1Mokõi ára rire og̃uahẽtama pe páscua ha pe pan levadura’ỹre oje’uha arete; ha pa’i ruvichakuéra ha kuatia haihára oheka mba’éichapa oapresáta Hesúpe traicion rupi ha upéi ojuka hag̃ua ichupe.
2He’i voi hikuái: Anítei arete aja, ani hag̃ua oiko sarambiguasu tetãyguakuéra apytépe.
Pe kuña oñohẽva Hesu akã rehe pe mba’e ryakuã porã3Ha Hesu oĩ aja Betániape, Simon pe ileprava’ekue rógape, okaru jave, ou peteĩ kuña oguerúva imba’yru’i henyhẽva mba’e ryakuã iporãitereíva ha hepyetévagui, ha’e ojoka imba’yru’i ha oñohẽ pe mba’e ryakuã porãitéva Hesu akã rehe.
4Ha upépe oĩ umi ipochýva ha he’i: Ma’erã piko oñeñohẽmba rei pe mba’e ryakuã porãitéva.
5Pe mba’e ryakuã oñevende porãva’erãmo’ã 300 ára tembiapo repy rehe, ha pe pirapire oñeme’ẽva’erãmo’ã mboriahukuérape. Ha oñe’ẽngururu hikuái pe kuña rehe.
6Hesu katu he’i ichupekuéra: Peheja ichupe, mba’érehe piko pemyangekõi ichupe. Ha’e ningo ojapo cherehe tembiapo iporãitéva.
7Mboriahu ningo tapia oĩta pende apytépe, ha pejaposeha árape ikatu pejapo hesekuéra mba’eporã; Che katu naĩri tapiamo’ãi pende apytépe.
8Ha’e ojapo pe ikatumíva, omotenonde omohyakuãvo che rete che tyvýpe (sepultúrape) g̃uarã.
9Añetéko ha’e peẽme: Mamo oñemombe’uhápe ko evangélio ko yvy tuichakue javeve, oñemombe’úta avei ko kuña ojapóva cherehe, oiko hag̃ua hese mandu’a tapiaite.
Júdas otraiciona Hesúpe10Ha Júdas Iscarióte, umi 12 hemimbo’ekuéra peteĩva, oho pa’i ruvichakuéra rendápe, omoĩ hag̃ua Hesúpe ipopekuéra.
11Ha’ekuéra ohendúvo ichupe, ovy’a joa, ha ome’ẽ ichupe pirapire, oheka hag̃ua mba’éichapa omoĩta Hesúpe ipopekuéra.
Oñembosako’i pe páscua arete12Ha pe pan ilevadura’ỹva arete ára peteĩháme ha pe páscua ovecha ra’y ojejukaha árape, hemimbo’ekuéra oporandu Hesúpe: Moõpa reipota roho rombosako’i hag̃ua ndéve pe páscua rembi’u re’u hag̃ua.
13Ha Hesu omondo mokõi hemimbo’e ha he’i ichupekuéra: Tapeho pe távape ha pejohúta peteĩ kuimba’e oguerojáva y kambuchi henyhẽvape,
14tapeho hapykuéri, ha peje pe óga ha’e oikeha járape: Mbo’ehára oporanduka, moõpa oĩ pe koty ho’u hag̃ua hemimbo’ekuéra ndive pe páscua arete rembi’u.
15Ha ha’e ohechaukáta peẽme peteĩ kotyguasu yvategua oĩmbáva, upépe pembosako’ipa ñandéve.
16Ha oho umi temimbo’e upe távape, ojohupa Hesu he’i haguéicha ichupekuéra, ha ombosako’i hikuái pe tembi’urãpáscuape g̃uarã.
17Ha ka’aru pytũvo Ha’e oho upépe umi 12 hemimbo’ekuéra ndive.
18Ha oĩ jave hikuái mesápe, ocena jave, Hesu he’i ichupekuéra: Añete ha’e peẽme peteĩ pende apytégui okaruvahína chendive, cheme’ẽta cherehe ija’e’ỹva pópe.
19Upérõ ha’ekuéra oñepyrũ ojepy’apy ha peteĩteĩ oporandu ichupe: Che piko. Ha ambue, Che piko.
20Ha Hesu he’i ichupekuéra: Pe omoingéva ipo chendive mba’yrúpe.
21Añetehápe oñeme’ẽta yvyarigua Ra’y ojehai haguéicha, angái katu pe otraicionátava yvyarigua Ra’ýpe, iporãveva’erãmo’ã ichupe nonacéi rire.
22Ha okaru jave hikuái Hesu ojapyhy pe pan, ohovasa oipehe’ã ha ome’ẽ ichupekuéra he’ívo: Kóina, kóva ningo che rete.
