Мудрост Соломонова 6 - Свето Писмо (Гаврилова) 1990（MK1990）

Должност на секој цар е да копнее по мудрост.

1Затоа, слушајте цареви и разберете, поучете се судии од краиштата на земјата.

2Внимавајте вие што владеете со множествата и кои се фалите пред народите!

3Господ е Оној, Кој ви ја подари власта; силата е од Севишниот, Он ги иследува вашите дела и ги испитува вашите намери.

4Иако бевте служители на Неговото царство, не судевте право, не го држевте законот и не постапувавте според Божјите заповеди.

5Он ќе ви се јави страшно и набргу, а строг е судот над управниците;

6зашто малиот заслужува милост, а силните ќе бидат силно измачувани.

7Господ е над сите и од никого нема да се уплаши; Он не се плаши од никаква величина, Он соѕдал и мало и големо, за сите подеднакво промислува.

8Управниците ги очекува строга истрага.

9И така, цареви, моите зборови се упатени кон вас, за да се научите на мудрост и да не паѓате.

10Зашто оние кои ги осветивте, и самите ќе се исветат, а кои се поучени во тоа – ќе најдат оправдание.

11Затоа копнејте по моите зборови, засакајте ги и поучете се со нив.

12Мудроста е сјајна и не темнее – лесно ја гледаат оние што ја сакаат, ја наоѓаат – оние што ја бараат;

13таа ги пристигнува оние што ја бараат; прва им се покажува.

14Кој ја бара од рано утро, нема да се измачува, зашто ќе ја најде како седи пред неговата врата.

15Оти и самата мисла ѕа неа – совршенство е за разумот, а кој бдее заради неа, брзо од грижи ќе се ослободи;

16таа самата оди наоколу и ги бара достојните за себеси; доброволно им се јавува на нивните патишта, со нив се среќава при секоја мисла.

17Нејзиниот почеток е – твојата најискрена желба да учиш,

18а копнежот за учење – љубов е спрема неа; а да ја љубиш значи да ги сакаш нејѕините закони, а да ги пазиш нејзините закони тоа е залог ѕа твојата бесмртност,

19а бесмртноста доближува до Бога;

20затоа копнежот кон мудроста издигнува до царство.

21Ако вие, владетели, им се радувате на престолите и скиптрите, тогаш почитувајте ја мудроста, за да царувате довека.

22А што е мудроста и како настанала, ќе ви кажам – нема да ка скријам тајната;

23нема од вас да ги скријам тајните, ќе ги иследувам од самото раѓање;

24ќе ти го откријам нејзиното познавање, не ќе одземам од нејзината вистина;

25и нема да појдам заедно со оној што копнее од завист, таквиот нема ништо заедничко со мудроста.

26Многуте мудреци се спасение ѕа светот, а разумен цар – благосостојба е за народот.

27Затоа, поучувајте се од моите зборови и ќе ви биде од полза.