Matéo 7 - Biblia en Guaraní - ?anderuete ?e’? Por? 2015

Ani peporombojovake

1Ani peporombojovake, ani hag̃ua peẽ peñembojovake;

2peẽ peporombojovake háicha, peichaite peñembojovake jevýta, ha pe medída peẽ peiporúva ojeporu jevyva’erã penderehe.

3Mba’érehepa rema’ẽ pe yvyra ku’imi rehe oĩva nde rapicha resápe ha nde nereñandúi pe yvyra poguasu oĩva nde resateépe.

4Ha mba’éicha piko eréta nde rapichápe: Ehejána tanohẽ nde reságui pe yvyra ku’imi, oĩ jave nde resateépe gueteri pe yvyra poguasu.

5Nde, tovamokõi, eipe’a raẽ pe yvyra poguasu nde reságui, ha upéi ae eñeha’ã enohẽ pe yvyra ku’imi nde rapicha reságui.

6Ani peme’ẽ jaguápe umi mba’e oñemboykéva Ñanderuetépe g̃uarã, ha ani peity pende jeguaka (pérla) kure apytépe, ani hag̃ua opyrũmba hese, ha upéi ojere penemondyryrypa.

Peñembo’e porã

7Pejerure ha oñeme’ẽva’erã peẽme; peheka ha pejohuva’erã; pembota ha ojepe’ava’erã peẽme.

8Upe ojerurévape oñeme’ẽva’erã; upe ohekáva ojohuva’erã; ha upe ombotávape ojepe’ava’erã (pe okẽ).

9Mávapa pende apytépe, ita’ýra ojerure ramo ichupe peteĩ galléta, ome’ẽta ichupe peteĩ ita.

10Térãpa ojerure ramo peteĩ pira, ome’ẽta ichupe peteĩ mbói.

11Peẽ peneñañáva peme’ẽkuaa ramo pende ra’ýpe mba’e iporãva, ko’yteve pende Ruete yvága pegua ome’ẽva’erã mba’eporã umi ojerurévape ichupe.

12Opaite mba’e peẽ peipotáva guive ojejapo penderehe, peichagua mba’e pejapova’erã peẽ ambuekuéra rehe avei, kóva ningo Ñanderuete rembiapoukapy ojehai háicha ikuatiañe’ẽme.

Okẽ po’i

13Peike pe okẽ po’i rupi, ipa’ũguasúgui pe okẽ ha ipégui pe tape oporogueraháva ñehundirãme (aña retãme), ha heta ningo umi upérupi oikéva.

14Ipo’i ningo pe okẽ ha ipo’i pe tape oporogueraháva tekoverãme (yvágape), ha mbovymi umi upérupi oikéva.

Pe yvyra’a

15Peñeñangarekóke umi proféta gua’úgui, oúva pene rendápe ovecha ramóicha, ipy’apýpe katu aguaraguasu ñarõicha.

16Hi’akue (hembiapokue) rupi peikuaáta ichupekuéra. Ojepo’o piko parral’a ñuatĩ rakãgui, térã higo’a ka’avo hatĩvagui.

17Upéicha, opaite yvyra porã hi’a porã, ha opaite yvyra hasýva, hi’a vai ha ndovaléi mba’everã.

18Ndaikatúi pe yvyra iporãva hi’a vaívo, térã pe yvyra hasýva hi’a porãvo.

19Opaite yvyra hi’a porã’ỹva katu, oñekytĩmbáta, ha oñemombóta tatápe.

20Upéicharupi hi’a rehe peikuaáta umi proféta iporãva ha ivaívape.

Hesu Crísto rehegua añeteguáva

21Ndaopavavéi he’íva chéve: Che Jára, che Jára, oikeva’erã yvágape, upe ojapóva che Ruete yvága pegua rembipota uvei.

22Upe ára upévape heta he’íta chéve: Che Jára, che Jára, ore piko ndoroprofetizáira’e nde rérape, noromosẽi piko ra’e heta mba’epochýpe, ha nde rérape ndorojapói piko ra’e heta milágro.

23Ha Che ha’éta ichupekuéra: Araka’eve Che ndapokuaái; tapehopa che ypýgui peẽ tembiapo vai apohára.

24Upévare upe ohendúva che ñe’ẽ ha ojapóva hekoitépe ambojoja pe kuimba’e iñakãguapy porãva rehe, omopu’ãva hóga itaguasu ári.

25Ha oúvo amaguasu, ha pe y osyry hatãvo, ha pe yvytu oipeju hatã vaívo pe óga rehe, mba’evéicharamo ndo’ái, oñemopu’ãgui itaguasu ári.

26Ha upe ohendúva che ñe’ẽ ha ndojapóiva hekópe, ambojoja kuimba’e ivýrova rehe, omopu’ãva hóga yvyku’i ári.

27Ha oúvo pe amaguasu, ha pe y osyry hatãvo, ha pe yvytu oipeju hatã vaívo hóga rehe, ho’a ha oñembyaipa.

28Ha Hesu he’ipávo ko’ã mba’e, hetayguakuérape ijurujaipa ha (opondera) hemimbo’epýre,

29Hesu ombo’égui ichupekuéra Pytu Yvága rekópe ha ndaha’éi umi kuatia haiháraicha.