23Ha ojapyhývo pe váso oagradecé Ñanderuetépe ha ome’ẽ hemimbo’ekuérape, ha opavave ho’u ichugui.
24Ha Hesu he’i ichupekuéra: Kóva ningo che ruguy, tuguy ñembopy’apeteĩ pyahu reheguáva, oñeñohẽva heta rehehápe.
25Añete ha’e peẽme nda’umo’ãveimaha parral rykue, upe ára ha’u jevyva’erãha peve ipyahúva Ñanderuete rekohápe.
Hesu he’i Pédro onegataha ichupe26Ha opuraheipa rire pe purahéi, oho olívo (yvyra) cérrope.
27Ha Hesu he’i ichupekuéra: Peẽ peñepysãngapáta, ojehai ningo Ñanderuete kuatiañe’ẽme: Ojejukáta herekuápe, ha ijovechakuéra oñemosarambipáta, (Zacarías 13,7).
28Che aikove jevy rire, aháta pene renonderãme Galiléape.
29Ha Pédro he’i ichupe: Opavave oñepysãnga ramojepe, che nahanirimo’ãi.
30Hesu katu he’i ichupe: Añete ha’e ndéve, ko pyharépe, pe gállo osapukái mboyve mokõi jevy, nde chembotovéta (chenegáta) mbohapy jevy.
31Ha’e katu he’i jevy: Amanova’erã ramo jepe nendive, mba’eveichaveramo norombotovemo’ãi. Upéicha he’i joa avei ambuekuéra.
Hesu Getsemaníme32Ha oho hikuái peteĩ tenda héravape Getsemani, Hesu he’i hemimbo’ekuérape: Peguapy ko’ápe aha aja Che añembo’e.
33Ha Hesu ogueraha hendive Pédro, Jacóbo ha Juánpe, ha oñepyrũ ojepy’apyeterei ha imba’embyasy.
34Ha he’i ichupekuéra: Che ánga ojepy’apyeterei amano hag̃uáicha, pepyta ápe ha ani pekétei.
35Ha oñemotenonde michĩmive ichuguikuéra, ojeity yvýpe, ha oñembo’e: Ikatúrõ tohasa chehegui ko hóra kóva.
36Ha he’i: Che Ruete, ndéve ningo opaite mba’e ikatu, embohasamína chehegui ko váso kóva (jepy’ara’ã); opáichavo, ani pe che aipotáva oiko, upe nde reipotávante uvei toiko.
37Ha Hesu ou ha ojohu hemimbo’ekuérape okepa, ha he’i Pédrope: Simon reke piko. Ndaikatúi pikóra’e nde chepytyvõmi peteĩ horamínte jepe ne ñembo’épe.
38Ani peke ha peñembo’éke ani hag̃ua peñepysãnga; ñande pytu porã ningo ikyre’ỹ, ñande ro’o (rete) katu ikangy.
39Ha Hesu oho oñembo’e jevy ha he’i jey pe he’imava’ekue.
40Ha ou jeývo ohecha okepa jey hikuái, hopehyietereígui, ha ndoikuaái hikuái mba’épa ombohováita ichupe.
41Ha Hesu ojevývo mbohapyhápe he’i ichupekuéra: Pekéntema ha pepytu’u, ovaléma, og̃uahẽma pe hóra yvyarigua Ra’y ho’atamaha angaipavóra pópe.
42Pepu’ã jaha. Péina pe chetraicionátava (che py’ajoyvýva) oñemoag̃uíma ñandehegui.
Oñeñapytĩ Hesúpe43Ha Hesu oñe’ẽ aja gueteri hína og̃uahẽ Júdas, umi 12 hemimbo’ekuéra peteĩva, ha hendive heta pa’i ruvicha remimboukuéra, karai ancianokuéra, kuatia haiharakuéra ha soldadokuéra, kyse puku ha yvyra reheve.
44Ha Júdas, pe otraicionátava Hesúpe ome’ẽ ichupekuéra ko techaukaha (señal): Upe che ahetũvape, upéva ha’e, peapresa ha pegueraha ñapytĩ porãháme ichupe.
45Ha Júdas og̃uahẽvo oñemboja Hesu rendápe ha he’i: Mbo’ehára. Ha ohetũ ichupe.
46Upévo ojapyhy hikuái ichupe ha ogueraha Hesúpe ñeñapytĩmby porãme (mburuvicha ha pa’iguasu oĩháme).
47Ha peteĩva ijapytégui, ohekýi ikyse puku ha oikytĩ pa’iguasu rembiguái nambi.
