Zaburi 98 - Kinyarwanda Catholic Bible with DC

Uhoraho aje mu ikuzo gucira isi urubanza

1Zaburi.

Nimuririmbire Uhoraho indirimbo nshya,

kuko yakoze ibintu by’agatangaza;

indyo ye, ukuboko kwe k’ubutagatifu

byatumye atsinda.

2Uhoraho yagaragaje ugutsinda kwe,

atangaza ubutabera bwe mu maso y’amahanga.

3Yibutse ubuntu bwe n’ubudahemuka bwe,

agirira inzu ya Israheli.

Imipaka yose y’isi

yabonye ugutsinda kw’Imana yacu.

4Nimusingize Uhoraho ku isi hose,

nimuvuze impundu kandi muririmbe,

5nimucurangire Uhoraho ku nanga,

ku nanga no mu majwi y’indirimbo,

6mu karumbeti no mu ijwi ry’impanda;

nimusingize Umwami, Uhoraho.

7Inyanja niyorome hamwe n’ibiyirimo,

isi yose, hamwe n’abayituye.

8Inzuzi nizikome mu mashyi,

n’imisozi ivugirize impundu icyarimwe,

9imbere y’Uhoraho, kuko aje gutegeka isi;

azacira isi urubanza rutabera,

arucire n’imiryango mu butarenganya bwe.