akiharangwa,

n’abahanuzi bayo ntibakibonekerwa n’Uhoraho!

Yodi

10Abakuru b’umwari w’i Siyoni bicaye hasi, bagwa mu kantu;

none baritumurira umukungugu mu mutwe, bakenyeye ibigunira.

Abari b’i Yeruzalemu bubitse umutwe ukora ku butaka.

Kafu

11Amaso yanjye yakobowe n’amarira, ndiho ndatengurwa;

nacitse intege kuko umwari w’umuryango wanjye yarimbutse,

abana b’ibitambambuga n’abakiri ku ibere,

bakaba basambagurikira ku bibuga by’umurwa.

Lamedi

12Barabaza ba nyina, bati «Ingano na divayi biri he?»

ari na ko barabirana nk’inkomere ku bibuga by’umurwa,

basambagurika mu maboko ya ba nyina.

Memu

13Icyo nakuvugaho se ni iki?

Nakugereranya n’iki se, mwari w’i Yeruzalemu?

Uwagukiza akaguhumuriza, yaba ari nde,

wa mukobwa we, mwari w’i Siyoni?

Akaga urimo ko kangana n’inyanja,

ni nde washobora kugukiza?

Nuni

14Amabonekerwa abahanuzi bawe bakugejejeho,

ni ibinyoma n’impfabusa!

Ntibakugaragarije igicumuro cyawe,

kugira ngo wirinde ibi byakugwiririye,

ahubwo impanuro bakubwiye,

zarakurindagije zirakuyobya.

Sameki

15Abahisi n’abagenzi barakuryanira inzara,

barakuvugiriza induru, bakakuzunguriza umutwe,

wowe, mwari w’i Yeruzalemu, bagira bati

«Mbese uyu ni wa mugi wavugwagaho ubwiza buhebuje,

ukaba n’umunezero w’isi yose?»

Pe

16Abanzi bawe bose barakwasamiye,

baravuza induru, bagahekenya amenyo, bavuga bati

«Twaramuyongobeje! Koko uyu ni wo munsi twari dutegereje,

none tuwugezeho, turawubonye!»

Ayini

17Uhoraho yageze ku cyo yagambiriye,

ashoje icyo ijambo rye ryagennye kuva kera;

yatsembye nta mbabazi, atuma umwanzi akwishimaho,

yongera ububasha bw’ababisha bawe.

Tsade

18Takambira Uhoraho, umuganyire, mwari w’i Siyoni;

reka amarira yawe yisuke amanywa n’ijoro,

boshye amazi y’umugezi;

ntiwigere uruhuka, n’amarira ntakame mu maso yawe!

Kofu

19Haguruka, utakambe ijoro ryose,

uhereye igihe izamu ritangirira;

curanurira umutima wawe imbere y’uruhanga rw’Uhoraho

nk’uko basuka amazi;

mutegere amashyi kubera ibitambambuga byawe,

byarabiraniye hose mu mayirabiri, bizize inzara.

Reshi

20«Uhoraho, reba kandi witegereze;

abo wakoreye ibi ni bande?

Byagenze bite kugira ngo ababyeyi barye abana babo,

bya bitambambuga byabateraga ubwuzu?

Byagenze bite kugira ngo abaherezabitambo n’abahanuzi

bicirwe icyarimwe mu Ngoro y’Uhoraho?

Shini

21Umwana n’umusaza barambaraye mu mayira;

abakobwa banjye n’abasore banjye bamazwe n’inkota,

ku munsi w’uburakari bwawe warishe,

usogota bose nta mbabazi.

Tawu

22Wampagurukirije abaterabwoba bankikije,

mbese nk’abantu batumiriwe umunsi mukuru;

ntihagira urokoka cyangwa ucika ku icumu,

ku munsi w’uburakari bw’Uhoraho.

Abo nirereye nkabakuza, umwanzi yabantsembyeho.»