Deuteronómio 25 - Biblia en Guaraní - ?anderuete ?e’? Por? 2015

1Oiko ramo ñe’ẽjuavy (pléito) pende apytépe, ha oho ramo hikuái mbojovakehára rendápe ombojovake hag̃ua ichupekuéra, ha’ekuéra oipytyvõva’erã heko potĩvape ha ohavirava’erã hembiapo vaívape.

2Ha upe mba’evai apoharépe oñenupãta ramo, pe mbojovakehára omoñenoukava’erã ichupe yvýpe, ha oinupãukava’erã ichupe henondépe; hembiapo ivai háicha, hetave térã mbovyve.

3 Cuarénta ñenupã pevénte ikatu oñenupã, ndahetaveiva’erã; anítei oñenupã hetavégui, nde rapicha opyta otĩete nde resa renondépe.

4Neremoĩriva’erã juru jokoha pe guéire ojykýi jave mba’e ra’ỹi.

5Túva ra’ykuéra oiko ramo oñondive, ha omano ramo peteĩva, ha ndaita’ýrai ramo, pe omanova’ekue rembireko nomendaiva’erã ambue kuimba’e hesegua’ỹva rehe; hovaja omendava’erã hese.

6Ha imemby ypykue oguerekova’erã ityke’ýra omanova’ekue réra, ani hag̃ua ogue héra Israel apytégui.

7Ha upe kuimba’e nomendaséi ramo hovajáre, upéicha ramo pe kuña ohova’erã táva rokẽme, karai ancianokuéra oisãmbyhyhápe, ha he’iva’erã: Che rovaja nomopu’ãséi ityke’ýrape g̃uarã herarã Israelguakuéra apytépe, ha’e ndoikoséi he’i háicha pe tembiapoukapy menda tovaja reheguápe.

8Upéicharamo umi táva karai ancianokuéra ohenoiukava’erã ichupe, ha oñe’ẽ pohyiva’erã hendive; ha upeichavérõ ha’e opu’ã ha he’i: Namendamo’ãi hese.

9Upéicharamo oñembojava’erã hese hovaja umi ancianokuéra rovake, ha oipe’ava’erã hovaja sapatu ha ondyvuva’erã hova rehe, ha he’iva’erã: Péicha ojejapova’erã pe kuimba’e omopu’ãse’ỹva rehe ityke’ýra róga.

10Ha péicha oñehenoiva’erã ichupe Israel retãme: Ipynandíva róga.

11Oĩ ramo oñorãirõva oñondive, ha oñemboja ramo peteĩva rembireko oipytyvõ hag̃ua iménape, ha oipysóvo ipo ojapyhy ramo hapi’águi,

12upéicharamo reikytĩva’erã ichugui ipo, nereperdonaiva’erã.

13Ndereguerekoiva’erã nde vosápe balánza pésa japu.

14Ha ndereguerekoiva’erã nde rógape ambue medída japu.

15 Balánza pésa heko peguáva reguerekova’erã, nde rekove ipuku hag̃ua pe yvy Ñanderuete, nde Jára ome’ẽtavape ndéve.

16Ñanderuete ipy’arógui ko’ã mba’e ojapóvare, ha ombotavyséva hapichápe.

Amalecguakuérape oñehundiva’erã

17Penemandu’áke Amalec ojapova’ekuére penderehe tapére, pesẽ ramoguare Egíptogui;

18mba’éichapa ojeity pendeári tapépe, ha ohundi umi ikangývape ohóva tapykuépe, peẽ penekane’õ ha peime ramoguare jejopýpe; ha ndokyhyjéi hikuái Ñanderuetégui.

19Upévagui, ág̃a Ñanderuete, pende Jára ome’ẽha ára peẽme pytu’u opaite penderehe ija’e’ỹvagui oikóva pende jerekuévo ha Ha’e penemoinge ramo pende yvyrãme, peguereko hag̃ua pende lóte, aníke penderesaráitei pembogue hag̃ua Amalec réra ko yvága guýgui.