48Upérõ Hesu he’i ichupekuéra: Mondaha rekávoicha pesẽ kyse puku ha yvyra reheve cheapresa hag̃ua.
49Opaite árape aĩ penendive Ñanderuete rogaguasúpe, aporombo’e ha ndacheapresaiva’ekue, opáichavo péva ojehu oiko hag̃ua ojehaimava’ekue Ñanderuete kuatiañe’ẽme.
50Upérõ hemimbo’ekuéra ohejapa ichupe ha okañymba hikuái.
51Ha peteĩ karia’y, ahoja perirĩetépe oñemo’ãva, oho hapykuéri, ha oapresa hikuái ichupe.
52Ha’e katu ohejánte isavana ipopekuéra ha okañy opívo.
Ojegueraha Hesúpe pa’iguasu rendápe53Ha ogueraha hikuái Hesúpe pa’iguasu rendápe, ha oñembyatypa pa’i ruvichakuéra, karai ancianokuéra ha kuatia haiharakuéra.
54Ha Pédro oho hapykuéri, mombyry guive, pa’iguasu korapy peve ha upépe oguapy tembiguaikuéra apytépe ojepe’e hag̃ua,
55ha pa’i ruvichakuéra ha mburuvicha aty oĩ háicha oheka asy techaharekuérape oñemoĩ hag̃ua Hesu rehe, ndojohúi katu avavépe.
56Oĩ heta oñe’ẽ reíva Hesu rehe, iñe’ẽnguéra katu ojuavypa.
57Ha oĩ ambue opu’ãva ha oñe’ẽ rei Hesúre, he’ívo:
58Ore rohendu Ha’e he’i ramoguare: Che aitypáta Ñanderuete rogaguasu, kuimba’e rembiapokue ha mbohapy árape amopu’ã jevýta ambue, ndaha’éiva kuimba’e rembiapo.
59Upeichavérõ jepe iñe’ẽ noĩri oñoñe’ẽme.
60Upémaramo pe pa’iguasu opu’ã ha oñembo’y imbytepekuéra ha oporandu Hesúpe: Mba’érehe piko nerembohováiri ko he’íva nderehe.
61Hesu katu okirirĩ ha nde’íri mba’eve. Oporandu jevy ichupe pe pa’iguasu ha he’i: Ndépa Ñanderuete Ra’y, pe Mesías.
62Ha Hesu he’i: Che ha’e, ha pehecháta Ñanderuete Ra’y oguapýrõ pe Ipu’akapaitéva akatúa gotýo ha oútava arai ári.
63Upéramo pe pa’iguasu omondoro ijao ha he’i: Ma’erãpa ñaikotevẽvéta techaharekuéra rehe.
64Pehendúma ningo iñe’ẽ jererovupáva ha mba’épa hi’ã peẽme: Ha opavave omoneĩ Ha’e omano hag̃ua.
65Ha umía apytépe oĩ umi oñepyrũva ondyvu hese, upéi ojaho’i hova ha ohovanupãvo oporandu: Emombe’úke mávapa nenupãva’ekue réra, ha umi soldádo jepe oinupã Hesúpe.
Pédro ijapu66Ha Pédro oĩ aja pe korapýpe, ou peteĩ kuña, pe pa’iguasu rembiguái peteĩva.
67Ha ohechávo Pédrope ojepe’ehahína, oma’ẽ hese ha he’i: Nde ningo reimékuri avei Hesu Nazaretgua ndive.
68Ha’e katu ombotove (onega), ha he’i: Ndaikuaái ichupe, ha ndaikuaái pe nde eréva. Ha osẽ okápe korapy’ípe. Ha pe hórape pe gállo osapukái.
69Ha pe tembiguái péva ohecha jevývo Pédrope he’i umi upépe oĩvape: Kóva ningo hesegua avei.
70Ha ha’e ombotove jey. Ha uperiremi, ambue upépe oĩva, he’i Pédrope: Nde ningo heseguakueraite, Galileaygua voi ningo ne ñe’ẽ.
71Ha’e katu omaldeci he’ívo; Ñanderuete rérape, ku añeterõguáicha he’i: Ndaikuaái upe kuimba’e peẽ peñe’ẽva rehe.
72Ha upevovete pe gállo osapukái mokõiha jevy. Upérõ Pédro imandu’a Hesu ñe’ẽ rehe he’imava’ekue ichupe: Pe gállo osapukái mboyve mokõi jevy, nde chembotovétama mbohapy jevy. Ha Pédro imandu’ávo pe ñe’ẽ pévare oñepyrũ ojahe’o.
Who We AreWhat We EelieveWhat We Do
2025 by iamachristian.org,Inc All rights reserved.
