Apocalípsis 22 - Biblia en Guaraní - ?anderuete ?e’? Por? 2015

1Upéi pe yvága rembiguái ohechauka chéve pe ysyry oporomoingovéva, hesakãva ita veráicha, osẽva Ñanderuete ha Ovechara’y guapyhaguasúgui.

2Pe tavaguasu mbytépe ha ysyry rembe’y mokõivévape oĩ pe yvyra oporomoingovéva, hi’a meméva 12 jevy, peteĩteĩ jasýpe, hi’a ha hoguekuéra omonguera tetãnguérape.

3Upépe ndaiporivéima mba’eve oñemaldecipyréva. Ñanderuete ha pe Ovechara’y guapyhaguasu oĩ ipype, ha hembiguaikuéra oservíta ichupe.

4Ha’ekuéra ohecháta hova, ha héra oĩta isyvakuéra rehe.

5Upépe ndaiporimo’ãvéima pyhare, ha natekotevẽi tataindy, térã kuarahy resape rehe, Ñandejára Ñanderuete voi ohesapéta ichupekuéra heko jajaipa rupi, ha Ha’e oisãmbyhýta ára atyguasu guive ambue ára atyguasurãme.

Hesu Crísto jeju mokõiha hi’ag̃ui

6Uperire pe yvága rembiguái he’i chéve: Ko’ã ñe’ẽ añete ha katuete oikopáta hekoitépe, ha Ñandejára Ñanderuete, umi proféta pytukuéra Jára, ohechauka ijyvága rembiguái rupi hembiguaikuérape umi mba’e ojehu pya’eva’erãva.

7Peikuaa porãke, pya’e Che ajúta, (térã Che ajúta pe ára oñeha’ãrõ’ỹre, Matéo 24,7; Lúcas 17,24). Ovy’aite pe iñe’ẽrendúva ko’ã profecía ko’ãva rehe oĩva ko kuatiañe’ẽ kóvape.

8Che ningo, Juan, ahendu ha ahecha ko’ã mba’e. Ha ahendu ha ahechapa rire ajeity pe yvága rembiguái py renondépe amomba’eguasu hag̃ua ichupe, ohechaukava’ekuégui chéve opaite ko’ã mba’e.

9Ha’e katu he’i chéve: Anítei rejeity, che ningo tembiguáinte avei nendive ha ne hermanokuéra ha umi profetakuéra ndive, emomba’eguasu katu Ñanderuetépe.

10Ha he’i chéve: Anítei reroñemi ko’ã profecía ko’ãva oĩva ko kuatiañe’ẽme, hi’ag̃uímagui pe ára ojehupa hag̃ua.

11Upéramo upe hembiapo vaíva tahembiapo vaive ohóvo, upe oñemongy’áva toñemongy’ave ohóvo, upe heko porãva taheko porãve ohóvo, upe heko potĩva toñemboheko potĩve ohóvo.

12Cháke, Che aju pya’éta, ha Che ahepyme’ẽta peteĩteĩme hembiapokue rehe.

13Che ha’e pe “a” ha pe “zéta”, he’iséva pe tenondegua ha pe ipaha peguáva, pe ñepyrũ ha pe ipaha.

14Ovy’aite umi ojohéiva ijao, ha ojapóva hembiapoukapykuéra (1 Juan 3,23), ha’ekuérante ho’úta pe yvyra’a oporomoingovévagui, ha’ekuérante oikéta pe tavaguasu rokẽ rupi.

15Okápe katu opytáta umi jagua (umi oñemoĩva Ñanderuete rehe hembiapo vaiete rupi. Matéo 7,6), paje apohára, umi ojoguerekóva menda’ỹ rehe, umi oporojuka reíva, umi omomba’eguasúva jára ra’ãngápe, ha opaite ohayhúva ha oikóva japúpe.

16Che, Hesu, amondo che yvága rembiguái aikuaauka hag̃ua peẽme, che iglesiayguakuérape umi mba’e oikova’erãva. Che ningo David rapo, ha iñemoñare, pe jasytata ojajái porãva ko’ẽjúvo.

17Pe Pytu Porãmbáva ha Ovechara’y rembireko ningo he’i: Eju. Ha pe ohendúva te’i: Eju. Ha upe ijy’uhéiva tou, ha upe oipotávape oñeme’ẽ reíta ichupe pe tekove rehegua y reiete, te’i avei: Eju.

18Che aikuaauka opaite ohendúvape ko’ã kuatiañe’ẽ profecía ha ha’ese: Oimeraẽ ombojo’apýva hi’ári, oĩva guive ko kuatiañe’ẽ kóvape, Ñanderuete ombojo’apýta hi’ári avei umi plága ojehaíva ko kuatiañe’ẽme,

19ha oimeraẽ oipe’áva ñe’ẽ ko kuatiañe’ẽgui Ñanderuete oipe’áta avei héra pe tekovete kuatiañe’ẽgui ha pe távagui oñemboykéva Ñanderuetépe g̃uarã, ojehai háicha ko kuatiañe’ẽ kóvape.

20Pe oikuaaukapáva ko’ã mba’e, he’i: Néi, Che aju pya’e (térã pe hóra oñeha’ãrõ’ỹva) Amen, eju ore Jára, Hesu Crísto.

21Hesu Crísto py’aporã ha poriahuvereko toĩ opavave ndive.